Hiyala gəzəkə ya zəghu kaa Sara
18
Ma tə nahuti vici diɓa na, mbaʼ Hiyala zhiniy təzlita kaa Abəraham vəgha fə har məndiy vaa Shenə Maməre. Mənziy niy nza Abəraham miy ciki gamtaʼwal tsa ci mbə ɗakəɗaka vici. 2 Nighə nay, vətəghə mbəzli mahkan məgarə təzlishi kwa kuma ci. Sa nashi na na, kafə kafiy miy ciki tsa ci va, ka diva ta dza ta kumə li shi. Sa tsəhiy na vəgha shi ki na, gələɓə ghəci gələɓəy paʼa tə hidi kwa kuma shi. 3 Ma kə kaa tsahuti kutiŋ mbə shi na: «Ntsee dikə tsa, titihu yaŋ pə gha, gha gar mərshi lə yay, garatavaŋa juw kiy ghyi tsee yən ndə sləni tsa gha. 4 Kadiw məndi tikəŋuy yam jiwu ta pi shiɗəshiɗə ghuy, dəkətəvaŋuyim ta fə na. 5 Njana nzana mbaʼ ghuy tsəhəŋuy vəghee yən ndə sləni tsa ghuyiy, kadiwəm ee dzaa pəlakəŋuy shi zəmə jiwu nza ghuy mbəə kumavə bərci ta zhəghwa kwal,» kə kaa ngəshi. Ma kə mbəzli va kaa zləɓanci na: «Tsəgha na, mənti njasa gəzəkə gha va,» kə ghəshi. 6 Dzəghwa Abəraham ki, ka divaa dzəmbə ciki gamtaʼwal ta kəsata Sara, ma kə kaa ngəta na: «Diva kiaŋw kiyaŋu a gha tivə ghupə farinə wəzə na ɗaŋ, a gha tati peŋ,» kə 7 Dza na mbaʼ kəsləghə baliy dzəti pi tsa nza slay, mbaʼ pəlavə na ɗuwɗuw na məceri, kəsə kəsanavə kaa ndə sləni tsa ci, kə ntsa va həni hənanti mbaʼ tati kiyaŋu kiyaŋu.8 Ma sa tay sliw ki na, dza Abəraham laŋ ɓəvə mbaʼ səəkəə fəniy kaa ka məlmə ci va, mbaʼ ʼwa pəsli pəsli na lə na ʼwar ləmə na. Dza ghəshi, zəmə zəmə ghəshi zəməhu shi, məgarə Abəraham vəgha shi ta fə va. 9 Ma kə ghəshi kaa Abəraham ki na: «kuma na mali gha Saraa?» Kə ghəshi. «Tiɓa na mbə ciki gamtaʼwal,» kə. 10 Ma kə tsahuti kutiŋ mbə shi na: «Hazhi tsətsiy, ta səəkə dzee dzakə ghyi tsa gha, kee səəkiy, mali gha Sara lə zəghu zal,» kə.
Ghala gəzə na va kuma vay, kwa miy ciki niy nza Sara, liy hum ci ka fa kuma va. 11 Dalala niy halishi kar Abəraham lə Sara. Ya shiyiy, niy ghəranta ghəshi kaa Sara ghulaw. 12 Ma kə mbə zəzə kuma nzə na: «Pəhal mali njasa nzee tsa kiy, nza ya zhini mawti həni lə zal na? Talay, ya zara na, cəkeʼ haliy na,» kə niy ni, ka ushi ghənzə. 13 Ma kə Kwa sləkəpə kaa Abəraham ki na: «Tawa ushi Saraa? Tawa nə na: “Pəhaləra nzee, nza ya zhiniy yakə zəghu ghula na” kaa? 14 Shiy tiɓa kala mbay Kwa sləkəpəə məntishi na? Kee zhikəə zhakə ghyi tsa gha hazhi tsətsiy, Sara lə zəghu zal,» kə. 15 War sa gəzəkə Kwa sləkəpə tsəgha na, yeŋiɗə her Sara dzashi, tapə ghənzə məta mbə vəraslə, a kə na: «Ushəhu ushə yaw,» kə. «Tiɓaw, a gha ushəhu ushi,» kə Kwa sləkəpə.
16 Ma sa gəzanti na kuma va tsəgha na, dzəghwa mbəzli mahəkanə ni va mbaʼ ghəshi kafəshi ta dzashi, mbaʼ ghəshi ɓəvə kwal njasaa dza kwa məlmə Sudum, dza Abəraham ka pəhəshi ki. 17 Ma kə Kwa sləkəpə mbəɓa mbəɓa nzə ki na: «Ka ɗee yən mbəliy kuma dzee ta məni va Abərahamuw, 18 ghəciy, jijihiy hulfə mbəzli ɗaŋ tərəŋu lə bərci vəshi dza naa nza. Səvəri mbə dzee ta təfanshi miy kaa hulfəhi mbəzli tə hiɗi gwanashi. 19 Yən təravə na ta mbə ghəciy gəzanshi nuw kuma dzee pəhəti kaa ndərazhi ci lə kaa jijihiy, nza ghəshi məni na kataŋ na kuma, ka nuw kuma lə kwal tsa nzə, ghalaɓa ki na, nzee mbəə mananci kuma gəzəkee va mananci,» kə. 20 Ma kə Kwa sləkəpə kaa Abəraham ki na: «Nay gha naa Abəraham, tərəŋu wahə məndi va kuma məni mbəzli mbə məlmə Sudum lə Gumur. A na shi va kuma jikir na vəŋəta. 21 Dzəghwa məlmə va ɗee ta nuwanti nda kataŋ na kuma jikir na va məni mbəzli mbəɓa wahə məndi və. Tsəgha kə ghəshi məni kuma va kataŋiy, ee dzaa nata,» kə.
