Mbəzli tə hiɗi mbə dzəghə nga ciki tsa bitititə tsa ta dapə ghumə
11
Ghala vəghu tsa va kiy, ghani kutiŋ na niy gəzə mbəzli tə hiɗi gwanashi. kuma kutiŋ niy nza sa shi. 2 Ma sa kafə ghəshi kwa ghumə ki na, mbaʼ ghəshi kəsata ngula kala kəleŋer ti, tə hiɗi Shineyar. Mbaʼ ghəshi nziyshi tiɓa. 3 Ma tə nahuti vici, a kə ghəshi kwa jipə tsa shi na: «Dzammə ta dəʼu brikə, nza ghummə nditi mbə ghu» kə ghəshi. Sa dəʼuti ghəshi ki na, ka məjəɓa hərezli ghəci və shi, ta ndəɓə shiy. Mbaʼ shiy nja dimə ta jakə brikə tsa va mbə nga shiy. 4 Ma kə ghəshi diɓa ki na: «Dzammə ta ngavə məlmə ghummə, mbaʼ ghummə ndəɓəghə ciki bitititə paʼa ka dapə ghumə diɓa. Ghalaɓay, mbəzli tə slən dza ghummə nza, ka dza ghummə ndaniva dzar tə hiɗiw,» kə ghəshi.5 Ma tə nahuti vici ki na, dza Kwa sləkəpə mbaʼ səkwata səəkə mə ghumə ta nighə məlmə nga ke ngəri tə hiɗi va, lə ciki tsa bitititə tsa va nga ghəshi. 6 Ma sa nata na sləni məni ghəshi va ki, ma kə mbə nəfə nzə na: «Sana kiy, avanashi mənishi ka hulfə mbəzli kutiŋ, ghani kutiŋ gəzə ghəshi gwanashi. Kwa ʼwati ghəshi jakə miy tsa shi ta məni kuma tsətsiy, ya wa shi dza ghəshiy ɗi məni dzaa nza na, shiy tiɓa dzaa makətishiw,» kə, ka zhataa zhimə ghumə. 7 Ma kə ki na: «Dzəghwa ghummə a ghummə dzaa dzədzəvəɗivəri ghani shi va, kala dza tsahuti favə kuma dza tsahutiy gəzə,» kə. 8 Sa mənta na tsəgha ki na, dza Kwa sləkəpə mbaʼ ndandanivərishi dzar tə hiɗi gwaʼ gwaʼa, bashi ghəshi bashanti nga məlmə va ki. 9 Va tsəgha Har məndi məlmə vaa Babel, ɗi naa gəziy dzəvəɗi, sa nzanay, tiɓa niy dzədzəvəɗivəri Kwa sləkəpə ghani kutiŋ na va niy gəzə ke ngəri tə hiɗi. Tiɓa mbəzli niy kafə ta ndandaniva dzar tə hiɗi diɓa.
Jijihiy Sem paʼa tə Abəram
10 Avanashi mbəzliy səvəri mbə Sem: Sa mənti Sem piya bakə liy hum yaməə niy zanti mbəzli vay, baw yakə Arəpakəshadə. Ghalaɓay, piya bələku niy nza sa ci. 11 Liy hum sa yakə na Arəpakəsadiy, piya bələku bələku cifə niy zhini naa mənti tə hiɗi, mbaʼ niy yakə nihuti ndərazhiy zhər, lə ghyehi gwaʼa.
12 Sa mənti Arəpakəshadə piya mahəkanə mətsəkə cifətiy, dzəghwa na baw yakə Shela. 13 Liy hum sa yakə na Shela na, mbaʼ zhiniy mənti piya bələku bələku faɗə mbaʼ mahəkanə ghən kən tə hiɗi, mbaʼ niy yakə nihuti ndərazhiy zhər lə ghyehi gwaʼa.
