Mʉlʉ́ wá bhalʉwa-nzɔ
Pɔlɔ a kágapɔ́ ká manyaka kɔ́ Lɔma mala yɛ́bhalɨ́ kɛ́ nɛdhɛ̀ngɛ-yɔ apɔ́ ká'kàlaga bhalʉwa wɛ̌bhalɨ́-nzɔ kúke Timotei (1.8). Píi manyaka kasɨ wɛ̌bhalɨ́-nzɔ Pɔlɔ a kɨ́sɨká magali wɛkpɔ́wɔ bhuí kápʉ́ta wamámʉsá (2.9), bhombi mbasɨ ímbené bhá kʉtɨ́ká ɨ́mba éndé-yɛngɛ nɔbhɔ́ bhe'biító, Luka gbǎgbǎ hɨ̌yɔ a palěmotí nayɨ́ (1.15, 4.10-11,16).
Pɔlɔ akɛ́mɛ́sɨɛ Timotei bhɔ́ ódikí á'tákánɨ́ gagala mámʉsá yɛ́ nɛ́dhɛngɛ wɔ bhɔdɨ̌-mbʉkpɔ́wɔ (4.9, 21). Ó'dikíí no kóti kasɨ́, no bhobhúku yá kʉsɨ́nzɨ́ ɨ́nzɨ ébii-ndɛ́ kɔ́ Tɔlɔ́wa (4.13). Píi Pɔlɔ ásɨ́pɛmbɨɛ́ bhíi bhǎnɛnɛ kágapɔ́ no Timotei, képosa akɛ́nɛ bhɔ́ nɛ́dhɛngɛ kasɨ́ wakanɔwɔ́ kó nokúnzi etélélító (4.6). Hɨ̌nzɨ Pɔlɔ apɔ́ ne Timotei kátʉ́wa bhɔ̂ ékí wakpakpana ká mápanʉ máyǎngu-mbá opótí kʉ́kasɨ́, áɨndɨ́ yánza ká mápanʉ mɔ́ bhɔngɔ, ábhɨ́sɨ́ɨ́ kɔ́'tɔ̀kɔ magali tɛndɛ́ kókwó kɛ́-gʉlʉ́ yá uyǎngu. Pɔlɔ a nayɨ́ kótómbosio bhɔ̂ nɛ́dhɛngɛ wěpènege wó nokúnzi akěká nɛ́dhɛngɛ wowówo. Bhamalimo bhɔ́ bhɔngɔ, no bhombi-mbá bhawá bhombi, ne bhesídhí bhabhékitisěká bhombi-mbá bhó'bhísii-ndɛ́ Yezu kɨ́sɨkɔ́ mɔgɔ-mbɛ́kpɔ́wɔ bhuí kɛ́bhʉ́zɛ̌ngɨ̀ɛ. Atɛ́lɛlɛ bhɔ́ Timotei ámálɨ́ yɛ́kpɛ́ kɨ́sɨká uyǎngu wé Dhipóbho Dhɛ́pɛpɛ́ ndike Yezu Kílísitó, na abhúbiliení bhombi kólótoso uyǎngu wé Dhipóbho Dhɛ́pɛpɛ́. Akó'tómbosio Timotei bhɔ̂ Mabhɨ́mbɨ́-mbálawɔɔ́ ɨ́mba bhé'leli-ndɛ́ kɨ́sɛnɨ́ ʉbhanda ké kunísí kwasɨ a nɛ ʉkpɛ́ kó'bhòngisogo Timotei yánza, bhɔ́ ékí ne ibhomu-nzɨ́ etélélí káza kʉtɨ́ká kubhomu kwɛ́pɛpɛ́ (3.16-17).
Kangbɨndɨa kógomboso bhalʉwa-nzɔ kó mopóbho-mbénénénuwó zɨna átʉkʉ́-mba.
1.1-5: Salǎmʉ na-tambànaga mbʉ́kɔ Pɔlɔ kɛ́-gʉlʉ́ yá ʉbhɨ́sɨa mbúke Timotei.
1.6-18: Pɔlɔ ó'tómbosiiní Timotei mopóbho-mbá o'kpokpósí Timotei nɛyɨ́.
2.1-4.8: Uvekese mʉ̌ma kɨ́sɨká magali, na ʉbalɨaga Dhipóbho Dhɛ́pɛpɛ́ kɛ́ nɛ́dhɛngɛ u'bhomu.
4.9-22: Mopóbho-mbá Pɔlɔ o'tíkíí Timotei, na-mbá Pɔlɔ ebhí kɨ́sɛnɨ́, na salǎmʉ wepipikesowó bhalʉwa.