22 Dzəghwa nihuti ka məlmə bakə ni va ki, mbaʼ ghəshi kafəshi tiɓa ka dzashi dzəghwa məlmə Sudum . Ma Abəraham na ci ki na, ghulay ghəci tiɓa kwa kuma Kwa sləkəpə. 23 Dzəghwa na, kəətə kəətəghəvay dzəvəgha Kwa sləkəpə, ma kə kaa ngəta na: «Ana kwa sləkəpə, kataŋ dza ghaa zanti ntsa kama fəti və kwasəbə ntsa nza fəti və na? 24 Ya mbəzli kama fəti və shi mənti cifəmətsəkə mbə Sudum sanay, ta zanti məlmə va dza gha ya tsəgha nzə na? Nza gha pəlashi mbəzli mbə məlmə va mbə nəfə tsa gha tə mbərkə mbəzli cifəmətsəkə ni va kama fəti və shi mbəɓa sa? 25 Kay, ka dza naa təɓə ghaa məni tsəgha tepuw, ka dza naa təɓə gha zanti ntsa kama fəti və kwasəbə ntsa nza fəti vuw. Ta nza nguvə shi ka sa kutiŋ naw. Mbaʼ pə gha gha ntsaa sla nguvəə dzəkən mbəzli tə hiɗi gwanashi, kala nuw ma kuma lə kwal tsa nziy, ka dza naa dzavaw,» kə. 26 Ma kə Kwa sləkəpə kaa ngəci na: «Mbaʼ pən kəsashi mbəzli kama fəti və shi cifəmətsəkə mbə Sudumiy, ta pəlashi mbəzli mbə məlmə va dzee gwanashi mbə nəfə tsee tə mbərkə mbəzli va» kə.
27 Ma kə Abəraham diɓa na: «Ya tsəgha nzee kurbi, zhini kala shiy yəniy , yaŋ pə gha yən gəzaŋa kuma na gha kwa sləkəpə. 28 Ya gha dza sana faɗəmətsəkə cifəti gha kəsashi mbəzli kama fəti və shi kala mənti cifəmətsəkə ghəshi kiy, ta zanti məlmə va dza gha gwanata sa kama mbəzli cifə tiɓa ta məni cifəmətsəkə na?» Kə Abəraham. «Ka dzee za məlmə va yən kə kəsashi mbəzli kama fəti və shi faɗəmətsəkə cifətiw,» kə Kwa sləkəpə.
29 Zhini ma kə Abəraham diɓa na: «Ya gha kəsashi faɗəmətsəkə gwaʼa tsəghaa?» Kə. «Ka dzee za məlmə va tə mbərkə mbəzli faɗəmətsəkə ni vaw,» kə Kwa sləkəpə.
30 Zhini ma kə Abəraham diɓa na: «Ya əə zhinee gəzə kuma diɓay, ka sati nəfə tsa gha na gha ma Kwa sləkəpə ma. Ya gha kəsashi mahəkanəmətsəkə gwaʼa tsəghaa?» Kə. «Ka dzee zanti məlmə va yən kə kəsashi mbəzli kama fəti və shi mahəkanəmətsəkə mbəɓaw,» kə kwa sləkəpə.
31 Ma kə Abəraham diɓa na: «Yaŋ pə gha, ta ndahu nəfə tsee dzee ta zhiniy ɗuw kuma va gha. Ya gha kəsashi mbəzli kama fəti və shi bakəmətsəkəshi gwaʼa tsəghaa?» Kə. «Ka dzee zanti məlmə va tə mbərkə mbəzli bakəmətsəkə ni vaw,» kə Kwa sləkəpə.
32 Ma kə Abəraham ki na: «Yaŋ pə gha, ka ɓə nəfə gha na gha ma Kwa sləkəpə ma, kwa kərni gəzə kumee na sana. Ya gha dzaa kəsashi mbəzli kama fəti və shi məŋ gwaʼa tsəghaa?» Kə. «Ka dzee zanti məlmə Sudum tə mbərkə mbəzli məŋ ni vaw,» kə Kwa sləkəpə.
33 Sa kəɗamti kwa sləkəpə gəzə kuma lə Abəraham ki na, dza na ka dzata, mbaʼ Abəraham zhəghəghəvay jighi.