Salǎmʉ
1
Bhalʉwa-nzɔ a-yakámɨ kɔ Pɔlɔ, tɨ́kátɨ́ká ke Kílísitó Yezu kɛ́ dhɨkʉ́nda ndɨ́ka Azapana, kábalɨaga dhimbolí dhó ubhomu-mbʉ́ a kísiké Kílísitó Yezu.2 Nàkákʉ̀kalɨaga-wʉ Timotei, námɨ wamǔmeyí: ngasa, no kokó nzɨka Azapana, ne desene kákana kʉ́ka Azapana Yabǎ, ne Kílísitó Yezu Ngámá kosú, ékí palěmotí nanáwʉ.
Pɔlɔ é'sisiiní Azapana dhɨ́bɨba kɛ́-gʉlʉ́ nziko Timotei
3 Kɛ́ nɛdhɛ̀ngɛ-yɔ nàpɔ́ nanáwʉ kátámbàna kɨ́sɨkɛ́ dhɨkʉ́nga ndɨ́kamɨ túku na namánɨ́, nàké'sìsie Azapana dhɨ́bɨba badi, ɨ́yɔ nà nayɨ́ kázɨa kʉtɨ́ká kɨ́sɨká támbànaga wá mʉ̌ma-mbʉ́takatɔwɔ́, kága átʉkʉ́ bhatatá bhéndé-zǎ. 4 Nàkátámbana mobhóbhó mbákʉ, nà na nzala bhuí bhɔ́ nɛ̀kwɛ́nɨ́ dhɨtɛ́dhɨ́ bhɔ́ mʉlʉ́ma mbʉ́kamɨ ótúmí nɛ-gyagyǎ. 5 Nàkátámbana ʉbhɨ́sɨa mbwakʉ wáyǎngu, ɨ́mbʉ éndé kpanga kʉ́ka tatákʉ́ Loisi, na kʉ́ka mamákʉ́ Enike, nɛmɨ nǎbe tàla bhɔ́ hɨkágǎ-mbʉ a kʉ́kakʉ́.
Pɔlɔ ó'túwuní Timotei bhɔ́ évekésí mʉ̌ma
6 Hɨ̌nzɨ nàpɔ́ nanáwʉ kótómbosio bhɔ̂: zuzǔkósó dhɨwá-ndɨ Azapana okuwú ká ngasa nzyasɨ, ɨ́ndɨ a kíseníyi nzyakʉ, ɨ́ndɨ wopóti-ndɛ́ kɛ́ nɛdhɛ̀ngɛ-yɔ někùbǐsii-ndɛ́pɔ́ mɔbhɔ́kɔ mbákamɨ. 7 Képosa Azapana ótúwú-ásɨ́ndɛ́ mʉlʉ́ma wá kʉbhánga, píi ótúwu-ndɛ́ dhɨ̌sʉ mʉlʉ́ma wɛ́ ʉkpɛ́, wɛ́ dhɨkʉ́nda, na-mbúbhólikonowó.
8 Hɨ̌nzɨ wǎnɛnɨ́ soni ká'wá pembíkésé ka Ngámá kosú kó bhombi, wǎnɛnɨ́dɔ-pɔ́ soni kɛ́-gʉlʉ́ nzɨkámɨ mombi wa manyaka ké-póbho ndyasɨ. Píi kɛ́ ʉkpɛ́ mbʉka Azapana, bhɨ́sɨ́á kɔ́'tɔ̀kɔ magali palěmotí nɛmɨ kɛ́-gʉlʉ́ yé Dhipóbho Dhɛ́pɛpɛ́. 9 Ɨyɨ́ hɨ̌yɔ ótúmboisi-ndɛ́mʉ, na étwésii-ndɛ́ kéke bhombi mbasɨ ɨ́mbálawɔɔ́, ásɨ́ ká matandá mbokosú mɛ́pɛpɛ́, píi dhɨ̌sʉ ká ʉtámbànaga mbwasɨ mombólóbhi, na ngasa-nzɨ́ ótúwu-ndɛ́ bhósú kísiké Kílísitó Yezu mámʉsá yɛ́ bhɨzɛzɛ bhibhomu. 10 Ne gěgenzí ngasa-nzyɛyɛ oponíkónító mbúndú, ká-pɨ́-nzɨ́nɨkɛnɔwɔ́ ɨ́nzɨka Ambosó kosú Kílísitó Yezu. Ɨyɨ́ hɨ̌yɔ épipi-ndɛ́ dhɨngámá dhó kukwó, na ká-pɨ́ yé Dhipóbho Dhɛ́pɛpɛ́ obhúzigǐí bhombi ubhomu-mbʉ́ ásɨ́ nɛ̌-kɛ̀gɛ.
