Kar Izakə lə Abimelekə
26
Ma geʼi lə tsahuti vəghu na, mbaʼ ma səkwata tə hiɗi nza Izakə va, mbərəkəta naa niy səkwata va ma ghala vəghu tsa Abəraham. Sa səkwata ma va na, dza Izakə mbaʼ dzay dzəmbə məlmə Gerar, tə hiɗi Abimelekə, mazə ka Filisti. 2 Dzəghwa kwa sləkəpə mbaʼ təzlita kaa ngəci. Ma kə kaa ngəci na: «Izakə, ka dza ghaa dzəghwa hiɗi ka Ezhiptə ma, tə hiɗi dzee vaa gəzaŋa pə gha dzaa nziy. 3 Tə hiɗi va pə gha dzaa nziyŋa, kwasəbə gha dzee nza, ta təfətəŋa miy dzee, sa nzanay, kaa ngəŋa lə kaa jijihiŋa tarəkee ɓə hidi va gwanashi. Ta way, ta mbee mananati kumaa niy gəzəkee va mananci kaa dəŋa Abəraham. 4 Ta yati jijihiŋa dzee ɗaŋ tərəŋu nja sasərkuhi tə ghumə, ta ɓanavəshi hiɗi ni dzee gwanashi kaa ngəshi. Səvəri mbə shi dzee ta təfanshi miy kaa hulfəhi mbəzli tə hiɗi gwanashi. 5 Sa nzana mbaʼ Abəraham niy fa kuma viya, ka ɗi fəti ta kuma gəzanakee, ka nuw kuma pəhanatee ta məni ghəci, ka garə tə kuma garəɗee, ka nuw kuma ɓanancee, va tsəgha dzee ta məni kuma va tsəgha,» kə Kwa sləkəpə kaa ngəci.6 Dzəghwa Izakə ki, mbaʼ nziyiy lə ghyi tsa ci mbə məlmə Gerar. 7 Dzəghwa mbəzli mbə məlmə va ka ɗuw kuma vəə dzəkən mali ci. «Zhamərə na,» kə kaa ngəshi. Niy ɗi naa gəzanshi, mali ci na Rebeka kuw. Sa nzanay mbə hazləni niy nza na əntaa ghəshi pəəsliti ta mali va, sa nzana mali kiyas tərəŋu ghənzə niy nza.
8 A Izakə niy hyayvay tə hiɗi va ki. Ma tə nahuti vici sa nə Abimelekə mazə ka Filisti səvəri kwa mergi kəɗaŋ kə na, kar mətsə ci tə kar Izakə mbə gəlakə ghəshi lə mali ci Rebeka. 9 Ma sa nashi na tsəgha na, mbaʼ ghunashi mbəzli ta har Izakə. A kə kaa ngəci sa səəkiy na na: «Mali vay, mali gha na ya njaaɓa, ta wa niy nə gha zhaməŋa na, pə ghaa?» Kə. Ma kə Izakə na: «Waa ə niy hazlənee va nəghətaa məndi paslantəra ti, va tsəgha niy gəzee kuma va tsəgha,» kə. 10 Ma kə Abimelekə na: «Shi ka wa na shi məntəŋiy gha vaa? Jəw niy dza ntsa tə hiɗee ɓəhu mali gha na, ka gha nighiy, gha fambəŋiy mbə kuma jikir na nza,» kə.
11 Liy hum kuma va ki, ma kə Abimelekə kaa mbəzli tə hiɗi ci gwanashi na: «Favə tə ghuy, ya wa ntsaa dzaa ndəŋway ndə ta kar zal tsa lə mali ci nay, ta paslanti tsava ndə dza məndi,» kə.
12 Dzəghwa Izakə tə piya va mbaʼ zati shiy tə hiɗi va, mbaʼ mənikəshi tərəŋu dalala, sa nzana mbə təfə miy Kwa sləkəpə niy nzaa dzəkən. 13 War a shiy mətsəhəva və, mbaʼ məniy ka ndə shiy tsa tərəŋu tsa ki. 14 Ɗaŋ tərəŋu niy nza təŋkesli və, tsəgha kwiy, tsəgha slay. Ɗaŋ ka sləni niy nza və diɓa.
Həərəva lə sla kiri kwa jipə kar Izakə lə Abimelekə
Sa nighəti ka Filisti Izakə məniy ka ndə shiy tsa tərəŋu tsa ki na, mbaʼ hərhə ʼwati mananshi və. 15 Ghala vəghu tsaa nza Abəraham diy Izakə tə ghumiyəy, a mbəzliy ghəranci sləni niy lanati yam. Dzəghwa ka Filisti va ki njəfə njəfə ghəshi njənjəfay yam va gwanashi lə hiɗi. 16 Ma kə Abimelekə kaa Izakə ki na: «Ghay, a gha məniŋa, tərəŋuɓa va gha na bərci kaa ngəŋiy, ə pə gha ɓarəvaŋa mbə ghiy,» kə.
17 Sa gəzəkə Abimelekə tsəgha ki na, dzəghwa Izakə mbaʼ kafiy tiɓa, mbaʼ dzaa nziyiy lə ghyi tsa ci dzati kwa pi tsa har məndi vaa teʼu pi tsa Gerar. 18 Dza na mbaʼ papakəmə hiɗi kwa yaməə niy lalati məndi va ghala Abəraham diy tə ghumiy. Sa nzana mbaʼ ka Filisti niy njənjəfayshi, liy hum sa niy mətiy Abəraham. Dza na mbaʼ zhiniy fafanatishi sləneɗemeriy niy fanatishi diy va.
