Nəwe dzay dzəmbə kwambəwal
7
Ma kə Kwa sləkəpə kaa Nəwe ki na: «Mbalam dzəmbə kwambəwal lə mbəzli kiy ghyi tsa gha gwanashi, sa nzanay, gha kutiŋa na sa nayee nuw kuma lə kwal tsa nzə, mbə mbəzli mbə vəghu tsa sənzənva tsa. 2 Sa ka gha dzay, mbaʼ gha kasambə kar zal lə mali, kar zal lə mali mbərfəŋ mbə slən takə shiy dza səɗa ɗewɗew ni kwa kumee. Ma shiy dza səɗaa kama ɗewɗew ni kwa kumayay, kwataka saa zal kutiŋ, mbaʼ saa mali kutiŋ pə gha dzaa kəəsəvə ta dzəmbə kwambəwal va li shi. 3 Ka gha dza kaa ʼegwer diɓay, kar zal lə mali, kar zal lə mali mbərfəŋ gha kəəsəvəshiy dzəmbə, ta mbəə ndəghuti slən takə igu tsa tə hiɗi. 4 Vici mbərfəŋ tərə na yən dzaa nzəmə van dzəti hiɗi. Vici faɗəmətsəkə, mbaʼ virɗi faɗəmətsəkə dza naa mənti mbə nzəmə, kala garə ma. Kərəpə dzee ta zanti slən saa piy tsa ngatee dzəti hiɗi,» kə. 5 Dzəghwa Nəwe ki, mbaʼ dzaa mənti war njasa gəzanakə Kwa sləkəpə va.Yam tərəŋu ni zanti hiɗi
6 Ghala pi tsaa səəkə yam va ta zanti mbəzli tə hiɗiy, piya bələku bələku kwaŋ niy nza sa Nəwe. 7 Dzəghwa kar Nəwe lə mali ci, mbaʼ ndərazhi ci, mbaʼ miʼi ndərazhi ci, təhu, ghəshi dzashiy dzəmbə kwambəwal, ta mbə ghəshiy mbəlishi va yaməə dza va ta zanti mbəzli ki. 8 Dzəghwa shiy dza səɗa ɗewɗew ni lə niy kama ɗewɗew ni kwa kuma Hiyala, mbaʼ ʼegwer, mbaʼ ya nima shiy dza tə hiɗi. 9 Bakə bakə bakə ghəshi səəkəshi dzəmbə kwambəwal va, dzəvəgha Nəwe. Zal lə mali, zal lə mali njasaa niy gəzəkə Hiyala va. 10 Liy hum vici mbərfəŋ ki na, mbaʼ yam ka zapə va kalay pi tsa tə hiɗi.
11 Tə piya mənti Nəwe piya bələku kwaŋ tə hiɗi, fəca kwa məŋ lə mbərfəŋ vici, tə kwa baka tir tə piya vay, dzəghwa mətsəhi yam ɓəŋ, ɓəŋ ghəshi ghughunishi ka hu tərəŋu tərəŋu, səvəri mbə hiɗi, zhini tsəgha ni mə ghumə shəkəvaa dzəti hiɗi. 12 Dzəghwa van ki, war ka nzəmə, war ka nzəməə dzəti hiɗi, ta məni vici faɗəmətsəkə mbaʼ vərɗi faɗəmətsəkə. 13 Fəca gha van tsa va nzəmə kiy, mbaʼ kar Nəwe lə ndərazhi ci, Sem lə Sham mbaʼ Zhafetə, mbaʼ mali ci, mbaʼ miʼi ndərazhi ci va mahəkanə ni dzashiy dzəmbə kwambəwal, 14 mbaʼ slən takə tsa shiy dza səɗa kwaməti, lə slən takə dəmbəkə tsa kiy ghyi, mbaʼ slən takə shiy dza lə hur, mbaʼ slən takə ʼegwer, mbaʼ slən takə tsa shiy zli juw juw ni. 15 Ya nimaɓa shiy piy tə hiɗiy, mbaʼ ghəshi səəkəshiy dzəmbə kwambəwal vaa dzəvəgha Nəwe, bakə bakə bakə. 16 Kar zal lə mali, kar zal lə mali niy dzashi takə shiy dzəmbə kwambəwal va njasa niy gəzanakə Hiyala va kaa Nəwe. Sa dzəmbəshi ghəshi gwanashi ki na, dzəghwa Kwa sləkəpə dislə kalay miy pi tsaa dzəmbə kwambəwal vaa dzəkən Nəwe.
17 Dzəghwa van tsa tərəŋu tsa va ki, vici faɗəmətsəkə ghəci mənti mbə nzəməə dzəti hiɗi. Sa maɗi yam təhəshi tə hiɗi ki na, kafə ghəshi kafakati kwambəwal, ɗalaw ghənzə tə ghən yam. 18 War ə yam vaa mətsəhəva, war ka mətsəhəva zlelə ghəshi təhay pi tsa tə hiɗi, ma kwambəwal nanzə ki na, ɗalaw, ɗalaw ghənzəə dziy tə ghən yam. 19 War ə yam vaa zhiniy mətsəhəva tərəŋu tərəŋu, paʼa ka zanti dəlegwigwiy guranti bitə bitə ni tə hiɗi 20 Mbaʼ yam va zhiniy mətsəhəshi gar taŋəti metər mbərfəŋ dzəkən ghən dəlegwigwi va. 21 Slən shiy piy ka kufəghə gwanashi tə hiɗiy, kərəpə niy zashi ghəshi. Ya igu, ya dəmbəkə, ya shiy dza səɗa kwaməti, ya shiy dza lə hur gwanashi, ya ke ngəriy gwanashiy, niy tərə ghəshiw. 22 Ya nimaɓa shiy piy kwa kəshən, ka piy tə hiɗiy, cəkeʼ niy bekushi ghəshi. 23 Ava tsəgha zanti Kwa sləkəpə slən shiy niy piy tə hiɗi. Ꞌwava na tə ndə ngəri, paʼa tə shiy dza səɗa dikə dikə ni, lə niy dza lə hur, mbaʼ ʼegweriy, cəkeʼ niy zantishi Kwa sləkəpə. Kwataka Nəwe lə mbəzliy niy nza kwasəbə mbaʼ nihuti shiy niy nza mbə kwambəwal na shiy niy tərəmbə.
Njasa səvəri Newe kwa kwambəwal
24 War zlelə yam nziyshi tə hiɗi, vici bələku mbaʼ cifəmətsəkə ghən kən ghəshi mənti war tsəgha.