Pembíkésé wo mopóbho-mbá a kísikó bhúku-nzɨ̂
Yǎmbʉ sʉnzaka. Nàbhɔ́ někupembíkésí mopóbho-mbá a kísikó bhúku-nzɨ̂. Wasɔ́mɔ kísikó bhúku-nzɨ̂ Dhipóbho ndɨ́ka Azapana ɨ́ndɨ Pɔlɔ, tɨ́kátɨ́ká ke Yezu Kílísitó, ó'kòliogi-ndɛ́ Timotei no Tito. Wǎnɛ kísikó bhúku-nzɨ̂ bhabhalʉwa bhásɨ́áʉ mbákɔ Pɔlɔ: bhalʉwa wamámʉsá kɔ Pɔlɔ kúke Timotei (kégbiti: 1 Tim), bhalʉwa wɛ̌bhalɨ́ kɔ Pɔlɔ kúke Timotei (kégbiti: 2 Tim) na bhalʉwa kɔ Pɔlɔ kúko Tito (kégbiti: Tit.). Bhalʉwa motí ké motí apɛ́tɨkɛnɛ kpanga ne dhipóbho-ndɨ́ abala bhɔ̂: «Mʉlʉ́ wá bhalʉwa-nzɔ», kékupembikese dhingbangi dhé u'bhélé-mbʉ a kísikó bhúku-nzyɛyɛ kégbiti.
Kɛ́ nɛdhɛ̀ngɛ-yɔ wapɔ́ kɔ́sɔ́mɔ, bhíi wěniní dhiso dhá bhalʉwa-ndɨ́dhɔ̌kɔwɔ́ dhímotí átʉkʉ́-mba (a, b, c...) dhákpakpana kɛ́ tɛtɛtɛ yé dhipóbho, a ngbangá átʉkʉ́ dhibhúní kákʉpana bhɔ̂ wasɔ́mɔ tíne yé dhipóbho-ndyɛyɛ wásɨ́ yá kʉkásá kwá bhalʉwa-kʉ́ wa nokú kɔ́sɔ́mɔ. Akʉpana-nzyéné pala yókotí kɨ́sɨká Mabhɨ́mbɨ́ ɨ́nzɨ wandɛ-tákana kága-kú dhipóbho dhímotí-ndyɛyɛ. Bhepembíkésé-mbɛyɛ bhobhomu bhásɨ́ Dhipóbho ndɨ́ka Azapana ɨ́ndɨ Pɔlɔ ókòlogi-ndɛ́mʉ, a dhɨ̌sʉ mopóbho-mbá kekubǐsíí bhɔ́ wɛ̌pɛmbɨ́ɨ́ tíne yó mopóbho-mbéné ɨ́mba wasɔ́mɔ kísiké Dhipóbho ndɨ́ka Azapana.
Kakátámbànaga bhɔ́ Azapana akʉwábhá dhibhólú dhá Mʉlʉ́ma-mbʉ́kwálɔwɔ́ kɔ́sɔ́mɔ bhabhalʉwa bhásɨ́áʉ-mbá bhobhomu, kɛ́pɛmbɨɛ, na ʉza mopóbho mobhomu-mbá Azapana a nebhósú kábala kɨ́sɨká bhabhalʉwa-mbâ.
Mʉlʉ́ wá bhalʉwa-nzɔ
Kúmbíso-nzɨ́'kandanɔwɔ́ Pɔlɔ mala yámámʉsá mesisa pɨ́ɔ́nɔ bhɔ́ ɛ́tɛ́lɛ́lɨ́ mábhalɨ́ kɔ́ gbɔ̌tɔ́ wɔ Lɔma, bhó'kúli-ndá'kʉ́la (Mtd 28.16,30-31, Fil 1.25, 2.24, Flm 22). Hɨ̌nzɨ epétíí kágapɔ́ kɛ́yɛ̀ngɛ anábalɨaga Dhipóbho Dhɛ́pɛpɛ́ ndike Yezu ká bhapala-nzyéné ɨ́nzɨtɔ́wɔ, kâ kámalɨa, ne upìnzikese makanisa-nzɨ́ épétikesi-ndɛ́ mámʉsá.
Kúmbíso-nzídonowó ká manyaka, anɨkɛnɛ átʉkʉ́ Pɔlɔ odikí-za gbǎgbǎ masá dhɛ̌kɛ kɔ́ gbɔ̌tɔ́ wɛ Ɛfɛsɔ, mámʉsá bhɔ́ ɛ́ndɨ́ ká dhʉdhʉ́ yá Makedoniya. Épipí-ásɨ́ mopóbho-mbá otókóní kɨ́sɨká kanisa-nzyɛyɛ, hɨ̌nzɨ e'bií-pɔ́ Timotei kɛ́ Ɛfɛsɔ, dǎsɨ́ motí wa kʉtɨ́ká, ɨ́yɔ éndé-ʉ'kʉ́nda bhuí átʉkʉ́ násɨ́ wamǔmeyí kɨ́sɨká ʉbhɨ́sɨ̀a. Angǎ Pɔlɔ ebhí ká dhʉdhʉ́ yá Makedoniya, hɨ̌nzɨ o'kolíógǐ-pɔ́ Timotei bhalʉwa-nzɔ, ká'tɨ́kɨa bhɔ́ édhikí kɛ́ Ɛfɛsɔ kápànɨaga Bháklísitó, kébhúvekese mʉ̌ma, na kɛ́mɛnɨɛ bhombi-mbéné ɨ́mba bhakábha káwá mápanʉ mówówo kékìsege uyǎngu wé Dhipóbho Dhɛ́pɛpɛ́. (1.3-4). Pɔlɔ aká'tʉ́wa násɨ́ Timotei bhɔ́ ékí mombi wa kʉtɨ́ká wɛpɛpɛ́ ke Yezu Kílísitó.
Bhalʉwa-nzɔ bha'wɛ́sɨɛ bhɔ̂: «Bhalʉwa wa kʉpasɨtɛ́lɛ», képosa Pɔlɔ o'kolíógǐ mombi-yɔ ebhí kámalɨa kanisa átʉkʉ́ Pasɨtɛ́lɛ. Píi pɔ́tɛndɛ́ bhɔ̂ Pɔlɔ o'kolíógǐ Timotei bhalʉwa-nzɔ, a yɛ́pɛmbɨkɛnɛ mbúndú bhɔ́ Pɔlɔ éndé-kʉ́nda bhɔ́ Timotei ɔ́'sɔ́mɨ́ bhalʉwa-nzɔ mámʉsá yó bhombi bhobhomu bhá kanisa (4.11, 5.7). Kangbɨndɨa kógomboso bhalʉwa-nzɔ kó mopóbho-mbénénénuwó zɨna átʉkʉ́-mba.
1.1-2: Salǎmʉ kɔ Pɔlɔ kúke Timotei.
1.3, 3.16: Dhɨsɨnga dhá Bháklísitó na dhó bhombi-mbá bhakámalɨa kanisa.
4.1, 6.19: Matʉ́wa mbákɔ Pɔlɔ kúke Timotei kéke mombi wa kʉtɨ́ká wɛpɛpɛ́ ke Yezu Kílísitó.
6.20-21: Uvekese mʉ̌ma mbúke Timotei nɛ dhɨtʉ́wa-ndípipikesowó bhalʉwa.