Njasa ngəɗəhu Zhakubə təfə miy
27
Liy hum piyahi ɗaŋ ki na, mbaʼ Izakə niy halantəvay tərəŋu, mbaʼ mətsəhi ci niy ghulfəshi, kala nay pi ghəci ghula. Tə nahuti vici ki na, dza na ka har zəghu ci va dikə tsa: «A Esaw,» kə. «Way didi, avanaɗa» kə zəghu va. 2 Ma kə kaa ngəci na: «Vanay sanay, gwaʼa haliree, sənayee nda hum dzee ta mətiw. 3 Nana kiy, mbala ɓəvə shi ka ghaa dza ta hə sliw li shi, rigi tsa gha, mbaʼ guci tsa nza hevivi gha kwa, a gha dzəti gamba ta hə shiy, nza gha həkəra sliw. 4 Nza gha tatəra njasa kee vaa guraa ɗi, nza gha ɓəkəvəra ta zəmee. Sa kee zəməhuy, nzee təfakənəŋa miy tsee kee gha məti» kə.5 Ghala vəghu tsa gəzə Izakə va kuma va kaa Esauy, cəkeʼ niy favə Rebeka. Ma sa dzay Esaw dzəti gamba ta hə sliw kaa diy ki, 6 ma kə Rebeka kaa tsahuti zəghu nzə va nja Zhakubə na: «Ee favə dəŋa mbə gəzə kuma kaa zəməŋa Izakə, ma kə kaa ngəciy: 7 “Mbala həkəra sliw a gha səəkəə tatəra wəzə, nzee zəməhu, ma nzee təfakənəŋa miy kwa kuma Kwa sləkəpə kee gha məti,” kə kaa ngəci. 8 Sanay zəghu yay, favə kuma dzee na ta gəzəŋa wəzə, nza gha mənti kuma dzee na ta gəzaŋa məni nzə. 9 Mbalaa dzəti pi tsa nza dəmbəkə tsa ghummə a gha dzaa kəəsəkəra deɓiɓir kəli kəli ni bakə, nzee səəkəə tanatishi kaa dəŋa njasa ka naa guraa ɗi məndiy tancishi. 10 Nza gha ɓanavəshi kaa dəŋa, ta zəməshi ghəci, sa ka na zəməhushiy, nza ghəci təfakənəŋa miy ka na gha məti» kə.
11 Ma kə Zhakubə kaa mbəghiy na: «A gha sənay war shiti na vəgha Esaw, na nayay, shiti tə vəgha yaw. 12 Mbaʼ kə dirə dzaa tiɓətəray, ta sənay dza na əə ngəɗee, kə. Ghalaɓa kiy, bəzla na sa dzee kumavəə dzəkən ghən tsee mbərəkiy təfə miy,» kə. 13 Ma kə mbəghiy na: «Kənee kə bəzla va dzaa nza zəghwee, kuma gəzəŋee na pə ghaa fa gwaʼa tsəgha, mbala kəəsəkəra deɓiɓir va,» kə.
14 Dza Zhakubə ki mbaʼ dzaa kəəsəkə deɓiɓir va, mbaʼ hanantishi, mbaʼ ɓanavəshi kaa mbəghiy. Dza mbəghiy ki, mbaʼ tatishi njasa ka diy ɗishi. 15 Dzəghwa mbəghiy va mbaʼ ɓəvə kubeŋeriy niy guranti mbə niy nza və kiy ghyi mbə kubeŋer Esaw, zəghu nzə va dikə tsa. Səəkə na sərə səranakənshi kaa zhakubə, tsa juw tsa zəghu nzə. 16 Dza na mbaʼ caslanati huta ugəə dzəti divədiver ci, mbaʼ dzar tə pi tsa kama shiti ti dzar ta wəri ci. 17 Dza na mbaʼ ɓanavə shi zəmə tati na va, mbaʼ peŋ kaa zəghu nzə va. 18 Dza Zhakubə ki, mbaʼ dzaa kəsay diy. Ma kə kaa ngəci na: «Nziyŋa ki naa di,» kə kaa ngəci. «Yawaa zəghwee, a ndə nza ghaa?» Kə 19 A kə ngəci na: «Yən na yən Esaw, zəghu gha va dikə na, ee mənti kuma gəzara gha va, sati a gha zəmə sliw tsa həkee tsa. Sa ka gha zəməhuy, nza gha təfakənɗa miy tsa gha,» kə. 20 Ma kə Izakə na: «Hum tsəgha kəsati ghaa dzəti sliw kiya zəghwee?» Kə. Ma kə Zhakubə na: «Hiyala kwa sləkəpə gha va ɓəkə naa dzəghwa kumee tsəgha,» kə.
