8
Liy hum ki na, dzəghwa Kwa sləkəpə mbaʼ zəzətiy dzəkən Nəwe, mbaʼ dzəkən dəmbəkə tsa kiy ghyi gwanay, mbaʼ dzəkən shiy dza səɗa mbə gamba va gwanashi niy nza mbə kwambəwal kwasəbə. Sa zəzəti naa dzəkən shi ki na, dza na mbaʼ viyəkə safəə dzəti hiɗi, dzəghwa yam, mbaʼ ghəshi ʼwati mbasə tə hiɗi. 2 Dzəghwa mətsəhi yaməə səəkə mbə hiɗi lə niy səəkə mə ghumə, mbaʼ ghəshi kəlishi, mbaʼ van garəti nzəmə ki. 3 Dzəghwa mbaʼ yam ghati mbasə juw juw juw tə hiɗi. Mbə vici bələku na va mbaʼ cifəmətsəkə ghən kən ki na, mbaʼ yam mbasatavashi. 4 Ma tə kwa məŋə lə mbərəfaŋa vici, tə kwa mbərəfaŋa tir ki na, dzəghwa kwambəwal gar garəta mə ghən dəlagwa har məndiy dəlagwa Araratə. 5 Paʼa tə kwa maŋa tir na, war ghulashi yam va niy nza mbə mbasə. Ma tə kwa taŋa vici tir tsa va na, mbaʼ ghən tsa dəlegwigwi ghati pəəzli.6 Vici faɗəmətsəkə liy hum sa ʼwati ghən tsa dəlegwigwi va pəəzli ki na, dzəghwa Nəwe ɓəŋ ghunanti mergi tsaa niy manati na vaa dzəti kwambəwal. 7 Dza na baŋ kəsəvə ghaməkə, waɗə pəlikəvəri səvəri kwaɓa. Sa dza ghaməkə na, zliʼ zliʼ zlivə zli, mbaʼ zhikəta, war tsəgha, war tsəgha, ɗaŋ səɗa, sa niy nza yam ghulaa mbasə paʼa tə hiɗi. 8 Sa bərkəti Nəwe diɓa na, dzəghwa na mbaʼ kəsəvə dighəliy pəlikəvəri, ta mbə ghəciy sənay nda mbasəshi yam paʼa tə hiɗi. 9 Ma dza dighəli na, shaŋ ghənzə ta nay pi tsaa laʼu ti, sa nza yam ghulashi rayiyi tə hiɗi. Kə tərəviɗə zhəghəkəvata, ta zhimbə kwambəwal zhəvəgha Nəwe. Dza Nəwe ki, mbaʼ ɓanakəvəri dəvə kwa mergi, mbaʼ zhanambə mbə kwambəwal. 10 Sa mənti na vici mbərfəŋ na, zhini na waɗə pəlikəvəri dighəli va diɓa. 11 Ma hetihwer na, mbaʼ tsahuta lə məɗaɗa fə har məndiy ulivə mbə miy nzə. Sa nata Nəwe tsəgha ki na, mbaʼ sənay, a yam mbasəshi tə hiɗi nana, kə. 12 Dzəghwa na diɓa, mbaʼ mənti vici mbərfəŋ, kə mbaʼ pəlikəvəri dighəli ɓa. Sa dza dighəli mbə nava ki na, kala zhəghəvaa zhikə.
13 Ma tə piya mənti Nəwe piya bələku bələku kwaŋ mbaʼ kutiŋ ghən kən ki, fəca kwa taŋa vici tə kwa taŋa tir ki na, mbaʼ yam kərəshi tə hiɗi. Dzəghwa Nəwe ki, mbaʼ balanti shiy niy dəʼwakən na vaa dzəkən ghən kwambəwal. Sa nə na kəɗaŋ kə kaa pi tsa tə hiɗi na, ghuli ghuli ghəci. 14 Tə kwa bakəmətsəkə mbərfəŋti vici, tə kwa baka tirəy, cəkeʼ niy mbasantəvashi yam tə hiɗi.
15 Dzəghwa ma kə Hiyala kaa Nəwe ki na: 16 «Səvəriŋuyim mbə kwambəwal ghuy lə mali gha, mbaʼ ndərazhi gha, mbaʼ miʼi shi. 17 Ka gha dza diɓay, mbaʼ gha pəlikəvəri slən takə shiy dza səɗaa nza va mbəɓa kwasəbə gha, tsəgha slən igu, mbaʼ slən dəbəkə, mbaʼ slən shiy dza lə hur. Cəkeʼ pə gha pəlikəvərishi a ghəshi ndaniva dzar tə hiɗi, nza ghəshi yava, ka tava tə hiɗi,» kə 18 Sa gəzanakə Hiyala tsəgha ki na, dzəghwa Nəwe mbaʼ səvəriy mbə kwambəwal ghəshi lə mali ci, mbaʼ ndərazhi ci, mbaʼ miʼi ndərazhi ci va. 19 Liy hum shi ki na, dza slən shiy dza səɗa, lə slən niy dza lə hur, lə slən igu, lə ya nimaɓa shiy kufəghə tə hiɗi, ka havaa səvəri njasa nza takə tsa shi.
20 Dzəghwa Nəwe ki, mbaʼ ngakati pi, ta ta Kwa sləkəpə ti. Dza na, bəhu bəhu kəəsəvə slən takə dəmbəkə tsa ɗewɗew tsa kwa kuma Kwa sləkəpə, mbaʼ slən takə ʼegwer ɗewɗew ni diɓa, mbaʼ ndanatishi kaa Kwa sləkəpə, tə pi tsa va. 21 Wəzə Kwa sləkəpə favə zən tsa sliw tsa va. Ma kə mbə nəfə tsa nzə na: «Tə mbərkə ndə ngəriy, ka zhinee ɓə bəzla zhiti hiɗi ghulaw. Ya tsəgha ka ndə ngəriy nza lə kuma jikir na mbə nəfə ci ghala ghəci jiwuyəy, ka dzee zhiniy za slən shiy piy njasa məntee tsa ghulaw. 22 Kama hiɗi tiɓashiy,
war mbə za shiy dza mbəzli nza, ka məni shiy səəkə kwaməti.
Ta nza dza vəghu tasli tiɓa, lə vəghu ghutəghutə,
tiɓa viya, tiɓa ghəli,
tsəgha vəghu lə virɗi.
Shiva gwanashiy, ka dza ghəshiy bashi nza tiɓaw.