Dhɨsɨnga dhá Bháklísitó
3
Bhútómbósíó Bháklísitó kéke nɛ dhɨzɨɔ kó bhogbukúlu, na kó bhokúmú, kɔ́bhɔ́kɨ̀ɔ, ne-ke bhɔ́bhɛ́lɛ́ káza kʉtɨ́ká kubhomu kwɛ́pɛpɛ́. 2 Bha'sòsogoní mombi, bhakení bhombi bhɛ́ dhɨmànʉ, bhékí bhombi bhá mʉ̌ma-mbʉ́dɛkɔwɔ́ na ʉpana dhɨzɨɔ kó bhombi bhobhomu. 3 Képosa ndɛ́lɨ nebhósú tàla kébhí-ásɨ́ na mʉlʉ́ wé dhibhólú, kebhí bhombi bhá mányɛ́nyɛ́ na bhé dhibhúngògo. Afěfé wo mopóbho mó nokúnzi nɛ dhɨzɔzɔ dhó mopóbho mɛ́ngangá étúbǐsi-ndɛ́ kʉmɨya. Kebhí bhéke kísikó uwówo nɛ̌-nɨɛnɛ mise mówówo, kebhí bhombi bhá nanyálá, kanányálana bhósú ké bhósú. 4 Píi kɛ́ nɛdhɛ̀ngɛ-yɔ ʉnzá mbʉka Azapana Ambosó kosú, nɛ dhɨkʉ́nda ndyasɨ kó bhombi eníkéní-pɔ́wɔ, 5 ásɨ́ kɛ́-gʉlʉ́ yá matandá má yǎngu ɨ́mba bhósú kozǐ, dhɨ̌sʉ kó kokó nzyasɨ, hɨ̌nzɨ otúmboísí-pɔ́mʉ. Otúsukúsógǐ kɛ́ dhɨbhɔ́kɔtɔnɔ-ndɨ́tɔ́wɔ, na otúlótósí kéke bhombi-mbɔ́tɔ́wɔ kɛ́ ʉkpɛ́ wá Mʉlʉ́ma-mbʉ́kwálɔwɔ́. 6 Képosa Azapana ótúsùliogi-ndɛ́ Mʉlʉ́ma-mbʉ́kwálɔwɔ́ unéni bhuí ɨgʉlʉ́ nzikosú ká-pɨ́ nzike Yezu Kílísitó Ambosó kosú, 7 dhɨtɛ́dhɨ́ bhɔ́, angǎ otúzǐtó bhombi bhá yǎngu ká ngasa nzyasɨ, kávɨ̌ dhikókú dhó ubhomu wɛ́ bhɨzɛzɛ ngbangá nɛ sɨbhʉ́ndá ndikosú. 8 Dhipóbho-ndɨ̂ a dháyǎngu ɨ́ndɨ atɛ́lɛlɛ kábhɨ́sɨ̀a, nɛmɨ nàkʉ́nda bhɔ́ webhélí u'bhélé-mbʉ no'sisó, dhɨtɛ́dhɨ́ bhɔ́ bhombi-mbá bhó'bhísii-ndɛ́ Azapana bhékí na angu bhuí ká matandá mɛ́pɛpɛ́. Ɨ́nzyɛyɛ a yánza na-nzɨ́ a na u'tàni kó bhombi bhobhomu. 9 Píi wakɨtɛnɨ́ kísikó dhóngosono-mbʉ́ ásɨ́ na u'tàni, kɛ́-gʉlʉ́ yé mene má bhatatá, na mamànʉ, no dhóngosono kɛ́-gʉlʉ́ yé Isúmú, képosa ásɨ́ na u'tàni, a mopóbho má'tʉ́tʉ. 10 Mombi-yɔ atá mopóbho-mbógbǒòsogowó bhombi, bhíi wǒmuwúni dhɨtʉ́wa mala yámámʉsá na mala yɛ́bhalɨ́, biéné nayɨ́. 11 Wǎbe tàla bhɔ́ mombi átʉkʉ́-yɔ engíkénító kébie apɨ́ yá yǎngu, akáza ubhuu káwána azǎbhʉ kasɨ́ ɨyɨ́ mombólóbhi.Upipikese wá mápanʉ na salǎmʉ
12 Kɛ́ nɛdhɛ̀ngɛ-yɔ nà'tɨ́kabhá-pɔ́ Alɨtɛma* kʉ́kakʉ́ bhêkâ Tikiko*, zǎ gagala kódiko nɨtákana kɔ́ gbɔ̌tɔ́ we Nikopoli, képosa nòkúndí bhɔ́ nědhikí-kú kɛ́ nɛ́dhɛngɛ wɔ bhɔdɨ̌-mbʉkpɔ́wɔ. 13 Bhúbhongísíógǒ Zɛ̌na malimo we Isúmú, na Apɔ́lɔa dhɨzɨnda ndɨ́kɔ́wɔ dhánza, bhasɨ́kanɨ́ kímbó. 14 Atɛ́lɛlɛ bhɔ́ bhombi mbókosú bhɛ́mɛlɨ́ɨ́ kéke na angu bhuí ká matandá mɛ́pɛpɛ́, kágama matɨ́ká-mba etélélí bhɔ́ ázɨkánɨ́, dhɨtɛ́dhɨ́ bhɔ́ bhakení fɛsʉ bhabhɔ́kɔ̀tɔ bumó. 15 Bhombi bhobhomu-mbá bha palěmotí nɛmɨ bhókuwúni salǎmʉ. Bhʉ́wá salǎmʉ bhombi bhobhomu-mbá bha nebhósú bhákʉ́nda kɨ́sɨká ʉbhɨ́sɨ̀a.
Ngasa ékí nebhónú bhobhomu.