19 Dzəghwa mbəzliy ghəra sləni kaa Izakə tə nahuti vici mbaʼ ghəshi lati yam dzati kwa teʼu pi tsa va, mbaʼ ghəshi kəsati tə mətsə yam. 20 Dzəghwa ka ndəghu shiy mbə məlmə Gerar ka məni miy lə ka ndəghu shiy kaa Izakə. Sa nə ka Gerar: «Shi ghiy na yam va,» kə ghəshi. Ma sa nighəti Izakə tsəgha ki na, mbaʼ fanati slən Esekə kaa yam va, ɗi naa gəziy: «məni miy», sa nzana mbaʼ mbəzli va niy pəlati miy ti, ta yam va. 21 Dzəghwa ka sləni Izakə mbaʼ a ghəshi zhiniy lavə nihuti yam diɓa. Zhini paʼi miy məniy ti shi. Dzəghwa Izakə, mbaʼ fanatishi slən «Shitəna» kaa niva yam ɓa, ɗi naa gəziy: «Həərəva». 22 Dza na mbaʼ kafiy tiɓa, mbaʼ dzaa lati kwa mahəkana yam. Ma niva ki na, kala həərəva məndi ti shi. «Rehubutə» kə kaa slən tsa ni va yam. Ɗi naa gəziy: «Mətsəhə ngula buŋ». Ma kə niy ni kaa kuma gəzə nay: «Nanay, a Kwa sləkəpə zlayŋəy kwal ta gura ghən tsa ghiy, ta mbə ghiy dza kwa kuma kwa kuma tə hiɗi ni,» kə niy ni.
23 Dza na diɓa, mbaʼ kafiy tiɓa, mbaʼ dzaa nziyiy tə pi tsa har məndi vaa Ber-sheba. 24 Ma tə virəɗi tsəhə na va na, dza Kwa sləkəpə mbaʼ təzlita kaa ngəci. Ma kə kaa ngəci na: «Yən na Hiyala dəŋa Abəraham, ka hazləni gha ma, kwasəbə gha nzee, ta təfətəŋa miy dzee, ta yati jijihiŋa dzee ɗaŋ, tə mbərkə Abəraham ndə sləni tsee,» kə. 25 Dzəghwa Izakə mbaʼ ngati pi ta ta Hiyala tə pi tsa va, mbaʼ cəwʼəti Kwa sləkəpə, ka har lə slən tsa nzə. Dzəghwa na mbaʼ liy ceker gamtaʼwalhi ci tiɓa, dza ka sləni ci mbaʼ ghəshi lavə nihuti yam tiɓa diɓa.
26 Dzəghwa Abimelekə mbaʼ kafiy mbə məlmə Gerar ghəshi lə Ahuzatə madigay, mbaʼ Pikul, dikə tsa ka sawji ci, mbaʼ ghəshi səəkəə kəsay Izakə 27 Ma kə Izakə kaa ngəshi na: «Ya sa nzana kala ɗi kumee ghuy, mbaʼ ghuy təhantəra tə hiɗi ghuy kiy, tawa zhini ghuy səəkə viya diɓaa?» Kə kaa ngəshi. 28 Ma kə ghəshi kaa ngəci na: «Sa nighəti ghiyəy, kwasəbə gha na kwa sləkəpə, va tsəgha ɗi ghiy məni madiga tsa wəzə tsa lə gha, zəməʼ kaa fəla. Ghənzə tsəgha kiy, slati kiri ghummə kwa jipə ghummə. 29 Zəməkəŋəy fəla: «Ka dzee məniŋuy kuma jikir naw,» pə gha. Sa nzanay, ghiy kuraku na, niy saŋa ngəraʼu ghiy ghala pi tsaa niy nza gha mbə ghiyuw. kuma wəzə na niy məniŋa ghiy, lə zərkə niy zlaŋa ghiy dzaŋa mbə ghiy. Sanay, ntsa təfanakən Kwa sləkəpə miy nza gha,» kə ghəshi. 30 Liy hum ki na, dzəghwa Izakə mbaʼ tanatishi shiy, zəmə ghəshi zəməhu shiy, saʼ kaa shiy, hi ghəshi. 31 Ma həzlimə tə kəɗi pi ki na, pəətə ghəshi kafəshi, mbaʼ ghəshi zəməkə fəla kwa jipə shi, ta nuw kuma gəzəkə ghəshi. Dza Izakə mbaʼ zlashiy dzashi. «Nza ghuy nza,» kə kaa ngəshi. Mbaʼ ghəshi təhəvərivashi lə wəzə.
32 Fəcavata ki na, mbaʼ ka sləni Izakə səəkəə kəsay, ta gəzanci kumaa dzəkən yaməə niy la ghəshi: «A ghiy kəsati tə yam,» kə ghəshi kaa ngəci. 33 Dzəghwa Izakə mbaʼ fanati slən «Sheba» kaa yam va, ɗi naa gəziy «Fəla». Va tsəgha har məndi məlmə vaa «Ber-sheba» paʼa sana. Ɗi naa gəziy, «Yam fəla».
Miʼi Esaw