kumaa dzəkən məti Sara lə kuli nzə
23
Piya bələku mbaʼ bakəmətsəkə mbərfəŋəti ghən kən niy nza piya mənəhu Sara tə hiɗi. 2 Liy hum ki na mbaʼ mətita mbə məlmə Kiriyatə Arəba. Ghənzə na məlmə har məndi vaa Ebəruŋ diɓa, tə hiɗi ka Kanahaŋ niy nza na. Sa mətita mali Abəraham va ki na, mbaʼ təhwananti, mbaʼ wahəhu. 3 Liy hum ki na, mbaʼ kafiy tə pi tsa nza mbəri tsa mali ci va, mbaʼ dzaa kəsashi ndərazhi Hetə. 4 Ma kə kaa ngəshi na: «A mbəzlee, ndə səəkə səəkə nzee mbə ghuy tikə, ndə məlmə tsa ghuy nzee. Malee mətita na, va tsəgha səəkee a ghuy ɗəlavəra pi ta la mbəri tsa va,» kə. 5 Ma kə ndərazhi Hetə kaa ngəci na: 6 «Zləɓavə fa kuma dza ghiy na ta gəzəŋa ntsa ghiy dikə tsa. Ghay, a Hiyala məntəŋa ka ntsa nza dimə ti mbə jipə ghiy. Mbala la mali gha va kwa naa guranti mbə kulihi ghiy. Ndə mbə ghiy dzaa intəŋa tə kuli ci ta la mali ghaw,» kə ghəshi.7 Dzəghwa Abəraham mbaʼ kafiy, gələɓə gələɓəy kwa kuma ndərazhi Hetə. Ghəshi niy nza mbəzli tə hiɗi va. 8 Ma kə kaa ngəshi na: «Lə kataŋ pə ghuy zləɓavə yən la malee tikiy, əə cəʼuŋuyee a ghuy dzaa cəʼura Efəruŋ zəghu Səwar 9 a ghəci ɗəlavəra ləgu ci va tə pi tsa har məndi vaa Makəpəla. Tə miy za ci na ləgu va. Nza ghəci sliy gəna geʼi geʼi tə ləgu va tikə kwa kuma ghuy, nzee wanati, ma nza tsee pi kuli nza vəya mbə jipə ghuy,» kə. 10 Ghala pi tsa gəzə Abəraham va kuma vay, tiɓa niy nza Efəruŋ ndə ka Hit mənziy mbə jipə ndərazhi Hetə va. Sa favə na kuma gəzəkə Abəraham va, ma kə kaa ngəci, ka favə ndərazhi Hetə va gwanashi niy nza mənziy miy dəghaa dzəmbə məlmə na: 11 «Titihu zləɓavə fa kuma dzee na ta gəzəŋa, zee va lə ləgu mbə va gwaʼay, ka ɗələŋashee ɗəl ɗələw. Avee ndaŋashi təgəm, kwa kuma ngwardəhira ni. Mbala la mali gha mbə ləgu va,» kə.
12 Zhini Abəraham diɓa gələɓə gələɓəy kwa kuma mbəzli tə hiɗi va va. 13 Ma kə kaa Efəruŋ ka favə mbəzli gwanashi na: «Əə cəʼuŋee, mbaʼ pə gha gar favəray, ta watəŋa gəna dzee tə za va. Ə ɗee ghaa zləɓavə ɓə gəna va, nzee mbəə la malee va mbə ləgu va,» kə. 14 Ma kə Efəruŋ na: 15 «Zləɓavə kuma dzee na ta gəzəŋa ntsee dikə tsa, vəhə gar pa məndi tə gəna kwa tsahi bələku bələku faɗəy, shiy na ni va shiy kwa jipə tsee lə ghaw. Ə pə ghaa dza ta la mali gha mbə ləgu va,» kə.
16 Dza kar Abəraham lə Efəruŋ ki, mbaʼ ghəshi sləkati, mbaʼ Abəraham ɓanavə gəna kwa tsahi bələku bələku faɗə, njasaa niy gəzəkə na va kwa kuma ndərazhi Hetə. Gənaa niy ghəra məndi sləni tə ləwma li na saa niy ɓanavə na va. 17 Ava tsəgha pahu Abəraham vəhə tsa Efəruŋ va tə gamba Makəpela, njasaa dzəghwa ghumə va məlmə Maməre. Vəhə tsa va paʼa tə pi tsa kəray na lə ləgu mbə mbaʼ fəhi tiy, 18 mbaʼ ghəshi zhəghəshi ka shi Abəraham. Kwa kuma ndərazhi Hetə va niy nza tiɓa gwanashi miy dəghaa dzəmbə məlmə niy məniva səkəm tsa va.
19 Liy hum sa mananti ghəshi səkəm ki na, mbaʼ Abəraham dzaa lanti mali ci Sara mbə ləgu tə vəhə tsa tə gamba Makəpela va, vəgha məlmə Maməre, sa har məndi vaa Ebəruŋ, tə hiɗi ka Kanahaŋ. 20 Vəhə tsa va lə ləgu va gwaʼa ki na, mbaʼ ghəshi zhəghəshi ka shi Abəraham, nza ghəci la mbəzliy dzaa bekushi və tiɓa. Mbaʼ ndərazhi Hetə zləɓavə, kala ghəshi dzar kwa tsa va vəhə ghula.