Hiyala slati kiri lə Abəram
15
Liy hum kuma va ki na, dzəghwa Kwa sləkəpə tə nahuti vici mbaʼ təzlita nja kwa shiw kaa Abəram. Ma kə kaa ngəci na: «A Abəram, ka hazləni gha ma, yən na gal tsa kən gha. Təruŋ dalala dzee ta ngavəŋa səɗa gha, sa nzanay, a gha ndara nəfə tsa gha» kə. 2-3 Ma kə Abəram na: «A Hiyala kwa sləkəpə, a shi dza ghaa ngavəra gar vəshiy nəfə tseya? Vanay sanay, ta mətira dzee kala zəghu vəya, ndara tsee zəghu gha ta nza hulfee tiɓaw. Ndə mbə mbəzliy ghəraɗa sləni dza na ta zəmə ghyi ta shiya, Eliyazar ndə ka Damasə,» kə. 4 Ma kə Kwa sləkəpə kaa ngəci na: «Tiɓaw, ghəci dza naa nzaa ndə zəmə ghyi tsa ghaw, zəghu yakə gha dza na ta zəmə ghyi tsa gha,» kə. 5 Dzəghwa Kwa sləkəpə mbaʼ pəməkəvəri mbə ciki gamtaʼwal tsa ciy dzəti ngula. Ma kə ngəci na: «Nighə pi tsa tə ghumə a gha mbəra sasərkuhi dziy tə ghumə va ndata nza ghaa mbay mbərantishi,» kə. Zhini ma kə ɓa na: «Njasa nza sasərkuhi va vay, tsəgha dza hulfə ghaa nza ɗaŋ tsa nzə,» kə.6 Dzəghwa mbaʼ Abəram ɓanavə nəfə tsa ci kaa Kwa sləkəpə, va tsəgha ɓəti Kwa sləkəpə ka ntsa slar tsa. 7 Ma kə kaa ngəci diɓa na: «Yən na Kwa sləkəpə, yən harəkəvəriŋa na mbə məlmə Ur tə hiɗi Kaləde, ta ndaŋa hiɗi nza gha ni ti shi ka shi gha,» kə. 8 Ma kə Abəram na: «A Hiyala Kwa sləkəpə, njaa dzee gha sənay hiɗee dza shiniy nza lə kataŋ pən kiya?» Kə. 9 Ma kə Kwa sləkəpə ngəci na :«Mbala kəsəkəra mbəkuli slaa mənti piya mahəkanə, mbaʼ kwəə mənti piya mahəkanə, mbaʼ gaməə mənti piy mahəkanə, mbaʼ kukula palay, mbaʼ ghərəpəpə,» kə. 10 Dza Abəram mbaʼ dzaa kəəsəkə shiva gwanashi, mbaʼ tihəvərishi bakə mbə bakə mbə, ma ʼegwer nashi ki na kala tihəshi ma ghəci. Dza na kaa ni tihəvəri na va mbaʼ sləkiy shi bakə bakə, bəla kwa bəzəmə na, tar kwa bəzəmə, na kwa zleɓi na, tar kwa zleɓi. 11 Dza zləŋahi, mbaʼ ghəshi səəkəshi ta tsəŋu sliw tsa va, mbaʼ Abəram kamtishi.
12 Ma viciy maɗi ta pəku na, fəriŋ Abəram ɓanti hi, dzəghwa hazləni mbaʼ dzataa dzəmbə nəfə tsa ci tərəŋu, nja mbə kusli ghəci favə ghən tsa ci. 13 Ma kə Kwa sləkəpə kaa Abəram ki na: «Sənay tə gha, ta nziyəhu nziy dza jijijhiŋa tə hiɗi nihuti mbəzli. Mevivi dza ghəshiy nza, ka sanshi ngəraʼu məndi, piya diwiy diwiy faɗə. 14 Ya tsəgha nzə kiy, sa dzee kafə na, ta ɓasanakənshi nguvə dzee kaa mbəzliy dza vaa məntishi ka mevivi, ka ghəshi dza ki na, mbaʼ ghəshi səvərishi mbə hiɗi mbəzli va lə shiy və shi tərəŋu. 15 Ta na tsa gha ghəniy, tə wahə dza ghaa hali. Lə zərkə dza ghaa məti ma nza məndi lantəŋa. 16 Tə kwa faɗa jijihi dza hulfə ghaa zhighəvaa zhikəə zhiti hiɗi ni, sa nzanay, tsəhəta rəɗa ka Amur tə pi tsa kəray na gar tihəshee tə hiɗi ni diw,» kə kwa sləkəpə.
17 Ma sa pəkuta vici mbaʼ kusli mənta wəzə wəzə ki na, ghavə ghani ghu lə inəghu mbaʼ ghəshi dzəvərishi dzar mbə jipə sliw tsa va. 18 Fəcava kiy, mbaʼ Kwa sləkəpə slati kiri ghəshi lə Abəram. Ma kə kaa ngəci na: «Avee ɓanavə Hiɗi ni kaa hulfə gha, ʼwava na tə həl ka Ezhiptə paʼa tə həl Efərata tsa dikə tsa va. 19 Hiɗi vay, hiɗi ka Keni, lə shi ka Keniz, lə shi ka Kadəmun, 20 lə shi ka Hit, lə shi ka Periz, lə shi ka Refay, 21 lə shi ka Amur, lə shi ka Kanan, lə shi ka Girgash, mbaʼ shi ka Zhebush na ghəshi, » kə Kwa sləkəpə.