kuma pəhəti Kwa sləkəpə lə Nəwe
9
Dzəghwa Hiyala ki mbaʼ təfanatishi miy kaa kar Nəwe lə ndərazhi ci, ma kə kaa ngəshi na: «Ya pə ghuy ya, ka tava, ka təhay pi tsa tə hiɗi. 2 Slən shiy dza səɗa tə hiɗiy, ta hazləni dza ghəshi va ghuy, tsəgha ʼegwer gwanashi, lə kərpi mbə yam gwanashi, lə shiy dza lə hur gwanashi. Mbə dəvə ghuy dza shi vaa nza gwanashi. 3 Njasa niy ndaŋuy ya va kəslifə er tə hiɗi ta zəməshi ghuyiy, tsəgha ndaŋuy ya shi nza piy mbə shi kufəghə tə hiɗi gwanashi ta zəməshi ghuy. 4 Nanzə kiy, əntaa ghuy zəmə shiy kala shəkəshi miymiy mbə shi ma. Sa nzanay, piy tsa mbə saa dza səɗa na miymiy va. 5 Miymiy mbə vəgha ghuyiy, piy tsa mbə ghuy na ghəshi kuraku, ta ɗuw kuma kən shi dzee. Mbaʼ kə saa dza səɗa pəəsliti ndə ngəriy, ta slanakən nguvə dzee. Ya tsahuti ndə ngəri pəəsliti na tsahutiy, ta slanakən nguvə dzee. Ka dzee zlay ɗuw kumaa dzəkən piy tsa ndə ngəriw. 6 Mbaʼ kə ndə ngəri shəkati miymiy tsahuti ndə ngəri tə hiɗiy, tsəgha dza tsahuti ndə ngəriy shəkati ni tsavaa dzəti hiɗi kuraku. Sa nzanay, dzəghwa pa nzə ngati Hiyala ndə ngəri. 7 Na na ghuy na ghuyiy, ə pə ghuy ya, ka tava, ka mətsəhəva ɗaŋ, ka təhay pi tsa tə hiɗi,» kə Hiyala.8 Zhini ma kə Hiyala kaa kar Nəwe lə ndərazhi ci diɓa na: 9 «Avee taa pəhəti kuma kwa jipə tsee lə ghuy lə kwa jipə tsee lə jijihiŋuy ghula ni ta ya, 10 lə kwa jipə tsee lə slən shiy piy kwasəbə ghuy: ʼegwer lə dəmbəkə, mbaʼ saa dza səɗa tsa mbə gamba, slən shiy səvərishi mbə kwambəwal kwasəbə ghuy, lə ni ghula ni ta yaa dzəti hiɗi gwaʼa. 11 Avanata kuma pəhətee va: Ka məndi nzay, ka dzee ɓə yaməə zapə səəkə ta zanti piy tsa mbəzli tə hiɗi ghulaw. Ka dza yaməə zapə nza tiɓa ta zanti shi tə hiɗi ghulaw,» kə. 12 Ma kə Hiyala diɓa ki na: «Avanaɗa dzaa mənti shiy, ta ci kuma pəhətee na kwa jipə tsee lə ghuy, mbaʼ slən shiy piy sənzənva lə niy dzaa piy taa nza. 13 Avee fiy ɓəriŋ tsee mbə kuleɓi, ti dza məndiy zəzə kuma pəhətee na kwa jipə ghiy lə shi tə hiɗi. 14 Ya humɓa, sa kee ɓasəti kuleɓi dziy tə ghumə, mbaʼ ɓəriŋ təzliy mbə shiy, 15 ta zəzə dzee dzəkən kuma pəhətee va kwa jipə tsee lə ghuy mbaʼ ya lə nimaɓa slən shiy piy tə hiɗi. Ka dza yaməə zapə səəkəə dzəti hiɗi ta za slən shiy piy ghulaw. 16 Sa dzee nay ɓəriŋ təzliy mbə kuleɓiy, ta zəzə dzee dzəkən kuma pəhətee va ta kwa ndimndim kwa jipə ghiy lə slən shiy piy tə hiɗi,» kə. 17 Ma kə Hiyala kaa Nəwe diɓa na: «Ɓəriŋ tsa va dza naa ci kuma pəhətee va kwa jipə ghiy lə slən shiy piy tə hiɗi,» kə.
kumaa dzəkən ndərazhi Nəwe
18 Kar Nəwe lə ndərazhi ci, Sem, Sham mbaʼ Zhafetə na shiy niy səvərishi mbə kwambəwal. Shaməy ghəci niy nza diy Kanaŋ. 19 Ava ghəshi niy nza ndərazhi Nəwe mahəkanə ni, mbə shi səvəri mbəzli tə hiɗi gwaʼ gwaʼa.
20 Nəwe na kwa taŋa ndə za, mbaʼ zati rezeŋ, shi ka məndiy ta tay li shi. 21 Sa tati na tay ki na, mbaʼ sahu, dza na mbaʼ ghyamtəvay, sərə sərantəvay hasəy mbə ciki gamtaʼwal tsa ci. 22 Dzəghwa Sham diy Kanaŋ mbaʼ nay diy tsa va hasəy, kə mbaʼ səvəriy tə ngulaa gəzanshi kaa ngwarmbəghiy bakə ni va. 23 Sa favə kar Sem lə Zhafetə na, dza ghəshi laŋ ghəshi ɓəvə kubaŋ tsa dəshi, bəm ghəshi fati tə bezlizli shi bakanashi, kə ghəshi ka dzaa dzəmbə ciki tsa va liy hum liy hum. Sa dzəmbəshi ghəshi na, mbaʼ ghəshi pəlanakən kaa dəshi. Niy nay dəshi ghəshi hasəy sa niy nza kumashi ka səvəriw. 24 Ma sa kəɗiy tay mbə ghən Nəwe ki na, mbaʼ favə kuma mənti tsa juw tsa va zəghu ci, 25 ma kə ki na:
«Ntsa bazla bazla tsa kə Kanaŋ,
«Əə falee kwa sləkəpə, Hiyala fal Sem.
Mava tsa Sem kə Kanaŋ taa nza.
27 Nza Hiyala mətsahanavə ngula bəŋw kaa Zhafetə
mbaʼ nziyiy tə pi kuti lə Sem,
ma nza Kanaŋ nzaa mava tsa shi» kə.