Sara yakə Izakə
21
Dzəghwa Kwa sləkəpə mbaʼ kəətiti Sara njasa niy gəzəkə na va, mbaʼ mananati kumaa niy gəzəkə na va mananta. 2 Mbaʼ ɓəvə hur, yaʼ yakə zəghu kaa Abəraham ghəci mbə pəhal, geʼi lə vəghu tsaa niy gəzanakə Hiyala va. 3 Dzəghwa Abəraham mbaʼ fanati slən Izakə kaa zəghu yanakə Sara va. 4 Sa mənti na vici dəghəsə na, mbaʼ slananti fəʼyasa njasa niy gəzanakə Hiyala va. 5 Ghala pi tsaa ya məndi va Izakiy, bələku niy nza piya Abəraham. 6 Sa yata Sara ki, ma kə na: «A Hiyala kəətitəra, war ushiy ushee va vəshi. Ya wa ntsaa dzaa favə kuma Izakiy, ta ushi dza na kwasəbee» kə. 7 Ma kə diɓa na: «A ntsaa niy ni kaa Abəraham, ta sahu ʼwa dza ndərazhi kwa hati Sara kəa? Ava ghaa nay yən yanakə zəghu ghəci mbə pəhal sana» kə.Abəraham tahanti kar Agar lə Ismayel
8 Mbaʼ zəghu kəliy, mbaʼ Sara slanti tə ʼwa. Fəca sla məndi tə ʼwa na, mbaʼ Abəraham mənti makwaghwa tərəŋu.
9 Tə nahuti viciy, dza Isəmayel zəghu yanakə Agar mali ka Ezhiptə va kaa Abəraham ka tsaɓana, mbaʼ Sara nay. 10 Ma kə kaa Abəraham na: «Ə pə gha təhanti mava na lə zəghu nzə va, ka zəməvə ghyi zəghu va ghəshi lə zəghwee Izakuw» kə.
11 Təruŋ kuma va Zhanati kaa Abəraham, sa nzanay zəghu ci niy nza Isəmayel kuraku. 12 Ya tsəgha nzə ki, ma kə Hiyala kaa Abəraham na: «A Abəraham, ka sati nəfə tsa gha va kuma kən mava gha va lə zəghu nzə va ma. Ə pə gha zləɓavə məni kuma gəzəkəŋa Sara va gwanata. Sa nzanay, səvəri mbə Izakə dza gha ta ya na gha hulfə. 13 Ma na zəghu mava gha vay, ta yakəvəri hulfə mbəzli dzee səvəri mbə, sa nzanay, zəghu gha na ya ghəci kuraku» kə.
14 Sa gəzəkə Hiyala tsəgha ki na, dza Abəraham tə həzlimə pəətə mekəshi, mbaʼ ɓəvə shi zəmə, mbaʼ yam paf kwa pəhər tsa məntim tə huta, bəm fanatishi tə bazli kaa Agar. Dza pəm, pəmanavə zəghu nzə. «Mbalam», kə kaa ngəta. Sa kafə Agar ki na, ka dzataa dzəmbə gamba Batəsheba, ka dadaŋərə dzar mbə. 15 Sa kəɗishi yam kwa pəhər na, dza Agar mbərəkə zlay zəghu nzə va ta fə jiwu, 16 mbaʼ dzaa nziyta vəri kərakə li, ka wahə. Ə niy ɗima na zəghu nzə vaa məti kwa mətsə nzə, va tsəgha niy katantəvata na vəgha. 17 Dzəghwa mbaʼ Hiyala favə zəghu va mbə wahə ki, dza Ndə kwal tsa Hiyala ka har Agar səəkə mə ghumə, a kə na: «A kumaa kəsaŋa shəkaa Agar, ka hazləni gha ma, a Hiyala favə wahə zəghu va tə pi tsa wahə na va. 18 Sati mbala kəsakati zəghu va, nza gha kəsəvə wəzə wəzə lə dəvə gha, sa nzanay, hulfə mbəzli tərəŋu dzee ta yakəvəri mbə,» kə. 19 Dzəghwa Hiyala ki, mbaʼ canati yam kwa kəʼu. Dza na mbaʼ dzaa gavəshi paf pəhər tsa nzə va, mbaʼ səəkəə sanamiyshi kaa zəghu nzə va.
