Salǎmʉ
1
Bhalʉwa-nzɔ a-yakámɨ kɔ Pɔlɔ, tɨ́kátɨ́ká ke Kílísitó Yezu, ngbangá átʉkʉ́ Azapana Ambosó kosú otíkíí, ne Kílísitó Yezu, zǐmésé wa mʉ̌ma mbúkosú. 2 Nàkákʉ̀kalɨaga-wʉ Timotei, námɨ wayǎngu kɨ́sɨká ʉbhɨ́sɨ̀a: ngasa, no kokó nzɨka Azapana, ne-desene kákana kʉ́ka Yabǎ Azapana na Ngámá kosú Kílísitó Yezu, ékí palěmotí nanáwʉ.Ɨndá yánza kɛ́-gʉlʉ́ yá bhamalimo bhɔ́ bhɔngɔ
3 Kága átʉkʉ́ nǒkutíkìiga, kɛ́ndɛ mbʉ́kámɨ ká dhʉdhʉ́ yá Makedoniya, bhɔ́ dhiké kɔ́ gbɔ̌tɔ́ wɛ Ɛfɛsɔ, dhɨtɛ́dhɨ́ bhɔ́ wɛbhʉ́mɛnɨ́ɨ́ bhombi-mbéné bhawánɨ́ mápanʉ má ʉ'sʉmbʉ wókotí. 4 Bhʉ́balá bhɔ́, bhabǐsení motói kɔ́kɔ̀nɨɔgɔ kugyěgyení kwá'tʉ́tʉ, tɛndɛ́ kɛ́-gʉlʉ́ yé mene má bhatatá ɨ́mba ásɨ́ ně-pènege. Mopóbho-mbɛyɛ adikiso dhóngósó, na ásɨ́tʉ́wa apɨ́ káza dhɨkʉ́nda ndɨ́ka Azapana kɨ́sɨká ʉbhɨ́sɨ̀a. 5 Tíne yé dhipóbho-ndɨ́ nǒkutíkiiní-ndɨ a képeise dhɨkʉ́nda-ndɨ́ akana kɨ́sɨká mʉlʉ́ma-mbʉ́takatɔwɔ́, kɨ́sɨká ʉtámbànaga wá mʉ̌ma wɛ́pɛpɛ́, na kɨ́sɨká ʉbhɨ́sɨ̀a fɛsʉ wé kusídhí. 6 Bhombi-mbéné bhébii-tɛ́ndɛ́ apɨ́-nzɨ ébie, bhéngíkeni-tɛ́ndɛ́ kó mopóbho má'tʉ́tʉ. 7 Bhakʉ́nda bhɔ́ bhékí bhamalimo bhé Isúmú nzɨka Azapana, píi bhásíbe-nzɨ́ bha noyí kébhéle, tɛndɛ́ mopóbho-mbá bha nɔmɔ́ kábalɨaga no'sisó.
8 Bhósú kǎbe tàla bhɔ́ Isúmú a yánza bhíi mombi óziní mopóbho mé Isúmú kɨ́sɨká apíyi. 9 Na kapɛmbɨɛ bhɔ́ Isúmú ásɨ́ kɛ́-gʉlʉ́ nziko mombi wa yǎngu, a dhɨ̌sʉ kɛ́-gʉlʉ́ yó bhombi bhá mányɛ́nyɛ́, na bhá málɛ́ngɛ́, kɛ́-gʉlʉ́ yó bhombi-mbá bhásɨ́mbàtɨa Azapana, no bhombi bhó ubhuu, kɛ́-gʉlʉ́ yó bhombi-mbá bha'dɛkɨɛ Azapana, ne bhikímbó-mbɨ bholowí kʉ́ka Azapana, kɛ́-gʉlʉ́ yó bhombi-mbá bhabhɔ́lɔ bhɔbɔbɔ̌wɔ, nɔ bhɔmɔmɔ́wɔ, kó bhombi-mbá bhabhɔ́lɔ bhombi. 10 Isúmú a kɛ́-gʉlʉ́ yó bhombi bhɛ́ dhɨkpála, ɨ́mba bhasɛ́lɛnɛ bhɛmɛtʉ nɔ bhɔdɔ̌wɔ bhɛmɛtʉ, kó bhombi-mbá bhabhʉ́gaba bhombi, kó bhombi bhɔ́ bhɔngɔ, kó bhombi-mbá bha'tɨ́na nɛ́paka kɔ́ bhɔngɔ, na-mbá bhaza mopóbho-mbéné ɨ́mba a bɔwɔ̌bɔwɔ nɛ dhɨ́panʉ dháyǎngu. 11 Dhɨ́panʉ-ndyɛyɛ hɨ̌ndɨ a kísiké Dhipóbho Dhɛ́pɛpɛ́-ndɨ Azapana ónuwú-ndɛ́ ɨmɨ, ɨ́ndɨ akóponikoso dhɨ́bɨba ndɨka Azapana, ɨ́yɔ a na ʉnzá u'bhomu.
