13
Dzəghwa Abəram ki, kafə kafiy mbə Ezhiptə lə shi ci gwanashi mbaʼ zhəghəghəvay zhimə Negev ghəshi lə mali ci mbaʼ Lutə kwasəbə shi.Təhəva tsa kar Abəram lə Lutə
2 Təruŋ dalala niy nza shiy va Abəram. Ɗaŋ niy nza dəmbəkə və, tsəgha gəna, tsəgha tsahi mbəzə. 3 Dza na mbaʼ kafiy mbə Negev, nziyayəvay tiɓa, nziyayəvay tiɓa, mbaʼ tsəhiy ndəku vəgha məlmə Betel. Paʼa tə pi tsaa niy nza na va ti kwa taŋa, kwa jipə kar Betel lə Ayə. 4 Tə pi tsaa niy ngati na va pi ta ta Hiyala, dza na mbaʼ cəʼuti Hiyala, A Kwa sləkəpə, kə kaa har nzə.
5 Lutə tsaa niy nza va kwasəbə Abəraməy, ɗaŋ niy nza teŋkesli, lə kwiy, mbaʼ slay və. Ɗaŋ niy nza mbəzli kiy ghyi tsa ci kuraku. 6-7 Ɗaŋ tərəŋu niy nza ke ngəri ta səɗa kar Abəram lə Lutə, tsəgha dəmbəkə niy nza və shi diɓa. Va tsəgha ki na, daw pi tsa nza ghəshi va ti niy nza, ta nziyshi ghəshi jakə jakə. Zhini diɓa na, tə hiɗi va ka Kanan lə ka Perizhi niy nza. Ma tə nahuti vici ki na, mbaʼ mbəzliy ndəghu shiy kaa Abəram mənəhu miy lə mbəzliy ndəghu shiy kaa Lutə. 8 Ma kə Abəram kaa Lutə ki na: «titihu, a cəʼuŋee, ka təɓə na ghum məni miy kwa jipə tsa ghumuw, ka təɓə mbəzliy ndəghum shiy məni miy kwa jipə tsa shi diɓaw, sa nzanay, mbəzli kutiŋ nza ghum. 9 Wəzəɓa dza ghum təhəvərivam na, ava hiɗi va gwanashi kwa kuma gha, tivə ni dza ghaa ɗi nziy ti shi. Mbaʼ pə ghaa ɗi dza ta nziy njasaa dzati muwiy, nzee dza ta nziy njasaa dzəghwa həci. Awə njasaa dzəghwa həci ɗee dza ta nziy pə gha na, nzee dza ta nziy njasaa dzati muw,» kə kaa Lutə.
10 Dzəghwa nighə nighə kə Lutə na, mbaʼ nashi hiɗi Zhurdeŋ paʼa tə hiɗi Səwar, hiɗi wəzə, neɓekəbekə ghəshi. Nja tsa Kwa sləkəpə niy nza hiɗi va, Kwa sləkəpə ghula ta ndi məlmə Sudum lə məlmə Gumur. War nja hiɗi ka Ezhiptə niy nza ghəshi. 11 Dzəghwa Lutə ki, mbaʼ tivəshi, mbaʼ kafiy lə mbəzli ci ta dza ta nziy ti shi, njasaa dzəghwa ghumə. Ava tsəgha təhəva ghəshi lə Abəram 12 Dzəghwa Abəram naci ki, Mbaʼ nziyiy tə hiɗi ka Kanahaŋ, ma Lutə na, mbaʼ dzaa nziyiy vəgha məlməhi tə hiɗi Zhurdeŋ, paʼa mbə məlmə Sudum ghəci tsəhiy lə ghyi tsa ci. 13 Mbəzli mbə məlmə Sudum vay, mbəzli jikir jikir ni niy nza ghəshi, tərəŋu niy məni ghəshi kumaa təɓə ma kaa Kwa sləkəpə.
14 Liy hum sa təhəvərivashi kar Abəram lə Lutə ki, ma kə Kwa sləkəpə kaa Abəram na: «ʼwa nighə hiɗi va tə pi tsa nza gha va, nza gha nuw lə nighəshi njasaa dzati muw lə njasaa dzəghwa həci, ka nighəshi njasaa dzəghwa ghumə lə njasaa dzəvəri mirkwi gwaʼa. 15 Lə kataŋ, hiɗi nashi gha va gwanashiy, ta ndaŋashi dzee ghuy lə jijihiŋa gwaʼa, ta paʼa kwa ndimndim. 16 Ɗaŋ tərəŋu nja hiɗi dzee yati jijihiŋa. Njasa mbay ma məndi vaa mbərati hiɗiy, tsəgha dza məndiy mbay ma mbərati jijihiŋa. 17 Mbala dzamti hiɗi va, a gha nashi njasa nza buŋ tsa shi, lə njasa nza bitə tsa shi, sa nzanay, kaa ngəŋa ndaŋashee,» kə kwa sləkəpə kaa Abəram.
18 Dzəghwa Abəram ki mbaʼ təɗivə ghyi tsa ci, mbaʼ dzaa nziyiy tə pi tsa nza fəhi dikə dikə ni va tə hiɗi Maməre, tə hiɗi ka Ebərəŋw. Dza na, mbaʼ ngati pi, ta ta Kwa sləkəpə tiɓa.