20 Dzəghwa Hiyala ka ndəghu zəghu va, mbaʼ kəliy. Dza na mbaʼ nziyiy lə ghyi tsa ci mbə gamba. Ndə hə shiy tsa tərəŋu tsa lə rigi niy nzana. 21 Mbə gamba Paran niy nza na lə nziy tsa ci. Sa kəliy na gar ɓə mali ki na, mbaʼ mbəghiy ɓanavə zha ka Ezhiptə.
Kar Abəraham slati kiri lə Abimelekə
22 Geʼi ghala vəghu tsa va ki na, mbaʼ Abimelekə kafiy ghəshi lə Pikul, dikə tsa ka sawji tə hiɗi ci, mbaʼ ghəshi dzaa kəsay Abəraham. Ma kə Abimelekə kaa Abəraham na: «Ya nimaɓa shiy na shi məni ghay, kwasəbə gha ka Hyalaa nza. 23 Njasa məntəŋee va kuma wəzə nay, tsəgha ɗee ghaa məni kuma wəzə na kaa ngəra lə kaa mbəzli nza gha ni tə hiɗi shi. Ka dzee ɗi ghaa ngəɗi ya yən, ya ndərazhee, ya jijihiraw. Kala dza pə ghaa ngəɗiŋəyiy, zəməkəra fəla lə slən tsa Hiyala tikə sana,» kə. 24 «Avee zəməkəŋa fəla,» kə Abəraham.
25 Dzəghwa Abəraham ki, mbaʼ wahəniy wahə ci kaa Abimelekə dzəkən yaməə niy lati na, niy zləghuhu mbəzli ta səɗa Abimelekə və. 26 Ma kə Abimelekə kaa ngəci na: «Sənay ntsaa mənti shi va yaw, ya gha ciy, səəkə ghaa gəzəhura kuma va kurakuw, ndatsə ghee gha favə,» kə. 27 Dzəghwa Abəraham ki, təra təravə teŋkesli lə kwiy mbaʼ slay, mbaʼ kanavəshi kaa Abimelekə. Dza ghəshi ki, mbaʼ ghəshi slati kiri kwa jipə shi. 28 Dza Abəraham mbaʼ təriy deɓiɓir teŋkesli mbərfəŋ vəgha bəla. 29 Ma kə Abimelekə kaa ngəci na: «Tawa təriy gha deɓiɓir teŋkesli mbərfəŋ ni ni vəgha bəla shiki,» kə. 30 Ma kə Abəraham na: «Əə ɗee gha kavə deɓiɓir mbərfəŋ ni ni mbə dəvee, ta mbə məndiy sənay yən lati na yam ni, kə məndi,» kə. 31 Ava va tsəgha fanati məndi slən Batəshebaª kaa pi tsa va, sa nzana tiɓa ghəshi niy zəməkə fəla bakanashi.
32 Dzəghwa ki, mbaʼ ghəshi slati kiri kwa jipə shi tiɓa. Liy hum ki na, mbaʼ Abimelekə kafiy ghəshi lə Pikul dikə tsa ka sawji ci ka zhashi dzəti hiɗi ka Filisti. 33 Dzəghwa Abəraham mbaʼ nguɓiy fə har məndiy Tamaris kwa Batəsheba, mbaʼ cəʼuti Kwa sləkəpə, «A Hyalaa piy kwa ndim ndim,» kə kaa har nzə. 34 A Abəraham niy hiy tərəŋu tə hiɗi ka Filisti.