Hiyala ndanti məlmə Sudum, mbaʼ mbəliti Lutə
19
Geʼi lə tihwer ki na, mbaʼ ka kwal Hiyala bakə ni va tsəhəshi mbə Sudum. Tsəhə ghəshi na, Lutə mənziy miy dəghaa dzəmbə məlmə va. War sa nashi na na, fakatsaʼu kafiy ka dza ta kumə li shi. Sa tsəhiy na kwa kuma shi na, gələɓə gələɓəy gaʼa kuma ci mbə hiɗi. 2 Ma kə kaa ngəshi na: «Mbəzlee dikə dikə ni, ə cəʼuŋuyee a ghuy mərshiy tsəhəŋuy kiy ghyi tsee, yən ndə sləni tsa ghuy, mbaʼ ghuy pishi shiɗəshiɗə ghuy, nza ghuy hi kiyɓa. Ma həzlimə mekishiy, nza ghuy kafəə dzaŋuy,» kə. Ma kə ghəshi na: «Kay, nava tiɓaw, dzar tə ngula dza ghiy ta hi,» kə ghəshi. 3 Ya tsəgha nzə ki na, war ə Lutəə mbaɗəshi war ka mbaɗəshi, mbaʼ ghəshi zləɓavə dzakə ghyi tsa ci va ta hi. Sa tsəhəshi ghəshi na, dza Lutə taʼ tanatishi ɗafa, taʼ kaa peŋ tsa kama is mbə. Dzəghwa zəmə zəmə ghəshi zəməhu shi va.
4 Ma sa mənta virɗi, ghəshi ghula ta həni ki na, mbaʼ zhər mbə məlmə Sudum ɓasəkəvashi, dəzlə tsəɓə ghəshi dəzlay ghyi tsa Lutə. Niy tərə ndə ya kutiŋəw, ya ndərazhi, ya pəhepəhiriy, cəkeʼ niy ɓasəkəvashi ghəshi. 5 Dza ghəshi daʼ ghəshi haray Lutə. Ma kə ghəshi kaa ngəci na: «kuma na mbəzliy səəkəshi vaa dzakə ghyi tsa gha məcana hetihweraa? Pəməkəvəriŋəyshi a ghiy həni li shi,» kə ghəshi.
6 Dzəghwa Lutə mbaʼ səvəriy dzəmiy dəgha ci, dislə kalay gəzli liy hum ci. 7 Ma kə kaa ngəshi na: «Titihum mbəzlee, ka məni gəla nava kuma jikir na ghuy ma. 8 Titihum, a ghyehi vəya bakə, shi səəkə ma zal dzar vəgha shi. Kadiwəm ee dzaa pəməkəŋuyshi nza ghuy məni shi ɗi ghuy li shi. Na mbəzli niy, ka mananshi kuma ghuy ma, sa nzanay ka məlmee na ghəshi, ka ɗee kumaa dapashiw,» kə. 9 Ma kə ghəshi kaa ngəci na: «Katantəvaa tiɓa. Ka səəkəŋa səəkə səəkə na, zhini gha saa dzaa ciŋəy kuma tə hiɗi ghiy na. Kadiw a ghiy məntəŋa shiy taŋ kaa niy dza ghiy məni kaa mbəzli va,» kə ghəshi. Dza ghəshi ki tsəku ghəshi tsəkway Lutə lə bərci, kə ghəshi ka dzar dzəmiy gəzli ta irapə. 10 Dzəghwa mbəzli bakə ni va mbaʼ ghəshi səəkəə ghunanti dəgha, baŋ ghəshi kəsəvə Lutə, mbaʼ ghəshi pəməhu dzakə ghyi dzəvəghashi, dislə ghəshi kalay dəgha. 11 Dza ghəshi ki, ghulfə, ghəshi ghuləfay mbəzliy niy nza va miy dəgha va, ni juw juw ni lə ni dikə dikə ni gwaʼa. Shaŋ ghəshi ta nata miy dəghaa dzakə ghyi tsa va ghula.