11 Kɛ́-gʉlʉ́ yé Dhipóbho Dhɛ́pɛpɛ́-ndɨ, hɨ̌nzɨ Azapana énibǐsi-ndɛ́pɔ́ kéke abalɨagǎ, na tɨ́kátɨ́ká, na malimo. 12 Kɛ́-gʉlʉ́ yé Dhipóbho Dhɛ́pɛpɛ́-ndɨ, hɨkágǎ-nzɨ nàpɔ́ kɨ́sɨká magali-nzɔ, píi nàsɨ́nɛ-pɔ́ soni képosa nàmébe mombi-yɔ ně'zǐmesii-ndɛ́ mʉ̌ma mbʉ́kamɨ tàla, nǎbe kâ yánza bhuí bhɔ̂, ɨyɨ́ a nɛ ʉkpɛ́ kó'bhólolo kɔ̀tɔ we bhikímbó bhɛ́pɛpɛ́ ɨ́yɔ ónuwú-ndɛ́mʉa baba kɛ́ dhɨsá-ndɨtɨ́nɔwɔ́ u'bhélé kɛ́-gʉlʉ́ yó nokúnzi.
13 Bhólóló yánza, kɨ́sɨká ʉbhɨ́sɨ̀a nɛ dhɨkʉ́nda-ndɨ́ ka nodhí kísiké Kílísitó Yezu, ʉ'sʉmbʉ wó mopóbho má yǎngu ɨ́mba wokí kʉ́kamɨ. 14 U'bhólóló kɔ̀tɔ wo mopóbho mɛ́pɛpɛ́ ɨ́mba wopótí, ká-pɨ́ yá Mʉlʉ́ma-mbʉ́kwálɔwɔ́ ɨ́yɔ awedhike kíseníyi nzikosú.
Angu ko Onesifolo
15 Wǎbe u'bhélé-mbʉ tàla bhɔ̂ bhombi bhobhomu bhá dhʉdhʉ́ yá Asiya bhénìbii-tágě-nìbie, kɨ́sɨkɛ́-bhɔ́ a bhombi átʉkʉ́ Figělo nɛ Hɛlɨmɔgɛ̌nɛ. 16 Ngámá ɛ́mɛ́nɨ́ɨ́ kokó Onesifolo* na ndabhʉ nzyasɨ, képosa masá ma'kpa éke bhɔ́ anádiko nìyombiso mʉlʉ́ma. Na éní-ásɨ́ soni kɛ́-gʉlʉ́ yá malamba mé bhiwǒtí-mba nà kɨ́sɛnɨ́. 17 Píi kɛ́ nɛdhɛ̀ngɛ-yɔ odholí-pɔ́ kɔ́ gbɔ̌tɔ́ wɔ Lɔma, gagala-nzyɛyɛ onikóbhí na angu baba-átʉkʉ́ enéní. 18 Ngámá ámʉwʉ́ ngasa, dhɨtɛ́dhɨ́ bhɔ́ ɛ́mɛ́nɨ́ɨ́ kokó kɛ́ dhɨsá-ndɨtɨ́nɔwɔ́ u'bhélé kɛ́-gʉlʉ́ yó nokúnzi. Wǎbe yánza bhuí ngbangá átʉkʉ́ ébhíga-nɨ̀zɨa kʉtɨ́ká kɔ́ gbɔ̌tɔ́ wɛ Ɛfɛsɔ.