kumaa dzəkən məti Abəraham lə dzəkən nihuti ndərazhi ci
25
Dzəghwa Abəraham mbaʼ ɓəvə nahuti mali, Ketəwra, kə məndi kaa slən tsa nzə 2 Mbaʼ mali va yanakə ndərazhi, kar Zimran mbaʼ Yukəsan, mbaʼ Medan, mbaʼ, Madiyaŋ, mbaʼ Yishəbakə, mbaʼ Shuwah. 3 Dzəghwa Yukəsan, mbaʼ yakə kar Saba lə Dedaŋ, jijihiy Dedaŋ niy nza hulfə ka Ashur lə hulfə ka Letush mbaʼ hulfə ka Lewum. 4 Dzəghwa Madian, mbaʼ yakə kar Eyfa, mbaʼ Efer, mbaʼ Hanuk, mbaʼ Avida, mbaʼ Eləda. Mbəzli va gwanashiy, səvəri mbə Ketəwra niy səvəri ghəshi.5 Dzəghwa Abəraham ki, mbaʼ zlatanavə shiy niy nza və gwanashi kaa Izakə 6 A Abəraham niy ɓaɓanavəshi shiy kaa nihuti ndərazhiy niy yakə na va kwa nihuti miʼi tar bəla. Ghəci ghulay tə ghumiyəy, mbaʼ niy gəzanshi dzashiy dzəti nihuti hiɗi kwa ghumə, ta nza ghəshi kərakə lə zəghu ci Izakə.
Məti Abəraham
7 Piya bələku mbaʼ mbərfəŋəmətsəkə cifəti niy mənti Abəraham tə hiɗi. 8 Təruŋ niy hiy na tə hiɗi, tə wahə niy nza na mbə hali ci. Dzəghwa na ki mbaʼ mətiy, mbaʼ dzaa kəsashi jijihiy kwa hiɗi 9 Dzəghwa ki, mbaʼ ndərazhi ci, kar Izakə lə Isəmayel dzaa lanti mbə ləgu Makəpela, tə vəhə tsa Efəruŋ zəghu Səwar ndə ka Hit. Vəgha Maməre niy nza pi tsa va. 10 Va jijihiy Hetə niy pavə Abəraham vəhə tsa va. Ti niy Lantim kar Abəraham lə mali ci Sara. 11 Liy hum sa mə mətiy Abərahaməy, dzəghwa Hiyala mbaʼ təfanati miy kaa zəghu ci Izakə. Vəgha yam nə məndi va, Lahay-Ruy, kə məndi niy nza na lə ghyi tsa ci.
Hulfə Isəmayel zəghu Abəraham
12 Avanta hulfə Isəmayel zəghu Abəraham va niy yanakə Agar zha ka Ezhiptə, mava tsa Sara va: 13 Avanashi sləneɗemer ndərazhi Isəmayel njasa nuwva ghəshi: Nebayutə niy nza kwa taŋa zəghu ci, ka nuw Kedar, mbaʼ Adəbel, mbaʼ Mivəsam, 14 mbaʼ Mishəma, mbaʼ Dəwma, mbaʼ Masa, 15 mbaʼ Hadadə, mbaʼ Tema, mbaʼ Yətəwr, mbaʼ Nafishə, mbaʼ Kedəma. 16 Ava tsəgha niy nza ndərazhi Isəmayel, məŋ lə bakə niy nza ghəshi. Ya wa ndə mbə shiy, takə kutiŋ niy sləkə na. Ya wa ndə diɓa na, mbaʼ fanati slən tsa ci kaa məlmə lati na, tsəgha pi tsa ka naa nziyiy ti, lə dəmbəkə ta ci. 17 Piya bələku mbaʼ mahəkanə mətsəkə mbərəfəŋti niy mənti Isəmayel tə hiɗi, liy hum ki na, mbaʼ mətiy, mbaʼ dzaa kəsashi jijihiy kwa hiɗi. 18 Kwa jipə hiɗi Havila lə hiɗi Shur niy nza jijihiy Isəmayel lə nziy tsa shi. Shurəy, vəgha Ezhiptə niy nzana, njasaa dzəti hiɗi Ashur. Kərakə niy nziyshi ghəshi lə ni gwanashi ni jijihiy Abəraham.