21 Ma kə Izakə kaa Zhakubə ki na: «Kətivaa sar dzəvəghee ee fafəlitəŋa di zəghwee, nzee mbəə sənay nda zəghwee Esaw nza gha kataŋ,» kə. 22 Dza Zhakubə kəətə kəətəghəvay dzəvəgha diy, kə diy baŋ kəsəvə ka fafəli. Ma kə na: «Məliy, sa Zhakubə na, ma divədiver na, shi Esaw,» kə. 23 Niy sənay na Zhakubə na sava kuw, sa nzanay, a shiti niy nza tə divədivi ci nja shi zəmbəghiy Esaw va. Ma ghəci dzaa təfanci miy ki, 24 ma kə kaa ngəci diɓa na: «Esaw zəghwee va nza gha kataŋ kataŋ nanzə na?» Kə. «Yə, yən na,» kə Zhakubə.
25 Ma kə Izakə ki na: «Ndara sliw tsa va zəghwee, ee zəməhu sliw tsa həkə gha, ma nzee təfəŋa miy tsee,» kə. Dzəghwa Zhakubə mbaʼ ɓanavə sliw tsa va, pərəʼ pərəʼ ghəci pərəhu, zhəghwa na mbaʼ ɓanakə tay, saʼ ghəci sahu. 26 Ma kə Izakə, diy kaa ngəci ki na: «Kətivaa sar a gha hutəməvəra kiya zəghwee,» kə. 27 Dzəghwa Zhakubə kəətə kəətəghəvay dzəvəgha, mbaʼ hutəməvə, mbaʼ Izakə favə zən tsa kubeŋer kən ghən ci, nja shi Esaw, dza na ka təfanci miy ki, ma kə na: «Yə kataŋ, zən tsa zəghu yay, nja zən tsa vəhə tsa təfakən Kwa sləkəpə miy kən na.
28 Nza Hiyala ɓəkəŋa miniy səəkə mə ghumə,
mbaʼ ndaŋa veher ləɓə ləɓə ni,
mbaʼ ndaŋa alkamari, mbaʼ tay ɗaŋ.
29 Hulfəhi mbəzli ɗaŋ kə dzaa nza tə dəvə gha,
ka tsəfəku mbəzli tə hiɗi ghənghən ɗaŋ kwa kuma gha.
Gha kə dzaa sləkə ngwarəməhiŋa,
ka tsəfəku ghəshi kwa kuma gha.
Mbaʼ kə ndəə bazlaŋay, bazla bazla kə dzaa nza.
Ma ntsaa dzaa təfəŋa miyiy, lə təfə miy kə dzaa nza kən,» kə.
30 Ma sa kəɗaməti Izakə təfə miy dzəkən Zhakubə ki na, mbaʼ Zhakubə səvəriy dzay. War sa dzay na na, ndəs, Esaw tsahuy səəkə mbə pəla ki. 31 Dza na taʼ taʼ tati shi zəmə wəzə ni kuraku, mbaʼ ɓanakəshi kaa diy. Ma kə kaa ngəci na: «A di, sati a gha zəmə sliw tsa həkəŋee tsa yən zəghu gha, nza gha təfəra miy tsa gha» kə. 32 Ma kə diy na: «A ndə nza ghaa ree?» Kə. «Yən na yən Esaw, zəghu gha va dikə na,» kə.
33 Sa favə Izakə kuma va tsəgha na, mbaʼ her ci slashi, mbaʼ vəgha ci gwanata ghati gurəgurə, ma kə na: «Əy wa tsava ntsaa həkə sliw va mbaʼ səəkəə tatiy ɓəkəra pərɓa ghəci kaa ngəŋa mbaʼee zəməhu shiki? Kaa tsava ndə təfanatee miy tsee, kən dza təfə miy tsee nza,» kə.
