Njasa yakə məndi Isəmayel
16
Niy yanakə zəghu Saray kaa zata Abəram kiw. A mava niy nza və, Agarə, kə məndi kaa slən tsa nzə, zha ka Ezhiptə ghənzə niy nza. 2 Ma tə nahuti vici, ma kə Saray kaa zata Abəram na: «Avanay sanay zaray, ndara ya zəghu Kwa sləkəpuw. Wəzəɓa həni gha lə mavee na na, nda nza naa yakəra zəghu,» kə. Sa gəzəkə Saray kuma va na, mbaʼ Abəram zləɓavə. 3 Dzəghwa Saray ki, mbaʼ ɓanavə mava nzə va, Agar zha ka Ezhiptə kaa zata Abəram, ta nza ghənzə ka mali ci. Piya məŋ niy mənti Abəram tə hiɗi ka Kanahaŋ ghalaɓa. 4 Dzəghwa Abəram ka həni lə Agarə, mbaʼ ɓəvə hur. Ma sa nay na ghənzə ɓəvə hur na, kala nighə Saray ghənzə nja ndə ghula kwa mətsə nzə. 5 Ma kə Saray kaa Abəram ki na: «Gha dza naa nighə dzəkən kuma slini kənee na, yən dəʼu ghən tsee ndaŋa na mavee ta həni ghuy li ngar, ma sa nighə na ghənzə ɓəvə hur nana ki na, kala nighəra ghənzə nja ndə ɓay? Tsəgha na, Kwa sləkəpə dza naa sla nguvə kwa jipə ghum lə gha,» kə. 6 Ma kə Abəram kaa ngəta na: «Mava tsa gha na, ava nzə mbə dəvə gha, shi ɗi gha pə ghaa məni li,» kə.Sa gəzəkə Abəram tsəgha ki na, dza Saray tapə ta santa ngəraʼu kaa Agarə tərəŋu tərəŋu. Sa tsəʼuy ngəraʼu və na, mbaʼ mbəŋəta. 7 Dza Ndə kwal tsa Kwa sləkəpə mbaʼ nata vəgha yam mbə gamba pəsə ma shiy ɗaŋ ti, kwa kwal tsaa dzəmbə məlmə Shur. 8 A kə kaa ngəta na: «Agarə, mava tsa Saray, kuma səəkə ghaa? kuma dza ghaa?» Kə. Ma kə Agarə na: «Waa ə huree va Saray maliy sləkəra,» kə. 9 Ma kə Ndə kwal tsa Kwa sləkəpə kaa ngəta na: «Ə pə ghaa zhəghəvaa zhəvəgha maliy sləkəŋa va, nza gha fa kuma və,» kə. 10 Ma kə ngəta diɓa na: «Ta ndaŋa kəhəhi dzee ɗaŋ tərəŋu kala gar mbay məndiy ɓəlatishi,» kə. 11 Zhini ma kə ngəta ɓa na: «Avanaŋa lə hur ta ya zəghu zal, Isəmayel pə gha dzaa fanati slən. Sa nzanay a Kwa sləkəpə nay ngəraʼu tsa kən gha. 12 Zəghu dza gha vaa yakiy, ta gura ghən tsa ci dza na nja kwantəmca mbə gamba. Ta mbəzə dza na lə mbəzli gwanashi, mbəzli gwanashi na ka mbəzə li. Kutiy kutiy dza naa nziy nziy tsa ci, kərakə kərakə lə nihuti ngwardəhiy gwanashi,» kə.
13 Ma kə Agarə mbə ghən tsa nzə na: «Nay ntsaa nara tsee kataŋ nanzə na?» Kə. Dza na mbaʼ fanati slən kaa Kwa sləkəpəə gəzanakə kuma va: «El-Ruy nza gha,» kə. Ɗi naa gəziy: «Hyalaa nara». 14 Va tsəgha nə məndi: «Lahay-Ruy» kə məndi kaa wawərə kwa jipə məlmə Kadesh va lə məlmə Beredə, ɗi naa gəziy: «Wawərə ntsaa nighəra piy». 15 Ma sa zhəghəghəvata Agarə zhəvəgha Saray ki na, dzəghwa na baw yakə zəghu zal, mbaʼ Abəram, diy fanati slən Isəmayel. 16 Piya dəghəsəmətsəkə kwaŋəti niy nza sa Abəram ghala vəghu tsaa yanakə Agarə va zəghu.