Pɔlɔ é'sisiiní Ngámá dhɨ́bɨba ká ngasa nzyasɨ
12 Nàké'sisie Kílísitó Yezu Ngámá kosú dhɨ́bɨba kɛ́ ʉkpɛ́-mbʉ onuwú ká kʉtɨ́ká kwasɨ. Nà nayɨ́ ké'sisie dhɨ́bɨba, képosa enéní bhɔ́ na mombi-yɔ etélélí ké'bǐsie mʉ̌ma káza kʉtɨ́ká kwasɨ, 13 pɔ́tɛndɛ́ bhɔ́ mámʉsá ɨmɨ nèbhí nayɨ́ kó'sòsogo, nèbhí nayɨ́ kɛ́zɛ̌ngɨ̀ɛ, nèbhí mombi wa málɛ́ngɛ́. Píi Ngámá enéníí kokó, képosa nòzǐ mopóbho-mbɛyɛ nèbhí-ásɨ́pɛmbɨɛ́, na nèbhí-ásɨ́ nayɨ́ wabhɨ́sɨ̀a. 14 Na ngasa nzɨ́ka Ngámá kosú otúmíógǐ kʉ́kamɨ yágbalala, onuwú ʉbhɨ́sɨ̀a nɛ dhɨkʉ́nda ká-pɨ́-nzɨ'kpakpanɔwɔ́ Kílísitó Yezu. 15 Dhipóbho-ndɨ̂ a dháyǎngu, ɨ́ndɨ atɛ́lɛlɛ kó bhombi bhobhomu kábhɨ́sɨ̀a bhɔ̂, Kílísitó Yezu ódiki-ndɛ́ kísikó nokúnzi kómboiso bhombi bhó ubhuu, na kɨ́sɨkɛ́-bhɔ́ ɨmɨ nà mombi wo ubhuu kápʉ́ta bhobhomu. 16 Píi kɛ́-gʉlʉ́ yé dhipóbho-ndyɛyɛ, hɨ̌nzɨ Azapana enéníí-pɔ́ kokó, dhɨtɛ́dhɨ́ bhɔ́ ká-pɨ́ nzɨkámɨ mombi wo ubhuu kápʉ́ta bhobhomu, Kílísitó Yezu ápanɨ́ mʉ̌ma-nda mbwasɨ átʉkʉ́ ʉ'sʉmbʉ-mbʉ́bhɛlɨɔwɔ́, ɨ́mbʉ abhʉ́zɨabhá bhombi-mbéné ɨ́mba bha'bhɨ́sɨabhá kúmbiso, bhɔ́ bhávɨ̌ ubhomu wɛ́ bhɨzɛzɛ. 17 Kúko Kúmú wɛ bhɨzɛzɛ, ɨ́yɔ ásíkwó, ɨ́yɔ ásɨ́nɨ̀kɛnɛgɛ̌, ɨ́yɔ amʉ́ Azapana kakáka: ékí ʉmbàtɨa nɛ dhɨ́bɨba kɛ́ bhɨzɛzɛ nɛ bhɨzɛzɛ! Oyí.
18 Nàkákʉtɨ́kɨ̀a-wʉ dhipóbho-ndɨ̂, námɨ Timotêi, ngbangá ne u'bhélé wá bhanabǐ ɨ́mbʉ bhébhéli-ndɛ́ mámʉsá kɛ́-gʉlʉ́ nzyakʉ, dhɨtɛ́dhɨ́ bhɔ́ kísiké u'bhélé-mbwɛyɛ wokwóní ʉ'kandʉ́ wɛ́pɛpɛ́, 19 no-bhólolo ʉbhɨ́sɨ̀a, na ʉtámbànaga wá mʉ̌ma* wɛ́pɛpɛ́. Bhombi-mbéné bhépílii-tɛ́ndɛ́ ʉtámbànaga wá mʉ̌ma wɛ́pɛpɛ́-mbwɛyɛ nɔ ʉ'gɔngʉ, na bhékìsegi-tɛ́ndɛ́ ʉbhɨ́sɨa mbʉ́kɔwɔ átʉkʉ́ bhombi-mbá bhosukí nɛ-ngbɔ́lɔ́. 20 Hɨmɛnɛya na Alɛgzǎnda bha kísiké igbangú yó bhombi átʉkʉ́-mbɛyɛ, nòbhúwító kúke U'zǐlía, dhɨtɛ́dhɨ́ bhɔ́ bhápátɨ́ dhɨ́pànʉ bhɔ́ bha'sòsogoní Azapana.