14 Sa mənti Shela piya mahəkanəmətsəkə na, dzəghwa na baw yakə Eber. 15 Liy hum sa yakə na Eber na, mbaʼ zhiniy mənti piya bələku faɗə mbaʼ mahəkanə ghən kən tə hiɗi, mbaʼ niy yakə nihuti ndərazhiy zhər lə ghyehi gwaʼa.
16 Sa mənti Eber piya mahəkanəmətsəkə faɗətiy, dzəghwa na baw yakə Pelegə. 17 Liy hum sa yakə na Pelegə na mbaʼ zhiniy mənti piya diwiy diwiy faɗə mbaʼ mahəkanəmətsəkə ghən kən tə hiɗi, mbaʼ niy yakə nihuti ndərazhiy zhər lə ghyehi gwaʼa.
18 Sa mənti Pelegə piya mahəkanəmətsəkiy, dzəghwa na baw yakə Rewə. 19 Liy hum sa yakə na Rewə na, mbaʼ zhiniy mənti Piya diwiy bakə mbaʼ məsliɗə ghən kən tə hiɗi, mbaʼ niy yakə nihuti ndərazhiy zhər lə ghyehi gwaʼa.
20 Sa mənti Rewə piya mahəkanəmətsəkə bakətiy, dzəghwa na baw yakə Serugə. 21 Liy hum sa yakə na Serugə na, mbaʼ zhiniy mənti piya diwiy bakə mbaʼ mbərəfəŋ ghən kən tə hiɗi, mbaʼ niy yakə nihuti ndərazhi zhər lə ghyehi gwaʼa.
22 Sa mənti Serugə piya mahəkanəmətsəkiy, dzəghwa na baw yakə Nahur. 23 Liy hum sa yakə na Nahur na, mbaʼ zhiniy mənti piya diwiy diwiy bakə tə hiɗi, mbaʼ niy yakə nihuti ndərazhiy zhər lə ghyehi gwaʼa.
24 Sa mənti Nahur piya bakəmətsəkə məsliɗətiy, dzəghwa na baw yakə Tera. 25 Liy hum sa yakə na Tera na, mbaʼ zhiniy mənti piya bələku mbaʼ məŋə lə məsliɗə ghən kən tə hiɗi, mbaʼ niy yakə nihuti ndərazhiy zhər lə ghyehi gwaʼa.
26 Sa mənti Tera piya mbərfəŋəmtsəkiy, dzəghwa na mbaʼ yakə kar Abəram lə Nahur mbaʼ Haraŋ.
27 Avanashi jijihiy Tera dəshi kar Abəram lə Nahur mbaʼ Haraŋ: Baw Haraŋ yakə Lutə. 28 Dzəghwa Haraŋ mbaʼ mətiy pərɓa ghəci kaa Tera, diy. Mbə məlmə yakə məndi niy mətiy na, məlmə Ur, tə hiɗi ka Babiluni. 29 Dzəghwa Abəram, mbaʼ ɓəvə mali, Saray, kə məndi kaa slən tsa nzə. Mbaʼ Nahur ɓəvə na ci, Miləka, kə məndi kaa slən tsa nzə, zha Haraŋ. Haraŋ tsa vay, ghəci niy yakə na Isəka diɓa. 30 Saray nanzə kiy, niy nza zəghu vuw, jəŋa niy nza na.
31 Dzəghwa Tera ki, mbaʼ pəməvə kar zəghu ci Abəram mbaʼ Lutə jijiy, zəghu Haraŋ, mbaʼ pəməvə Saray mali Abəram, makwa ci va diɓa, mbaʼ kafiy li shi mbə məlmə Ur tə hiɗi ka Babiluni, ta dzay dzəti hiɗi Kanahaŋ. Ma sa tsəhəshi ghəshi mbə məlmə Haraŋ na, mbaʼ ghəshi nziyshi mbəɓa, kala tsəhəshi ma tə hiɗi Kanahaŋ. 32 Ma sa mənti Tera piya bələku bələku bakə mbaʼ cifə ghən kən na, ɓəlahə mətiy mbə məlmə Haraŋ.