Kar Abəram lə mezhizhə mbaʼ Meləkisedekə
14
Geʼi lə vəghu tsa va ki na, mbaʼ mbəzə niy məniy kwa jipə nihuti mezhizi lə nihuti mezhizi. Kar Amərafel mazə ka Shineyar mbaʼ Ariyuk mazə tsa ka Elasar mbaʼ Kedurəlawmer mazə tsa ka Elam mbaʼ Tidal mazə ka Guyim 2 niy mbəzə na lə kar Bera mazə ka Sudum mbaʼ Birəsha mazə ka Gumur, mbaʼ Shineabə mazə ka Adəma, mbaʼ Shemever mazə ka shevuyim, mbaʼ mazə ka Bela. Bela vay, ghənzə na Səwar. 3 Dzəghwa niy kəray ni mezhizhə, mbaʼ ghəshi ɓasəshi dziy kwa teʼu pi tsa har məndi vaa Shidim. Ghəci na pi tsa nza kufa ghunghun na va kərkəva ma ti ndatsə. 4 Piya məŋə lə bakə niy mənti Kedurlawmer mbə sləkəshi, ma tə kwa məŋ lə mahəkana piya na, mbaʼ ghəshi kafəshi ta zləghu ghən tsa shi mbə dəvə ci. 5 Ma tə kwa məŋə lə faɗa piya ki na, mbaʼ Kedurəlawmer kafiy lə mezhizhə mahəkanə ni va kwasəbə ta mbəzə. Ghəshi mbə kwal na, mbaʼ ghəshi irəti ka Refay tə hiɗi Ashtarutə-Karnayim, lə ka Zuzh tə hiɗi Ham, mbaʼ ka Emi tə hiɗi Shawe-Kirəyatayim. 6 Ma ka Hur nashi ki na, mbaʼ ghəshi irətishi dzar mbə dəlagwashi, tə hiɗi Seyir. Mbaʼ ghəshi nuwughəshi paʼa mbə məlmə El-Paran ndəku vəgha gamba pəsə ma shiy ɗaŋ ti. 7 Dza mezhizhə va ki, mbaʼ ghəshi zhəghəkəvashi dzəti hiɗi ka En-Mishpat. Kadesh har məndi məlmə va ndatsə. Dza ghəshi irə irə ghəshi irəti ka Amalek tə hiɗi shi gwanashi. Zhini tsəgha ghəshi irəti ka Amur tə hiɗi ka Hasasun-Tamar. 8 Liy hum ki na, dzəghwa kar mazə ka Sudum ghəshi lə kar mazə ka Gumur mbaʼ mazə ka Adəma, mbaʼ mazə ka Shevuyim mbaʼ mazə ka Bela, məlmə har məndi vaa Səwar, ɓasə ghəshi ɓasəti ka mbəzə shi, dziy kwa teʼu pi tsa har məndi vaa Shidim, ta mbəzə lə 9 Kar Kedurlawmer mazə ka Elam mbaʼ Tigal mazə ka guyim, mbaʼ Amərafel mazə ka Shineyar, mbaʼ Ariyuk mazə ka Elasar. Mezhizhə cifə lə mezhizhə faɗə niy mbəzə na. 10 Dzəy kwa teʼu pi tsa har məndi vaa Shidiməy, a məndi niy la lati keʼwer lə dimə ngəri ngərita dzar kwa shi. Ma sa mbashi ni faɗə ni va mezhizhi ni cifə ni va ki na, dzəghwa kar mazə ka Sudum ghəshi lə mazə ka Gumur mbaʼ ghəshi hushi. Ghəshi mbə hu na, mbaʼ ghəshi iməhu tərəə dzəghwa keʼwer va. Ma niy tərə mbəzli na, mbaʼ ghəshi hu hushiy dzəmbə dəlagwa. 11 Dzəghwa ni faɗə ni va mezhizhə ushanti mbəzli, mbaʼ ghəshi ɓasəhu shi mbə məlmə Sudum lə Gumur, mbaʼ shi zəmə shi gwaʼa, ka dzashi. 