ABƏRAHAM
Njasa haray Hiyala Abəram ta ɓarva tə hiɗi ci
12
Ma tə nahuti vici, ma kə Kwa sləkəpə kaa Abəram na: «Zlay ghyi tsa dəŋa lə manəhiŋa gwaʼa, a gha ɓarəvaŋa tə hidi gha, nza gha dzaŋaa dzəti hiɗi dzee va ta cətəŋa. 2 Mbəzli ɗaŋ dzee ta yakəvəri mbə gha, ta təfətəŋa miy dzee, mbaʼee məntəŋa ka ntsa tə slən. Səvəri mbə gha dza mbəzliy kumavə təfə miy. 3 Mbəzliy dzaa məniŋa kuma wəzə nay, ta təfanatishi miy dzee. Niy dzaa məniŋa kuma jikir na na, mbaʼee bazlantishi. Səvəri mbə gha dzee ta təfə miy kaa hulfə mbəzli tə hiɗi gwanashi» kə.4 Dzəghwa Abəram kafə kafiy njasa gəzanakə Kwa Sləkəpə ki, mbaʼ Lutə kafiy kwasəbə kuraku. Ghala pi tsa kafə Abəram va tə hiɗi ka Haraŋiy, piya mbərfəŋəmtsəkə cifəti niy nza sa ci. 5 Dza na pəm pəməvə mali ci Saray, mbaʼ Lutə zəghu zəmbəghiy. Cəkeʼ pavə shiy niy mənivə na, pəm pəməvə meviviy niy pavə na tə hiɗi ka Haraŋ, ka dzashi ta dzəti hiɗi ka Kanahaŋ.
Abəram tə hiɗi ka Kanahaŋ mbaʼ tə hiɗi ka Ezhiptə.
Ma sa tsəhəshi ghəshi tə hiɗi ka Kanahaŋ ki na, 6 dza Abəram ka dza, ka dza tə hiɗi va, mbaʼ tsəhiy mbə məlmə Shishem, tə pi tsa nza fə dikə na va har məndiy Shenə Mure. Ghalaɓa kiy, ka Kanan niy nza mbəzli tə hiɗi va.
7 Dzəghwa kwa Sləkəpə tə nahuti vici, mbaʼ təzlita kaa Abəram, ma kə kaa ngəci na: «Ta ɓanavəshi hiɗi ni dzee kaa jijihiŋa,» kə kaa ngəci. Dzəghwa Abəram ki pew ngakati pi ta ta Kwa sləkəpəə təzlita va kaa ngəci ki. 8 Sa kafə na tiɓa ki na, mbaʼ tsəhiy mbə kəleŋer vəgha Betel va, njasaa dzəghwa ghumə. Dza na ki, mbaʼ liy ceker gamtaʼwalhi ci ta nziy kwa jipə kar məlmə Betel lə məlmə Ayə. Betel və na, njasaa dzəvəri mirkwi, ma Ayə na, njasaa dzəghwa ghumə. Dzəghwa na tiɓa, mbaʼ ngati pi ta ta Kwa sləkəpə. Dza na ka cəʼu Hiyala ki: «A Kwa sləkəpə,» kə kaa har nzə. 9 Sa nziyayəvay na tiɓa ki na, mbaʼ kafiy dzay dzəti tsahuti pi, ɗaŋ səɗa ghəci mbərəhu pi tsəgha, paʼa ka tsəhiy tə hidi Nagevə.
10 Dza ma mbaʼ səkwata tə hiɗi nza Abəram va ti shi. Sa nza ma va tərəŋuta ki na, dza na mbaʼ dzay dzəghwa hiɗi ka Ezhiptə, ta dzaa nziyayəvay . 11 Ma ghəshi ndəku ta tsəhə tə hiɗi va ki, ma kə kaa mali ci Saray na: «Favə gha naa malee, ee sənay, mali ka təɓə kiyas nza gha, 12 sa ka ka Ezhiptə naŋay, ta sənay dza ghəshi malee nza gha, kə ghəshi, ta pəəslitəra dza ghəshiy dza, mbaʼ ghəshi zlaŋa tə ghuməŋa na na gha. 13 Əə cəʼuŋee, ngwarməmə nza ghiy li, pə gha dzaa ni kaa ngəshi, nza ghəshi mbəə kəsətəra wəzə tə kuma gha, ma nzee mbəə nza tə ghuməra tə mbərkə gha,» kə kaa ngəta.
14 Ma sa tsəhiy Abəram tə hiɗi ka Ezhiptə ki na, mbaʼ mbəzli tə hiɗi va nata mali ci va, ka təɓanshi ghənzə tərəŋu. 15 Dzəghwa mbəzliy ghəra sləni kaa Farawaŋ, mbaʼ ghəshi nata, mbaʼ ghəshi dzaa falanati təɓə tsa nzə va kaa Farawaŋ. Dza məndi ki, mbaʼ məndi səəkəə ɓəhu, ta nza ghənzə ka mali ci. 16 War kuma wəzə na Farawaŋ mananci kaa Abəram tə kuma nzə ki. Mbaʼ kanavə teŋkesli lə kwiy, mbaʼ slay, zhini tiʼ meviviy zhər lə niy miʼi gwaʼa, zhini kaʼ kaa kwantəmcahiy zhər lə niy miʼi, lə ngeləwbahi diɓa. 17 Dzəghwa Kwa sləkəpə nanzə ki, mbaʼ ɓəɓəkə ngəreʼuer dzəkən Farawaŋ lə dzəkən mbəzli kiy ghyi tsa ci, tə mbərkə Saray mali Abəram. 18 Sa nighəti Farawaŋ kuma va tsəgha na, dza na daʼ haray Abəram. Ma kə kaa ngəci sa səəkiy na na: «Shi ka wa na shi məntəra gha niaa? A shiy mənishi niy nə ma gha malee na sana pə gha ngəraa? 19 Tawa nə gha zhamərə na sana pə gha, mbaʼ gha fambəraa dzəmbə ɓə mali ghaa? Ava mali gha, pəmə sa gha a gha ɓarəvaŋa tə hiɗee,» kə kaa Abəram. 20 Ma kə Farawaŋ kaa ka sləni ci ki na: «Mbalam pəmantəram kar ntsa va lə mali ci va, lə shi və shi gwaʼa tə hiɗee,» kə kaa ngəshi.