12 Ma kə mbəzli bakə ni va kaa Lutə ki na: «Mbaʼ kə nihuti mbəzli gha tikiy, pəməkəvərishi mbə məlmə na. Ya wa tsa gha ndə, ya shiŋa na, ya ndərazhiy zhər gha na ghəshi, ya ghyehi ghay, cəkeʼ pə gha pəməkəvərishi mbə məlmə na. 13 Ta zanti məlmə na dza ghiy, sa nzanay, tərəŋu tsəhəta wahə va Kwa sləkəpə dzəkən jikir tsa məni mbəzli mbə məlmə na, va tsəgha ghunaŋəy na ta zantishi,» kə ghəshi. 14 Dza Lutə ki, mbaʼ səvəriy dzaa kəsashi mbəzliy mə ghyehi ci. Ma kə kaa ngəshi na: «Divam, a ghuy ɓarvaŋuy mbə məlmə na, sa nzanay, ta zanti məlmə na dza Kwa sləkəpə,» kə kaa ngəshi. Ma mbəzli va nashi ki na, nja kuma tsaɓana ghəshi ɓəti kuma va.
15 Ma sa maɗi pi ta məni pay ki na, war ə ka kwal Hiyala vaa mbatsə Lutə ta dzay ghəci. A kə ghəshi kaa ngəci na: «Kafə lə mali gha, mbaʼ ghyehi gha ni bakə ni, kala tsəghay, ta bəkuŋuy dza ghuy kwasəbə mbəzli mbə məlmə na ni, sa ka məndi ɓasanshi nguvə tə mbərkə jikir tsa shi,» kə ghəshi. 16 Sa məni Lutə dadaʼi dadaʼi ki na, dza mbəzli va baŋ baŋ ghəshi kəkəsəvə shi lə mali ci mbaʼ ghyehi ci va bakə ni tə divədivi shi. Dza ghəshi mbaʼ ghəshi mbambahəkəvərishi mbə məlmə va, sa nzanay, a hur tsa Kwa sləkəpə niy zhanta ta Lutə.
17 Ma sa mbahəkəvəri ghəshi Lutə mbə məlmə ki, ma kə tsahuti mbə shi kaa ngəci na: «Ə pə ghaa huŋa gha kala ɗi piy tsa ghaa zay. Əntaa gha nighə pi tsa liy Hum ma, əntaa gha kəslimbə ghən kwa kwal ma. Mbala mbəŋa dzar mbə kəlaŋ gha kəə ɗi mbəli piy tsa gha,» kə. 18 Ma kə Lutə ngəci na: «Aw ntsee dikə tsaw, ka mənta na tsəghaw. 19 Na navay, a gha məntəra wəzə hur, mbaʼ gha kəətitəra tərəŋu tə sa mbəlantəra gha piy tsee. Ya tsəgha nzə kiy, ka dzee mbay huraa dzəmbə kəlaŋ kala dza ngəraʼu tsa vaa kəsara mbə kwal mbaʼee mətiraw. 20 Məlmə tikə na ndəku nay, ee dzaa huraa dzəmbə. Ndara kwal ee dzaa mbəra mbəɓa njana nzana məlmə juw tsətsə ghənzə ta mbee mbəlira,» kə. 21 Ma kə ndə kwal Hiyala kaa ngəci na: «Avee zhiniy məntəŋa wəzə hur, ka zanti məlmə gəzə gha na yaw. 22 Mbala ta mbəŋa mbəɓa kiyaŋu kiyaŋu, sa nzanay, shiy tiɓee dza mbay məni di, kala tsəhəŋa gha mbəɓaw,» kə. Va tsəgha niy har məndi məlmə vaa Səwarª.
