Slən tsa Abəram zhəghiy ka Abəraham
17
Ma sa mənti Abəram piya məsliɗəmətsəkə məsliɗəti na, dzəghwa kwa sləkəpə mbaʼ təzlita kaa ngəci. Ma kə ngəci na: «Yən na Hyalaa guranti tə bərci, war njasa ɗee pə ghaa məni kuma mbə nziy tsa gha, ka nuw kuma lə kwal tsa nzə. 2 Ta slati kiri dzee kwa jipə tsee lə gha, mbaʼee yati jijihiŋa tərəŋu dalala,» kə. 3 Sa favə Abəram tsəgha na, dzəghwa na tsəfəku tsəfəkuy, gaʼa ʼyambə kuma ci mbə hiɗi. Ma kə Hiyala diɓa na: 4 «Na neyiy, avanata kuma gəzəkee mbə sla kiri tsa va: Jijihiy hulfəhi mbəzli ɗaŋaŋaŋaŋ dza gha nza, 5 ka dza məndiy harəŋaa Abəram ghulaw, Abəraham dza slən tsa ghaa nza nana. Sa nzanay ta məntəŋa dzee ka jijihiy hulfəhi mbəzli ɗaŋaŋaŋaŋ. 6 Ɗaŋ tərəŋu dzee yati jijihiŋa, ka səvəri hulfəhi ɗaŋ mbə shi. Ta nza dza mezhizhə mbə jijihiŋa. 7 Ta nziyiy dza sla kiri tsa slatee va kwa jipə tsee lə gha. Sa ka gha mətiŋay, ghulay dza naa nza kwa jipə ghiy lə jijihiŋa. Ka dza naa kərəw, ghəci dza naa məntəra ka Hiyala gha lə sa jijihiŋa sa ka gha mətiŋa. 8 Hiɗi ka Kanahaŋ nza gha ni ti shi ka ndə səəkə səəkə sanay, ta ndaŋuyshi dzee gwanashi lə jijihiŋa ta kwa ndimndim. Shi shi dza ghəshiy nza. Yən dza Hiyala shiy nza,» kə Kwa sləkəpə.9 Ma kə Hiyala kaa Abəraham diɓa na: «Ndəghuti tə ghuy sla kiri tsa slatee tsa lə gha, ghuy lə jijijhiŋa dza məndiy ya liy hum gha, ya paʼa tar ni tarɓa jijihiŋa, ka dzar war ka dzar. 10 Avanata kuma pəhətee ta məni ghuy mbə nziy tsa ghuy lə jijihiŋa: Ya wa zəghu zal mbə ghuyiy, slananti tə məndi fəʼyasa. 11 Fəʼyasa dza ghuy vaa slanti dza naa ci sla kiri tsa kwa jipə tsee va lə ghuy. 12 Ya paʼa humɓay, tə kwa dəghasa vici shi ghala yakəshi məndi kə məndi dzaa sla fəʼyasa kaa ndərazhiy zhər ghuy. Tsəgha ndərazhi meviviy yashi va ghuy, zhini tsəgha ndərazhi mevivi pavə ghuy papa kala kama ghəshi mbə hulfə ghuy. 13 Mava tsaa yay kiy ghyi tsa gha lə tsa pavə gha gwaʼay, slanantishi tə məndi fəʼyasa. Ghalaɓa kiy, a sla kiri tsee va dzaa tsəhiy paʼa mbə vəgha ghuy ta nza ka sla kiri tsaa dzaa nza ta paʼa kwa ndimndim. 14 A na zal tsaa dzaa slanti ma fəʼyasay, ɓanti tə məndi mbə hulfə mbəzli ci, tə sa nuw ti ma na kuma pəhətee mbə sla kiri tsee,» kə Hiyala.
15 Zhini ma kə Hiyala kaa Abəraham diɓa na: «Əntaa gha har mali gha lə slən Saray ghula ma. Sara pə gha dzaa har nana. 16 Ta təfanati miy dzee, mbaʼee yavəŋa zəghu kwa kuraku. Ta təfanati miy dzee, kəhəhita hulfə mbəzli ɗaŋaŋaŋaŋ dza naa nza. Ta nza dza mezhizhə hulfəhi ghənghən ghənghən mbə kəhəhita va,» kə. 17 Sa favə Abəraham kuma va tsəgha na, mbaʼ tsəfəkuy gaʼa ʼyambə kuma ci mbə hiɗi, kə ka ushi. A kə mbə zəzə kuma ci na: «piya bələku see kiy, njaa dzee yakə zəghwaa, naa Sara na sa gar yakə zəghu, məsliɗəmətsəkə piya nzə na?» Kə. 18 Ma kə Abəraham kaa Hiyala na: «A Hyalee, kama Isəmayel tə ghumiy, mbaʼ gha fakən dəvə gha kəniy, nihuti shiy tiɓee ɗuw diɓaw,» kə. 19 Ma kə Hiyala na: «Tiɓaw, ta yakəŋa zəghu dza mali gha Sara, Izakə pə gha dzaa ni kaa slən tsa ci. Ta slati kiri tsee dzee li, mbaʼ lə jijihiy dza məndiy ya liy hum ci. Sla kiri tsa vay, ka dza naa kərəw. 20 Ta na Isəmayeliy, ee favə kuma ɗuw ghaa dzəkən, ta təfanati miy dzee. Ta yavə ndərazhi dza na, ɗaŋ tərəŋu dza jijihiy nza. Mezhizhə məŋ lə bakə dza na ta yakə, jijihishi mbəzli ɗaŋ dza naa nza. 21 Ə na na nzanay, dzəghwa jipə ghiy lə Izakə tsa dza Sara va ta ya hazhi geʼi lə vəghu tsa dzee ta sla kiri,» kə.
22 Ma sa kəɗamti Hiyala gəzə kuma lə Abəraham ki na, mbaʼ dzata. 23 Dzəghwa Abəraham ki, pəm pəməvə zəghu ci Isəmayel lə mevivi ci gwanashi. Niy ya kiy ghyi tsa ci lə ni pavə na papa gwaʼa. Ya tsama zəghu zal kiy ghyi tsa ciy, niy tərəw. Sa pəməvəshi na na, mbaʼ slanantishi fəʼyasa fəcavata njasaa niy gəzanakə Hiyala va. 24 Ghala pi tsaa sla Abəraham va fəʼyasay, piya məsliɗəmətsəkə məsliɗəti niy nza sa ci. 25 Ghala pi tsaa sla zəghu ci Isəmayel va fəʼyasay, piya məŋ lə mahəkanə niy nza sa ci. 26 Fəca vici kutiŋ na niy sla ghəshi fəʼyasa va. 27 Fəcava slən zal tsa kiy ghyi tsa Abəraham sla diɓa, mevivi yakə məndi kiy ghyi tsa ci lə ni pavə na papa va mbəzliy kama mbə hulfə ci.