34 War sa favə Esaw kuma gəzəkə diy va na, mbaʼ nəfə tsa ci zhanati, mbaʼ ngumata lala zlaŋ zlaŋ. Ka cəʼu diy, ma kə na: «Aya di, təfakənɗa tsee miy kuraku» kə. 35 Ma kə diy na: «A zəməŋa səəkəə ngəɗitəra, mbaʼee təfanakən miy tsaa niy dzee ta təfəə dzəkən gha,» kə. 36 Ma kə Esaw na: «Zhakubə, kə məndi kaa slən tsa ci, ɗi naa gəziy, ndə ngəɗipə, kataŋ naa ndə ngəɗipə. Vanay kwa baka səɗa na mbə ngəɗira sana. Kwa taŋay, mbaʼ ngəɗəhu dikə tsa mənee dzəkən, zhini sana ɓa na, mbaʼ ngəɗəhu təfə miy tsaa niy dza məndiy təfəra,» kə Esaw. Zhini ma kə kaa diy na: «Tərəmbə təfə miy va gha gar təfakənɗa gha saa di?» Kə. 37 Ma kə Izakə kaa ngəci na: «Ghəci dza naa sləkəŋa, ka sləni ci dza ngwarəmbəghiy nza gwanashi, ka dza naa tərəhashi kar alkamari lə tayəw, pən kaa miy tsa təfanakənee. Shi dzee mbay məntəŋa tiɓa ghula nee kiw zəghu yaw,» kə. 38 War ə Esaw mbaɗə, ma kə na: «War kutiŋiy na təfə miy kwa miy tsa gha shəkəna di na? Ə pə gha təfətəra tsee miy kuraku,» kə, ka wahə ghəci zlaŋ zlaŋ. 39 Ma kə diy kaa ngəci ki na:
«Kərakə dza nziy tsa ghaa nza lə vəhə tsaa ləɓəy,
ka dza miniy səəkə mə ghuməə nza tə pi tsa dza ghaa nzaw.
40 Lə mbəzə dza ghaa pəla hur tsa gha,
Tə dəvə zəməŋa dza ghaa nza. Nanzə kiy,
ta zləghuhu ghən tsa gha dza gha.
Zəku tsa dza naa səraghwa kwa wəri ghay, ta ɓəəlivəri dza gha,
mbaʼ gha ndəghanti,» kə.
Njasa huy Zhakubə dzəvəgha Kusəkiy
41 Dzəghwa Esaw ki, mbaʼ fati jakaa dzəti Zhakubə tə mbərkə təfə miy tsa təfanakən diy va. Ma kə niy ni mbə nəfə ci ki na: «Ndal tərə dirə ta mətiw, sa ka na mətiyiy, ta pəəsliti zəmərə Zhakubə dzee,» kə niy ni. 42 Dzəghwa mbaʼ məndi zhananavə kuma gəzəkə Esaw, tsa dikə tsa va zəghu nzə kaa Rebeka. Sa favə na kuma va na, dza na daʼ haray Zhakubə, tsa juw tsa va zəghu nzə. Ma kə kaa ngəci na: «Avanay zəməŋa Esaw ɗi pəəsliŋa, ta wa shi ci tə gha . 43 Sana kiy zəghu yay, favə kuma dzee na ta gəzaŋa, ə pə ghaa kafə, a gha huŋaa dzakə ghyi tsa zəmərə Labanə mbə məlmə Haraŋ, 44 nza gha dzaa nziyayəvaŋa vəgha, kala dəpəy nəfə tsa zəməŋa. 45 Ma sa ka zəməŋa zlay ɓə nəfəə dzəkən gha, mbaʼ zanti ghən ta kuma mananati gha nay, ma nzee ghunəghəŋa miy nza gha zhikəŋa. Ka ɗee ghuy bakwavəra bəku bakanaŋuy ghuy ndərazhee tə vici kutiŋəw» kə.
46 Ma kə Rebeka kaa Izakə na: «Ka favə nziyee tə hiɗi wəzə va ghyehi ka Hit niw, mbaʼ kə zhakubə dzaa zhiniy ɓəvə mali tikə tə hiɗi ni nja ghəshiy, wəzəɓa kamee tə ghumə dza naa nza,» kə.