23 Ma vici mbə səəmə ki na, mbaʼ Lutə tsəhiy mbə məlmə Səwar. 24 Dza Kwa sləkəpə ki, mbaʼ nzəməkəghwa ghu barudəw səəkə mə ghuməə dzəkən məlmə Sudum lə Gumur dəʼu ghən tsa nzə. 25 Birəkiɗə ghənzə ndanti məlməhi bakə ni va lə mbəzli mbə shi, lə məlməhi dzar vəgha shi gwanashi, lə shiy pəsəshi gwanashi. 26 Dzəghwa mali Lutə ki, mbaʼ naghay pi tsa liy hum, tiɓata ki na, mbaʼ zhəghəta ka ntsa ngati məndi tə ghuni.
27 Pəətə mekishi ki na, mbaʼ Abəraham dzaa tsəhiy tə pi tsaa niy garəshi ghəshi va lə Kwa sləkəpə. 28 Sa nə na nighə kə kaa pi tsaa dzəmbə məlmə Sudum lə Gumur, lə pi tsa dzar vəgha shi gwaʼ gwaʼa na, mbaʼ nay inəghu mbə takusə tərəŋu tərəŋu.
29 Ghala pi tsaa niy ndi Hiyala va məlməhi tə hiɗi nza Lutə vay, aa niy zəzətiy dzəkən Abəraham mbaʼ mbəlanti Lutə va ngəraʼu tsa va.
Kar Lutə lə ghyehi ci
30 Liy hum kuma va ki na, mbaʼ Lutə kafiy mbə məlmə Səwar ta dza ta nziyiy mbə kəlaŋ, ghəshi lə ghyehi ci va bakə ni. Sa nzanay, aa niy hazləni va nziy mbə məlmə va. Dza na mbaʼ dzaa nziyiy mbə ləgu lə ghyehi ci va. 31 Ma tə nahuti vici, ma kə na dikə na va zha kaa zhambəghəta juw na na: «Avanay sana kiy, a dəŋum haliy, zal tiɓa tikə tə hiɗi ni gar dzəvəgha ghum njasa ka mbəzli gwanashi niy məniw. 32 Ə pə ghum dzaa sanamiy tay kaa dəŋum, ma sa ka na ghyiyəy, nza ghum həni li, ta mbə ghum yanakə hulfə» kə.
33 Dza ghəshi tə vərɗi va ki, mbaʼ ghəshi sanamiy tay kaa dəshiy ghiyamti. Ma fəca va ki na, mbaʼ na dikə na va zha hənəhu həni lə dəta. Shaŋ ghəci ta sənay njasa həni na li lə njasa ɓarva na vəgha. 34 Ma tə kəɗi pi ki, ma kə na dikə na va zha kaa na juw na na: «Gwaʼaa nee nee ki, ee hənəhu həni ndatsə lə didi. Ə pə ghum dzaa zhiniy ghiyamti ndatsə diɓa, nza gha dzaa hənəhu həni li kuraku, ghalaɓa kiy, ta yanavə hulfə dza ghum,» kə. 35 Sa səəkəta virɗi ki na, dza ghəshi mbaʼ ghəshi ghyamti dəshi diɓa. Dzəghwa na juw na va ki, mbaʼ hənəhu həni li, shaŋ ghəci ta sənay njasa həni na li lə njasa ɓarəva na vəgha.
36 Dzəghwa ghyehi Lutə va bakanashi ki, mbaʼ ghəshi ɓəɓəvə hur səvəri mbə jakəva tsa shi lə dəshi. 37 Dza na dikə na va baw yata, mbaʼ fanati slən Muwabə kaa zəghu nzə, ghəci na jijihiy mbəzli ka məndi vaa har ka Muwabə ndatsə. 38 Dzəghwa na juw na va kuraku baw yata, mbaʼ fanati slən Ben-Ami kaa tsa nzə va zəghu. Ghəci na jijihiy mbəzli ka məndi vaa har ka Amun ndatsə.