Matʉ́wa kó bhombi bhobhomu kɨ́sɨká kanisa
2
Píi ɨwʉ, bhélé mopóbho-mbá atɛ́lɛlɛ na mápanʉ má yǎngu.2 Bhɛmɛtʉ bhakʉ́lʉ bhékí bhombi-mbá bhásɨ́ na nalɨ́lɔ yé kímbó, ɨ́mba atɛ́lɛlɛ kábhʉmbàtɨa, bhombi bhá ʉtambànaga wɛ́pɛpɛ́, ɨ́mba bha na ʉbhɨ́sɨ̀a, nɛ dhɨkʉ́nda, ne vekese wá mʉ̌ma kɨ́sɨká yǎngu.
3 Bhokúbhokólí kágǎ anɨ́, bhékí nɛ dhɨsɨnga-ndɨ́ etélélí no bhombi-mbá Azapana obhúlowí. Bhakení bhombi bhɛ́ nɛ́lɛgɛlɛgɛ, bhakení na nalɨ́lɔ wa makáná, bhékí na mápanʉ mɛ́pɛpɛ́, 4 dhɨtɛ́dhɨ́ bhɔ́ bhábhʉ́panɨ́ɨ́ bhokólí bhasɨka kákʉ́nda bhɛmɛtʉ mbɔ́kɔ́wɔ na kʉ́nda bhɔnɔ́wɔ, 5 kéke na támbànaga wɛ́pɛpɛ́, bhombi bhá mʉ̌ma-mbʉ́takatɔwɔ́, káza kʉtɨ́ká kɔ́ bhɔlɔ́gɔ mbɔ́kɔ́wɔ, kéke bhánza, kɔ́bhɔ́kɨɔ bhɛmɛtʉ mbɔ́kɔ́wɔ, dhɨtɛ́dhɨ́ bhɔ́ Dhipóbho ndɨ́ka Azapana asòsikonogoní.
6 Kâ bháganzá bhʉ́tʉ́wá kéke na támbànaga wɛ́pɛpɛ́. 7 Kísikó mopóbho mobhomu, ɨwʉ mombólóbhi dhiké ʉ'sʉ̀mbʉ ɨ́mbʉ bhombi bhabhɛlɨɛ́ wá matandá mɛ́pɛpɛ́, kɨ́sɨká mápanʉ mɛ́pɛpɛ́, ɨ́mbámbatɨɔwɔ́. 8 U'bhélé mbwakʉ ékí wáyǎngu, ɨ́mbʉ ásɨ́ no mombi-yɔ adhódho, dhɨtɛ́dhɨ́ bhɔ́ mombi u'bhomu wo dhóngósó ápátɨ́ soni, képosa ásíke ne dhipóbho dhówówo ɨ́ndɨ abhéle kɛ́-gʉlʉ́ nzikosú.
9 Bhʉ́tʉ́wá bhamɨya kéke nɛ dhɨzɨɔ na bhangámá mbɔkɔ́wɔ kó mopóbho mobhomu, bhékí na matandá mɛ́pɛpɛ́-mba bhangámá mbɔkɔ́wɔ bhabhʉ́bhɨ́sɨa-pɔ́wɔ, bhakení bhombi bhó dhóngósó, 10 bhǎbhení kímbó, píi kɛ́ nɛ́dhɛngɛ u'bhomu bhɛ́nɨ́kɛ́nɨ́ bhɔ́ bha bhombi-mbá bhetélélí kébhúbǐsie mʉ̌ma, dhɨtɛ́dhɨ́ bhɔ́ kísikó mopóbho mobhomu bhópumbí dhɨ́panʉ ndɨ́ka Azapana Ambosó kosú.
Ngasa nzɨka Azapana
11 Képosa ngasa nzɨ́ka Azapana ínzímboisowó bhombi bhobhomu, eníkénító mbúndú, 12 ɨ́nzɨ a nebhósú kápanɨa kátála uwówo, na afěfé wo mopóbho mó nokúnzi, kéke nɛ dhɨsɨnga-ndíbhólikonowó, na uyǎngu, na ʉ'kpakpana Azapana, kɨ́sɨkɛ́ ɨzɛzɛ yé gěgenzí yó nokúnzi-nzɔ, 13 kanábhʉ́ndàga dhɨsá-ndɨ ʉtámbànaga mbúkosú wá bhaláka anɛnɨkɛnɛ̌ká-pɔ́wɔ, nɛ dhɨ́bɨba ndɨ́ka Azapana wenénuwó Ambosó kosú, Yezu Kílísitó. 14 Ɨyɨ́ ówóni-ndɛ́ mombólóbhi ké-póbho ndíkosú, dhɨtɛ́dhɨ́ bhɔ́ ótúdisí kísikó uwówo u'bhomu, na átʉ́sʉkʉ́sɨ́ bhɔ́ kékí bhombi mbasɨ mombólóbhi, ɨ́mba bhabhótúmo na afěfé káza matandá mɛ́pɛpɛ́.
15 Hɨ̌nzɨ abhɔ̂, bhélé mopóbho-mbâ, tʉ́wá bhombi, bhʉ́mɛnɨ́ɛ́ yɛ́kpɛ́. Mombi atápɔ́ motí akʉ̀dɛkɨɛnɨ́.