Ghava tsa Shiy 29

Zhakubə Kumə lə Rashel

Liy hum ki na, mbaʼ Zhakubə kafiy, ka nuw lə kwal njasaa dza kwa hiɗiy dza kwa ghumə. 2 Ma ghəci mbə kwal tə nahuti vici na, mbaʼ kəsashi yam latim mbə gamba, mbaʼ garəwa teŋkesli lə kwiy vəgha shi mahəkanə məhəni məhəni. Sa nzanay, yam va ka məndiy ga kaa dəmbəkə. Mbaʼ məndi niy kalay yam va lə hərambəzli dikə na. 3 Ma sa ka ka ndəghu shiy ɓasəshi gwanashi lə dəmbəkə tsa shi ki na, ma nza məndi ɗəŋulanti hərambəzli va, ka ga yam kaa dəmbəkə. Ma sa ka məndi gamti yam ki na, nza məndi zhanamiy hərambəzli. 4 Ma kə Zhakubə kaa ka ndəghu shiy kəsashi na va tiɓa ki na: «Səəkə kuma səəkə ghuy shəkaa madigahira?» Kə. Ma kə ghəshi kaa ngəci na: «Səəkə mbə məlmə Haran səəkə ghiy,» kə ghəshi. 5 «Sənay Labanə zəghu Nahur ghuy na?» Kə kaa ngəshi. «A ghiy sənay,» kə ghəshi. 6 «Kuriŋ na na?» Kə. «Kuriŋ na, ava zha ci Rashel mbə sar lə teŋkesli,» kə ghəshi. 7 Ma kə kaa ngəshi na: «havəghuy na pi, ghula na vici ta ɓasə shiy dzəti bəghə ta ndəɓə, sanamiyshim yam a ghuy zha ta pəranshi guzən,» kə kaa ngəshi. 8 Ma kə ghəshi kaa ngəci na: «Ka mbay ghiy ɗəŋuli hərambəzli va kala ɓasəshi mbəzli gwanashi lə dəmbəkə tsa shiw. Sa ka mbəzli gwanashi ɓasəshi kiy, nza məndi ɗəŋulanti hərambəzli miy yam va, ma nza məndi ga yam kaa dəmbəkə ghalaɓa ki,» kə ghəshi.

9 War ghəci mbə gəzə kuma lə ka ndəghu shiy va ki na, ndəs Rashel tsəhəta lə dəmbəkə tsa dəta, sa nzana ghənzə niy ndəghushi. 10 War sa nata Zhakubə Rashel zha Labanə, zəmbəghəta mbəghiy səəkəta lə teŋkesli dəta na, dza na mbaʼ dzaa ɗəŋulanti hərambəzli miy yam va, mbaʼ sanavə yam kaa teŋkesli Labanə zəmbəghəta mbəghiy. 11 Dza Zhakubə mbaʼ hutəməvə Rashel, ka wahə ghəci zlaŋ zlaŋ. 12 Ma kə kaa ngəta na: «Mani nza ghiy lə dəŋa, zəghu Rebeka nzee,» kə kaa ngəta. Sa favə zha va tsəgha na, ka dzata lə bali, mbaʼ dzaa gəzanci kuma va kaa dəta. 13 War sa favə Labanə slən tsa Zhakubə zəghu zhambəghiy na, dza na ka kəsli bali ta dza ta kumə li. Sa kumay ghəshi na, hutəm hutəməvə wəzə wəzə, mbaʼ pəməghə jighi. Sa tsəhəshi ghəshi kiy ghyi ki na, dza Zhakubə mbaʼ slanakə kumaa mənita li gwanata kaa Labanə. 14 Sa fanti labanə kuma va, ma kə kaa ngəci na: «Manəra nza gha ndəku ndəku kataŋ, miymiy kutiŋ ni na shi ghum,» kə. Dzəghwa mbaʼ Zhakubə nziyiy kiy ghyi tsa ci gar tir ki.

kumaa dzəkən ɓə miʼi Zhakubə

15 Ma tə nahuti vici, ma kə Labanə kaa Zhakubə na: «Ya tsəgha nza ghum maniy, ka dza ghaa ghəraɗa sləni tə gəmuw. Ə pə gha gəzara shi dzee waŋa tə sləni dza ghaa ghəraɗa,» kə.

