Kar Abəraham lə Abimelekə
20
Liy hum ki na, mbaʼ Abəraham kafiy tiɓa, ka dzay dzəti hiɗi Negev. Mbaʼ dzaa nziyiy kwa jipi kar məlmə Kadesh lə məlmə Shur. Liy hum ki na, mbaʼ dzaa nziyayəvay mbə məlmə Gerar. 2 Abimelekə niy nza mazə tsa mbə məlmə va ghalaɓa ki. Ma sa niy nə Abəraham kaa mbəzli: «Zhamərə na» kə niy ni kaa mali ci Sara ki na, mbaʼ Abimelekə niy səəkəə ɓəhu, ta nza ghənzə ka mali ci. 3 Dza Hiyala nanzə ki, mbaʼ tsahuta kwa shiw kaa Abimelekə həvir. Ma kə ngəci na: «A mazə Abimelekə, ta məti dza gha tə mbərkə mali ɓəvə gha na, sa nzanay, mali ndə na sava» kə 4 Ghala ɓəvə Abimelekə mali vay, niy səəkə na vəgha diw. Ma kə Abimelekə na :«Ghəy lə mbəzlee kiy kwa sləkəpiy, mənti kuma jikir na ghiyuw, ta bəkuŋiy dza gha ya tsəgha kama fəti va ghiy na? 5 Abəraham tsa va dəʼu ghən tsa ci gəzara na :“Zhamərə na sana” kə. Zhini tsəgha mali va gəzə kuraku: “Zəmərə na” kə. Lə kwal tsa nzə nutee kuma, mənti kuma jikir na yaw» kə.6 Ma kə Hiyala kaa ngəci kwa shiw tsa va na: «Ya yəniy, ee sənay lə kwal tsa nzə nuti gha kuma pən, va tsəgha zlaŋa mee həni lə mali va, va nəghətaa gha dzaa mənti kuma jikir na kwa mətsee. 7 Ghənzə tsəgha kiy, mbala zhananavə mali ntsa va va. Ta cəʼura dza na ta mbə ghaa nza tə ghuməŋa, sa nzanay, Ndə Hiyala na. Kala dza pə ghaa Zhananavə mali ciy, Sənay tə gha, ta bəku dza ghuy, lə mbəzli kiy ghyi tsa gha gwanashi pə gha» kə Hiyala kaa ngəci.
8 Pəətə mekishi mekishi ki na, dza Abimelekə, mbaʼ ɓasəti mbəzliy ghəranci sləni gwanashi, mbaʼ slanakəshi kuma va gwanata, sa favə ghəshi na, mbaʼ her shi dzashi tərəŋu. 9 Dza Abimelekə ki, mbaʼ ghunashi mbəzli, mbaʼ məndi dzaa haranakə Abəraham. Ma kə kaa ngəci na :«Ana Abəraham, shi ka wa na shi məntəŋiy gha vaa? Wa kuma məntəŋee fambəŋiy ghaa dzəmbə kuma jikirkir na lə mbəzli tə hiɗi yaa? Gəla shi məntəra gha niy, kar məndiy mənishiw» kə. 10 Zhini ma kə Abimelekə diɓa na :«Ta njaa niy nə gha ghaa məni gəla shi va nanzəa?» Kə 11 Ma kə Abəraham na :«Niy təkəti yay maziy, ka hazləni mbəzli tikə va Hiyala ya jiwuw, sa ka ghəshi nata malee nay, ta pəəslitəra dza ghəshi ta mali va niy nə ya. 12 Talay, zhadirə na na nava, didi kutiŋ yakəŋəy na li, məmə na sa ghənghən na, va tsəgha ɓəvee ka malee. 13 Ma sa ɓantəra Hiyala kiy ghyi tsa dirə ta dza ta daŋərə ki na, mbaʼee niy gəzanta kaa malee: “ya kuma dza ghum tsəhəmiy maliyay, məntəra tə gha wəzə hur, zəməŋa nzee, pə gha dzaa ni,” pən niy ni kaa ngəta» kə Abəraham.
14 Dzəghwa Abimelekə ki, zhin zhananavə mali ci Sara kaa Abəraham, zhini na kaʼ kanavə teŋkesli, mbaʼ kwiy, mbaʼ slay, zhini pəm kaa meviviy zhər lə niy miʼi gwaʼa. 15 Ma kə kaa ngəci na :«Avee kaʼutəŋa tə hiɗee, dzəghwa tə pi tsa ɗi gha pə ghaa nziy» kə 16 Ma kə kaa Sara na: «Mali, avanaɗa ɓanavə gəna kwa tsahi mbəl kaa zədəŋa kwa kuma gha, ti dza mbəzli ghaa sənay, fəti va gha mbə kuma naw kə ghəshi» kə. 17-18 Tə mbərkə kuma Sara mali Abəraham va kiy, a Kwa sləkəpə niy mənti miʼi kiy ghyi tsa Abimelekə ka jəŋahi, dzəghwa Abəraham ki mbaʼ cəʼuti Hiyala, mbaʼ Hiyala mbəlanti kar Abimelekə lə mali ci, mbaʼ miʼiy ghəra sləni kiy tsa ci, ka ya ndərazhi ghəshi diɓa.