ZHAKWƏBƏ
Rebeka yakə kar Esaw lə Zhakubə
19 Avanata kumaa dzəkən hulfə Izakə.
Izakə tsa vay, zəghu Abəraham niy nza na. 20 Sa niy mənti na piya faɗəmətsəkiy, dzəghwa na mbaʼ ɓəvə mali, Rebeka, kə məndi kaa slən tsa nzə. Zhambəghiy Labanə ndə ka Aram niy nza na. Betəwel ndə ka Aram niy nza dəta, mbə məlmə Padam-Haram niy nza na lə nziy tsa ci. 21 Rebeka va ki na, jəŋa ghənzə niy nza. Dzəghwa mbaʼ Izakə wahəniy wahə ci kaa Kwa sləkəpə ta kuma kən mali ci va, mbaʼ Kwa sləkəpə favə wahə ci va, mbaʼ Rebeka ɓəvə hur. 22 Bakə niy nza ndərazhi kwa hur nzə. Dza ghəshi ka tsəkuva kwa hur nzə. Sa favə Rebeka tsəgha, ma kə na: «Tsəgha kə kuma nay, tawa mawee ɓə tsatsa huraa?» Kə. Dza na mbaʼ dzata ta ɗuw kumaa dzəkən kuma va va Kwa sləkəpə. 23 Ma kə Kwa sləkəpə kaa ngəta na:
«Hulfə mbəzli bakə na shi kwa hur tsa gha.
Hulfə mbəzli bakə ghənghən ghənghən dza gha ta yakə.
Təruŋəɓa va nahuti hulfə dza bərciy nza kaa nahuti.
Ndə ghəra sləni kaa tsa juw tsa dza tsa dikə tsaa nza» kə.
24 Ma sa səəkiy vəghu tsa dza Rebeka ta ya ti ki na, mbaʼ yakə ʼihuhur kataŋ. 25 Tsaa gha səkway, ghəuy niy nza na, war shiti vəgha ci nja huta saa dza səɗa. Dzəghwa mbaʼ məndi fanati slən Esaw. 26 Sa maɗi zəmbəghiy ta səkwa na, mbaʼ kəsəvə Esaw tə tatəl səɗa ci, mbaʼ məndi fanati slən Zhakubə. Ghala vəghu tsaa ya Izakə ndərazhi vay, kwaŋəmətsəkə niy nza piya ci.
Njasa ɗəlanti Esaw dikə tsa ci kaa Zhakubə
27 Dzəghwa ndərazhi va ki mbaʼ ghəshi kəlishi, mbaʼ Esaw məniy ka ndə hə sliw tsa tərəŋu tsa, war dzar mbə gamba ghəci niy ɗi ta hə sliw. Ma Zhakubə na ci ki na ndə guŋəy, ndə ɗi nziy kiy ghyi ghəci niy nza. 28 Təruŋəɓa kuma Esaw niy ɗi Izakə sa nzana tərəŋu ghəci niy ɗi sliw. Ma Rebeka na, tərəŋuɓa kuma Zhakubə ghənzə niy ɗi.
29 Tə nahuti viciy, ava Zhakubə mbə ta shi zəmə ci, mbaʼ Esaw səəkiy mbə pəla, kupə tay va dali. 30 Ma kə kaa Zhakubə na: «Ka mbee va daliw, kadiw ee huɓəvə er gha ni ghəwə ni» kə. Va tsəgha niy fanati məndi slən Edum kaa Esaw. Edum tsa vay, ghəwə ɗi naa gəzə. 31 Ma kə Zhakubə kaa ngəci na: «Mbaʼ pə ghaa ɗi zəməshiy, ɗəlavəra dikə tsa nza gha va kənee tə shi zəmə va,» kə. 32 Ma kə Esaw na : «Ka mətee va ma na, a shi dza dikə tsa mənee kən ghaa məntəraa?» Kə. 33 Ma kə Zhakubə na: «Zəməkə pərɓa fəla» kə. Dzəghwa Esaw hwaʼ zəməkə fəla, «yən kala dzaa mbaravəŋa məni zəməmə tsa dikə tsa,» kə. 34 Sa zəməkə na fəla ki na, dzəghwa Zhakubə mbaʼ ɓanavə er va, mbaʼ peŋ ki. Zəməʼ zəməʼ Esaw zəməhushi, saʼ sahu shi sa, ka dzay. Nay məni zəməmə tsa dikə tsa na nja shiy na na ciw.