16 A ghyehi niy nza bakə va Labanə, Leya, kə məndi kaa slən tsa na dikə na, ma na juw na na, Rashel, kə məndi kaa slən tsa nzə. 17 Leyay, kiyasə niy nza mətsəhi nzə, ma Rashel na, zha kiyasə ka maw nighə ndə ghənzə niy nza. 18 Mbaʼ Zhakubə niy mawti Rashel ki. Ma kə kaa Labanə ki na: «Ə dzee ghəraŋa sləni piya mbərfəŋ, nza gha ndara Rashel, na juw na va zha gha, ta nza ghənzə ka malee,» kə. 19 Mbaʼ Labanə zləɓavə kuma va, «Wəzəɓa kaa ngəŋa ɗee ɓə zha va kaa tsahuti ndə, nziyŋa vəghee a gha ghəraɗa sləni,» kə.

20 Dza Zhakubə ki tapə ta ghəra sləni kaa Labanə piya mbərfəŋ, nza ghəci ɓanavə Rashel ka mali ci, ceslə ghəci kəɗamti piya va. Nja vici ɓəlaɓəlata ghəci nata piya mbərfəŋ na va, sa nzana tərəŋuəy ghəci niy ɗiti Rashel. 21 Ma kə Zhakubə kaa Labanə ki na: «Ee kəɗamti vəghu tsaa niy slati ghum, pəhavəra malee, ee ɗi jakəva li nana,» kə.

22 Dza Labanə ki mbaʼ ɓasəti mbəzli mbə məlmə gwanashi ta zəmə shiy mbə pəhə makwa. 23 Ma sa mənta virɗi ki na, dza Labanə pəm pəməvə Leya, na dikə na va zha ci, mbaʼ pəmanavə kaa Zhakubə, hyamti Zhakubə li ki. 24 Dzəghwa na pəm pəmanavə Zilpa, maliy ghəranci sləni kaa Leya, ta nza ghənzəə kwa ghəranta sləni. 25 Ma sa kəɗiy pi ki, tsaʼ kə Zhakubə na, Leya na hi na va li. Ma kə kaa Labanə na: «A slən tsa gəla ni məntəɗa gha ni shia? Ta Rashel yən niy ghəraŋa sləni na, tawa dakətəra ghaa?» Kə. 26 Ma kə Labanə kaa ngəci na: «Va kuma jiji ghiyəy, kar məndiy pəhanti pərɓa na juw na zha kaa na dikə naw. 27 Kəɗanti məni mətəpa ləwma kutiŋ lə na dikə na na zha, nzee ndaŋa na juw na va zha, ma nza gha zhiniy kəsə sləni ta piya mbərfəŋ tə nava diɓa,» kə 28 Tsəgha na, kə Zhakubə, mbaʼ mənti vici mbərfəŋ lə Leya mbə mətəpa. Liy hum ki na, mbaʼ Labanə zhiniy pəhanavə Rashel ta nza ghənzə ka mali ci. 29 Dza na pəm pəmanavə Bila maliy ghəranci sləni kaa Rashel ta nza ghənzə ka maliy ghəranta sləni. 30 Hi Zhakubə lə Rashel fəcava kuraku ki, tərəŋuɓa ghənzə ghəci ɗiti kaa Leya. Dza na ka ghəra sləni piya mbərfəŋ kaa Labanə diɓa.

Ndərazhi Zhakubə

31 Ma sa nighəti Kwa sləkəpə, kwa ndafəsafə na Leya va Zhakubə kə na, mbaʼ ɓanavə ya ndərazhi. Ma Rashel na, mbaʼ mənti ka jəŋa. 32 Dzəghwa Leya ki mbaʼ ɓəvə hur, baw yakə zəghu zal, Ruben kə kaa slən tsa ci. kuma ɗi naa gəzə mbə fə slən tsa vay: «A Kwa sləkəpə nay haʼu tsa kənee, ta ɗira dza zara nana,» ɗi naa gəzə.

33 Zhəghwa na diɓa, mbaʼ ɓəvə hur, mbaʼ zhini yakə zəghu zal. A kə na: «A Kwa sləkəpə sənay, ka ɗira zaraw, kə, va tsəgha ndara na tsahuti zəghu,» kə. Mbaʼ fanati slən Shimeyaŋw. 34 Zhəghwa na diɓa mbaʼ ɓəvə hur, mbaʼ yakə kwa mahəkana zəghu zal. Ma kə na: «Nanay, ta ɗira dza zara, sa nzanay, ndərazhi mahəkanə yanakee,» kə. Dzəghwa Zhakubə mbaʼ fanati slən Levi.

35 Zhəghwa na diɓa mbaʼ ɓəvə hur, mbaʼ yakə kwa faɗa zəghu zal. Ma kə na: «Nana kiy, ta fal Kwa sləkəpə dzee,» kə. Mbaʼ fanati slən Zhuwda kaa zəghu va. Liy hum ki na, mbaʼ garəti ya.