12 Ghala vəghu tsa vay, mbə məlmə Sudum niy nza Lutə zəghu zəmbəghiy Abəram tsa va, dzəghwa mbaʼ məndi kəsəhu lə ghəciy ta, meʼe kaa shi ci gwanashi ka dzashi.13 Ma sa mbəlikəvay tsahuti ndə mbə mbəzə tsa va na, mbaʼ səəkəə gəzanci kuma va kaa Abəram ndə ka Ebərə ghəci lə ghyi tsa ci dzar mbə fəhi Maməre. Maməre tsa vay, slən tsa ndə ka Amur niy nza na, zəmbəghəshi kar Eshəkul ghəshi lə Aner. Ghəshi mahəkanashiy a ghəshi niy pəhay madiga lə Abəram. 14 Ma sa favə Abəram a məndi kəsəhu zəghu zəməŋa, kə məndi na, dzəghwa na ɓasə ɓasəti mbəzliy mbay mbəzə mbə mbəzli yakə məndi kiy ghyi tsa ci, mbəzli diwiy diwiy mahəkanə mbaʼ məŋ lə dəghəsə ghən kən. Kafə ghəshi kafəshi ta nuw səəbə mbəzli va paʼa mbə məlmə Daŋ. 15 Sa kəsashi ghəshi na, dzəghwa Abəram mbaʼ titihəvəri mbəzli ci va, ta pəsli ta ka mbəzə shi va həvir. Dza ghəshi irə irə ghəshi irətishi, mbaʼ ghəshi tihəvəshi paʼa mbə məlmə Huva, njasaa dzəghwa muw va məlmə Damasə. 16 Dza cəkeʼ Abəram zhinəhu shiy niy ɓasəhu mbəzli va va, mbaʼ pəməvə Lutə zəghu zəmbəghiy, lə shi ci niy ɓasəhum, lə miʼi ci, mbaʼ nihuti mbəzliy niy kəəsəhu məndi gwaʼa.
17 Ma Abəram mbə zhəghəvaa jighi, sa ushanti na kar mazə Kedurlawmer lə nihuti mezheriy niy jakiy na li shi ki na, mbaʼ mazə ka Sudum səəkiy ta kumə li dziy kwa teʼu pi tsa har məndi vaa Shave. Shave tsa vay, teʼu pi tsa mazə ɗi naa gəzə. 18 Dzəghwa Meləkisedekə, mazə ka Salem, mbaʼ ɓəkə peŋ mbaʼ tay. Meləkisedekə tsa vay, ndə ta Hiyala tsa Hiyala dikə na mə ghumə niy nza na diɓa. 19 Dza na mbaʼ təfanati miy kaa Abəram. Ma kə na: «Nza Hiyala dikə na mə ghumə, saa ngati ghumə lə hiɗi təfətəŋa miy gha Abəram. 20 ʼWəsa kə məndi kaa Hiyala dikə na mə ghumə ghənzə saa ndaŋa bərci ta ushanti ka mbəzə gha,» kə . Dzəghwa Abəram ki mbaʼ tihəvəri shi zləghuvə na va məŋ mbə, mbaʼ ɓanavə bəla kutiŋ kaa ngəci.
21 Liy hum ki, ma kə mazə ka Sudum kaa Abəram na: «Pəmavəra ke ngəri ke ngəri, a gha ɓə ni gwanashi ni shiy,» kə. 22 Ma kə Abəram kaa ngəci na: «Avanata dəvee kafə kafə ka dzəmə Kwa sləkəpə, Hiyala dikə na mə ghumə, saa ngati ghumə lə hiɗi: 23 Ee zəməkəŋa fəla, ka ɓə shiyee ya kutiŋ mbə shi ghaw, ya ghur məgapa, ya yiɗi mbə kwakwahiy, ka ɗi yaw. Ghalaɓay, ka dza ghaa mbay gəzə: “ee mananavə shiy kaa Abəram” pə ghaw. 24 Shiy tiɓee ɓə kaa ghən tseyew, war ni zəməhu mbəzlee va na shi ɓəvee. A na bəla kar Aner lə Eshəkul, mbaʼ Maməre, madigahira səəkə ghiy va li shiy, ta ɓə dza ghəshi na na shi,» kə.