Yaməə niy zanti mbəzli
Hiyala tarəkə zanti mbəzli tə hiɗi
6
Dzəghwa ki, mbaʼ mbəzli ghati yava tə hiɗi. Mbaʼ ghəshi yavə ghyehi. 2 Mbaʼ ghyehi va təɓanatishi kaa mbəzli mə ghumə, dza ghəshi mbaʼ ghəshi təravə ghyehi mbə shi, mbaʼ ghəshi ɓətəvashi li shi. 3 Dzəghwa ma kə Kwa sləkəpə ki na: «Ka dzee zlay ndə ngəriy va paʼa kwa ndimndim mbə piy lə safə tsee va viyambee mbuw. Shiy dzaa bekushi na ghəshi, Nanay, ka dza hi tsa shi tə hiɗiy taŋəti piya bələku mbaʼ bakəmətsəkə ghən kənuw,» kə. 4 Ghala vəghu tsa vay, mbəzli biti biti ni niy nzana tə hiɗi. Paʼa liy hum vəghu tsa vay, a mbəzli va niy nza tiɓa. Mbəzli vay, ka bərci mbə vəghu tsa kwataŋa niy nza ghəshi, tərəŋu niy nza bama ti shi, səvəri mbə jakəva tsa mbəzli mə ghumə lə mbəzli tə hiɗi niy yakəshi məndi.5 Nighə kə kwa Sləkəpə na, war ə ke ngəriy mətsəhə məni kuma jikir na tərəŋu tərəŋu tə hiɗi. kuma mbə nefer shi gwaʼ gwaʼa na, war kuma jikir na gwaʼa tsəgha, njasa səəkə vici. 6 Sa nata Kwa sləkəpə kuma va tsəgha na, tərəŋu nəfə tsa nzə zhanati. «Yən sənay nzay, ka nga ndə ngəree dzəti hiɗiw,» kə. 7 Ma kə ki na: «Ta zanti ke ngəri məntee ni dzee tə hiɗi, lə shiy dza səɗa ta, ni dikə dikə ni lə ni jiw juw ni gwaʼa, lə ʼegwerəta gwaʼa. Kay, yən sənay nza na navay, ka ngashi yaw,» kə. 8 Ya tsəgha nzə kiy, mbaʼ Kwa sləkəpə mananati wəzə hur kaa Nəwe.
Hiyala tarəkə mbəliti Nəwe
9-10 Nəwe tsa vay, ntsaa nuw kuma lə kwal tsa nzə, mbaʼ kəsəvə kuma Hiyala lə nəfə kutiŋ niy nzana mbə mbəzli ghala vəghu tsa va. Ghəshi lə Hiyala niy nzana mbə nziy tsa ci. Mahəkanə niy nza ndərazhi və, kar Sem, mbaʼ Sham, mbaʼ Zhafetə. Avanata mbəraghuti ci:
11 Mbəzliy piy tə hiɗi gwanashiy, mbəzli gəmgəm ni niy nza ghəshi kwa mətsə Hiyala. War shi gəmgəm ni niy məni ghəshi. 12 Njiʼu kə Kwa sləkəpə kaa mbəzli tə hiɗi na, gəmgəməshi ghənzə nashi, sa nzana gwaʼ gwaʼa gwaʼa mbəzli tə hiɗi yiɗivəri nziy tsa shi. 13 Sa nata Hiyala kuma va tsəgha, ma kə kaa Nəwe ki na: «Sa nighə yay, gwaʼa nzee lə kuma mbəzli tə hiɗi gwanashi, sa nzanay, a ghəshi təhay pi tsa tə hiɗi lə kuma jikir na. Ta zantishi dzee tə hiɗi. 14 Na na ghay, mbala a gha dzaa daŋuvə kwambuwal dikə, tə shighu ka bərci. Ɗaŋ gha titihəvəri ceker mbəɓa, nza gha hway mbəɓa mbəɓa lə pərikə pərikə lə dimə va yam. 15 Avanay njasa ka gha daŋu kwambuwal va: Bitə tsa nzə dzati dzatiy, metər bələku mbaʼ cifəmətsəkə ghən kən kə dzaa nza, ma buŋ tsa nzə dzar dzar na metər bakəmətsəkə cifəti, bitə tsa nzəə dzəta ghumə na, metər məŋə lə cifə. 16 Sa ka gha dzay, mbaʼ gha dəʼuti kwa ghən tsa nzə nja ciki. Kwa jipə shighu dza gha vaa dəʼuti sar vəgha slərpə nzə lə ni dza gha vaa dəʼuti mə ghəniy, tərəmbiy tə gha mergi gar təhə metər bakə mbə. Ka gha dza diɓay, mbaʼ gha tərəmbiy miy pi tsaa dzəmbə vəgha slərpə nzə. Ka gha dza mbəɓa mbəɓa na, mbaʼ gha tihəvəri mahəkanə mbə, mbaʼ takə takə, mbaʼ mbə jipi, mbaʼ mə ghən mə ghən. 17 Sa ka gha daŋwamti kiy, na nee na ta təhay pi tsa tə hiɗi dzee lə yam ɗaŋ tərəŋu, ta mbəə zanti slən shiy piy tə hiɗi, kərəpə dza shi tə hiɗi gwanashiy zashi. 18 A na na gha na ghay, ee tarəkə jakəva lə gha ta mbəlantəŋa, nza ghuy dzəmbuŋiy dzəmbə kwambuwal lə mali gha, mbaʼ ndərazhi gha, mbaʼ miʼi ndərazhi gha. 19 Ka gha dza diɓay, bakə bakə bakə gha kambə slən hulfə saa piy tə hiɗi, kar zal lə mali, ta mbə ghəshiy nza tə ghuməshi kwasəbə gha. 20 Kar Zal lə mali dza slən takə saa dza səɗa, mbaʼ slən takə igu lə slən takə saa dza lə hur səəkəə dzəvəgha gha, ta mbə ghəshiy mbəlishi. 21 Ɓasəti tə gha shi zəmə tə hiɗi ghənghən ghənghən nza gha fiy shi, ta mbə ghuy zəməshi li shi,» kə Hiyala kaa Nəwe. 22 Sa gəzanakə Hiyala tsəgha na, mbaʼ Nəwe dzaa mənti war njasa gəzanakə na va.