28
Liy hum ki na, dzəghwa Izakə daʼ haray Zhakubə, ta gəzanci kwa kərni kuma ci ghəciy dzay. Ma kə ngəci na: «A zəghwee, əntaa gha ɓə zha tə hiɗi ka Kanahaŋ ta nza ghənzə ka mali gha ma. 2 Mbalaa dzakə ghyi tsa jijiŋa Betəwel, diy məŋa, tə hiɗi Padam Haram. Sa ka gha tsəhəŋay, nza gha ɓəvə mali gha mbə ghyehi Labanə zəmbəghiy məŋa. 3 Nza Hyalaa guranti tə bərci təfətəŋa miy, mbaʼ ndaŋa ndərazhi ɗaŋ, nza gha mbəə nza ka jijihiy hulfə mbəzli ɗaŋ. 4 Njasa niy təfanakən na va miy kaa Abərahaməy, tsəgha kə dzaa təfakənəŋa miy, tsəgha kaa jijihiŋa, ta mbə hiɗi dza ghaa nza ti shi ka ndə səəkə səəkəə nza ka shi gha. Hiɗi ɓanavə Hiyala va kaa Abəraham,» kə. 5 Sa gəzanakə Izakə tsəgha ki na, mbaʼ Zhakubə kafiy ta dzay dzəmbə məlmə Padam Haram, dzakə ghyi tsa Labanə zəghu Betəwel, ndə ka Aram. Labanə tsa vay, zəmbəghəta Rebeka mbəghəshi kar Esaw lə Zhakubə niy nzana.6 Dzəghwa mbaʼ Esaw fəti ghən, a Izakə səkwamtəvay lə Zhakubə ghəciy dzay, mbaʼ makəti va ɓə zha ka Kanahaŋ, mbaʼ ghunay ta ɓə mali ghəci mbə məlmə Padam Haram, 7 mbaʼ Zhakubə ɗiti fəti ta kuma kar diy lə mbəghiy, mbaʼ dzay dzəmbə məlmə va, kə. 8 Sa fəti Esaw ghən ta kuma va tsəgha na, mbaʼ sənay ka təɓanci kuma ghyehi ka Kanahaŋ kaa diy Izakuw, kə. 9 Dza na ki, mbaʼ pəhəti dza ta ɓə nahuti mali, mbaʼ dzaa kəsay Isəmayel zəghu Abəraham, mbaʼ ɓəvə zha və ka mali ci. Mahalatə, kə məndi kaa slən tsa nzə, zhambəghiy Nebayutə.
Shəw tsa Zhakubə
10 Dzəghwa Zhakubə ki, mbaʼ kafiy mbə məlmə Ber-sheba ka dzay dzəmbə məlmə Haram. 11 Ma sa maɗi vici ta pəku na, mbaʼ gariy tə pi tsa pəku vici va və, ta hi ghəci tiɓa. Dza na mbaʼ tivə haku ta fə ghən tsa ci ti, mbaʼ həniy ki. 12 Ma ghəci tə hi ki na, mbaʼ ghati shiw, mbə shiw tsa vay, tsəm tsaa dzəmə gasəkaa nay na, sa kafə na tə hiɗiy, paʼa mə ghumə, dzəghwa Ka kwal Hiyala ka dzəməə dzəmə ghumə tə tsəm tsa va, ka səkwa ghəshi ti diɓa. 13 Nighə na na, Kwa sləkəpə kwa kuma ci, ma kə kaa ngəci na: «Yən na Kwa sləkəpə, Hiyala kar jijiŋa Abəraham lə dəŋa Izakə. Hiɗi həniŋa gha ni ti shiy, ta ndaŋashi dzee, kaa ngəŋa lə kaa jijihiŋa. 14 Ɗaŋ dza jijihiŋaa nza nja hiɗi. Ta yava dza ghuy dza tə hiɗi, njasaa dzəghwa ghumə, lə njasaa dzəvəri mirkwi, lə njasaa dzəghwa həci, lə njasaa dzati muw. Səvəri mbə gha lə səvəri mbə jijihiŋa dzee ta təfə miy kaa hulfəhi mbəzli tə hiɗi gwanashi. 15 Ya kwamaɓa dza ghay, kwasəbə gha dzee nza, ta ndəghuŋa dzee. Ta zhəghəkəŋa dzee dzəti hiɗi nza gha ni ti shi. Ka dzee zlaŋa tepuw, kuma gəzəkee va məniŋay, ta məntəŋa dzee gwanata,» kə.
16 Sa gəzanamti Hiyala kuma va ki na tsəmtsəm Zhakubə fərəghiy. Ma kə na: «Na kataŋ nay a Kwa sləkəpə dzəghwa tə pi tsa, niy sənay yaw,» kə. 17 Mbaʼ hazləni kəsəvə, ma kə na: «Kay, a ndəə hazləni va tsatsa pi, pi tsa nza Hiyala ti dza naa nza. Kwal tsaa dzəmə ghumə na,» kə. 18 Dzəghwa Zhakubə ki pəətə kafiy, laŋ ɓəvə haku tsaa niy fə na va ghən tsa ci ti, dza gəgəɗə gəgəɗəy, mbaʼ ɓaslati in tə ghən ci. 19 Dzəghwa na mbaʼ fanati slən «Betel» kaa pi tsa va. Slən Betel tsa vay, «Ghyi tsa Hiyala,» ɗi naa gəzə. Kwataŋay, Luzə niy nza slən tsa məlmə va. 20 Dzəghwa Zhakubə tiɓa ki, mbaʼ gəzəkəvəri kuma mbə miy ci, ma kə na: «War mbaʼ kə Kwa sləkəpə kwasəbee, ka ndəghura mbə dzee na, ka ɓəra shi zəmə lə kubeŋer, 21 zhini mbaʼee zhəghəghəvara kuriŋ dzakə ghyi tsa dirəy, nee Hiyala dza Kwa sləkəpəə nza. 22 Haku tsa gəgəɗəy ya tsa mbaʼee ɓaslati in dzətiy, ghyi tsa Hiyala dza naa nza. Ya nimaɓa shi dza naa ndaray, ta ɓəkəvəri shiy kutiŋ dzee mbə shiy məŋ ta ɓantashi,» kə.