Abəraham zləɓavə slanci Izakə kaa Hiyala
22
Liy hum shi va ki, dza Hiyala mbaʼ naghata kuma Abəraham. «A Abəraham,» kə. «Way, mbə faŋa nzee,» kə Abəraham. 2 Ma kə Hiyala ki na: «Pəməvə Izakə, zəkuti tsa gha va ɗi gha tərəŋu tsa. Mbala liy dzəti hiɗi Muriya, sa ka gha tsəhəŋay, nza gha dzaa sliyra zəghu vaa, ta tara mə ghən dəlagwa dzee vaa citəŋa,» kə.3 Ma tə həzlimə ki na, pəətə Abəraham kafiy, mbaʼ pəraʼuvə shighu dza na ta ta Hiyala li shi, pəhə pəhatishi tə kwantəmca ci. Dza na pəmə pəməvə zəghu ci Izakə, mbaʼ nihuti ka sləni ci bakə kwasəbə, ka dzay dzəti pi tsa gəzanci Hiyala va. 4 Ma tə kwa mahəkana vici shi mbə dza, sa nə Abəraham kafə kə kaa kuma ci na, mbaʼ nay Pətsa dza ghəshi vaa dzəti ʼwati pəəzli kərakə. 5 Ma kə kaa ka sləni ci bakə ni va ki na: «Nzəyŋuyim tikə lə kwantəmca na, a ghiy dzəmə dəlagwa va ta tsəfəku kwa kuma Hiyala ghiy lə zəghwee na, nza ghiy səəkəə kəsaŋuy tikə,» kə.
6 Dza na mbaʼ fanaghwa shighu dza ghəshi va ta ta Hiyala li shi kaa zəghu ci Izakə, ma ghəci na, mbaʼ ɓəvə laɗi ghu, mbaʼ hwa. Kə ghəshi ka dzashi bakəshi. 7 Ma ghəshi mbə kwal ki, ma kə Izakə kaa diy Abəraham na: «A pəniy diy,» kə. «Əəŋ», kə Abəraham. «Ya sa nza na mbaʼ ghum ɓəvə kar shighu lə ghu kiy, kuma na zəghu təmbəkə tsa dza ghum ta ta Hiyala li na cia?» Kə Izakə. 8 Ma kə Abəraham kaa ngəci na: «A zəghwee, a Hiyala dzaa gumati mbaʼ pəlavəm zəghu təmbəkə tsa dza ghum ndanta dəʼu ghən tsa nzə,» kə.
War ə ghəshiy nuw lə kwal tsa shi. 9 Ma sa tsəhəshi ghəshi tə pi tsa cinti Hiyala va ki na, dza Abəraham nga ngati pi tsa ka məndiy ta Hiyala ti, mbaʼ sləkati shighu ti. Dza na baŋ kəsəvə zəghu ci Izakə, mbaʼ pəhəti, zlaŋəl zlaŋəlati tə shighu va. 10 Dza na ki, laŋ ɓəvə hwa, mbaʼ kafata dəvə ci ta sla zəghu ci va. 11 Fa na na, Ndə kwal tsa Kwa sləkəpə mbə har səəkə mə ghumə: «Abəraham, Abəraham,» kə. «Way, mbə faŋa nzee,» kə Abəraham. 12 Ma kə na: «Ka dapə dəvə gha ghaa dzəti zəghu va ma, ka mananci gha ya waɓa ma. Kwa vəghu tsa nzana mbaʼ gha zləɓavə slara zəkuti tsa ghay, ee sənay nana, a ghaa hazləni va Hiyala kataŋ pən,» kə.
13 Tsaʼ kə Abəraham ki na, mbaʼ nata gamə tiɓa, ghəzli ghəzli tə təlimə, mbə zhəghu. Dza na ki, mbaʼ dzaa kəsəvəə sliy, mbaʼ ndanti kaa Hiyala kwa pi tsa zəghu ci va. 14 Dza Abəraham mbaʼ fanati slən kaa pi tsa va, a kə kaa har ci na: «A Kwa sləkəpə dzaa gumati,» kə. Va tsəgha ka məndiy ni paʼa ndatsə: «A Kwa sləkəpə dzaa gumati mə dəlagwa,» kə məndiy ni.
15 Dzəghwa Ndə kwal tsa Kwa sləkəpə mbaʼ zhiniy haray Abəraham kwa baka səɗa səəkə mə ghumə. 16 Ma kə kaa ngəci na: «Ma kə Kwa sləkəpiy, njana nzana mbaʼ gha mənti tsəgha, kala zhini ghən ghaa dzəkən zəkuti tsa gha vay, yən na yən Hiyala, avee zəməkəŋa fəla lə ghən tsee. 17 Ta təfətəŋa miy dzee, nza jijihiŋa yashi ɗaŋ nja sasərkuhi tə ghumə, ya nja ndarghə kwa həl. Ta zlighuhu məlməhi ka mbəzə shi dza jijihiŋa. 18 Tə mbərkə sa ɗiti gha tsa fəti vəyay, səvəri mbə jijihiŋa va dzee ta təfanshi miy kaa hulfəhi mbəzli tə hiɗi gwanashi,» kə. 19 Liy hum ki na, mbaʼ kar Abəraham lə Izakə zhəghəkəvashiy zhivəgha ka sləni va, kə ghəshi kafə ghəshi kafəshi ka zhashiy dzəti hiɗi Batəsheba. Mbaʼ dzaa nziyiy tiɓa lə ghyi tsa ci.
Ndərazhi Nahur zəmbəghiy Abəraham
20 Liy hum shi va ki na, mbaʼ məndi gəzanci kaa Abəraham: «A Miləka yanakə ndərazhi kuraku kaa zəməŋa Nahur. 21 Kwa taŋa zəghuy, ʼWəsə na, ka nuw Buzə, mbaʼ Kemuwel diy Aram. 22 Mbaʼ Kesedə, mbaʼ Hazu, mbaʼ Pilədashə, mbaʼ Yidəlafə, mbaʼ Betəwel,» kə məndi. 23 Ava tsəgha na ndərazhi yanakə Miləka kaa Nahur zəmbəghiy Abəraham. Dəghəsə niy nza ghəshi. Mbaʼ Betəwel yakə zha, Rebeka, kə məndi niy ni kaa slən tsa nzə. 24 A nahuti mali niy nza va Nahur tar bəla, Rəwma, kə məndi niy ni kaa slən tsa nzə. Aa niy yakə ndərazhi kuraku, kar Teba lə Gaham mbaʼ Tahashə, mbaʼ Maka niy nza ndərazhi nzə.