Mapanʉ kɛ́-gʉlʉ́ yɛ́ dhɨkʉ́nga
2
Hɨ̌nzɨ nàpɔ kátɨ́kɨa bhɔ̂, mámʉsá yó mopóbho mobhomu: ʉ'gǎmànɨaga Azapana, nɛ dhɨkʉ́nga, na ʉkʉ́ngɨ̀a bhombi, ne u'sìsie Azapana dhɨ́bɨba ázɨkánɨ́ kɛ́-gʉlʉ́ yó bhombi bhobhomu. 2 Atɛ́lɛlɛ kákʉnga kɛ́-gʉlʉ́ yó bhokúmú, no bhogbukúlu bhobhomu-mbá bha ké dhikúmú, dhɨtɛ́dhɨ́ bhɔ́ kékí kísiké udesene, na kísikó ubhomu-mbʉ́dɛkɛgɔwɔ́, na-mbʉ́'kpakpanɔwɔ́ Azapana, na-mbʉ́ bhombi bhake noú wámbàtɨa. 3 Ɨ́nzyɛyɛ a yánza, na-nzɨ́ Azapana Ambosó kosú a noyí yábhɨ́sɨ̀a. 4 Képosa ɨyɨ́ akákʉ́nda bhɔ́ bhombi bhobhomu bhɔ́mbɔlɨ́ na bhádhalɨ́ kɛ́pɛmbɨɛ uyǎngu.5 Képosa Azapana a motí gbǎgbǎ,
nayɔ a sɔ́bhɨ́ kózǔko bhombi na Azapana a kágǎ motí gbǎgbǎ,
ɨyɨ́ a mombi, Kílísitó Yezu.
6 Ɨyɨ́ hɨ̌yɔ ówóni-ndɛ́ mombólóbhi kéke dhɨmbalɨ́ dhá nasʉ́mbá wó bhombi bhobhomu.
Ɨ́nzyɛyɛ a pembíkésé-yɔ o'wí ké nédhengeyí. 7 Kɛ́-gʉlʉ́ yé dhipóbho-ndɨ̂ hɨ̌nzɨ Azapana énibǐsi-ndɛ́pɔ́ kéke abalɨagǎ, na tɨ́kátɨ́ká, na malimo wo bhombi-mbá bhásɨ́ Bhayuda kábhʉ́panɨa ʉbhɨ́sɨ̀a, na uyǎngu. Nàsɨ́kɛ́pɨ̀tɛgɛ, nàkébhéle yǎngu.
Mapanʉ kɛ́-gʉlʉ́ yɛ́ bhɛmɛtʉ no bhokólí
8 Hɨ̌nzɨ nàpɔ́ kákʉ́nda bhɔ̂, ká bhapala ibhomu bhɛmɛtʉ bhá'kʉ́ngɨ́ Azapana, bhanádhono mɔbhɔ́kɔ ɨgʉlʉ́, kɨ́sɨká mʉlʉ́ma-mbʉ́takatɔwɔ́, fɛsʉ nɛ dhɨngbʉ̀ka, tɛndɛ́ kísikó dhóngósó.
9 No bhokólí kágǎ anɨ́, bhólólí kɨ́sɨká ʉ'sʉmbʉ wɛ́pɛpɛ́ na-mbʉ́ etélélí, fɛsʉ ʉkábha kɛ́nɨ̀kɛnɛ no bhombi. Dhɨ́pʉmbʉ́ ndɨkɔ́wɔ akení-ndɨ́lʉkɔwɔ́ sala, tɛndɛ́ kólólo bhikímbó bhá mbalɨ́, bhêkâ bhenésángí, bhêkâ motúlú mɛ́ dhɨmbalɨ́, 10 píi ékí dhɨ̌sʉ ká matandá mɛ́pɛpɛ́, ngbangá átʉkʉ́ etélélí no bhokólí-mba bhabala bhɔ́ bhakámbàtɨa Azapana. 11 U'kólí avɨ̌ dhɨ́pànʉ wedesene, kɨ́sɨkɛ́ dhɨzɨɔ kó mopóbho mobhomu. 12 Nàsɨ́ká'tɨ́kɨa u'kólí kápànɨaga, tɛndɛ́ káva dhikúmú ɨgʉlʉ́ nzɨkɛ ʉ'mɛtʉ, píi ékí wedesene. 13 Képosa Azapana o'zǐ kpanga Adǎmʉ, kúmbisoyí Ɛva. 14 Na ásɨ́ Adǎmʉ hɨ̌yɔ óbhísii-ndɛ́ ʉpɨ̀tɛgɛ. Píi dhɨ̌sʉ u'kólí hɨ̌yɔ óbhísii-ndɛ́ ʉpɨ̀tɛgɛ, hɨ̌nzɨ obhúní-pɔ́ Isúmú nzɨka Azapana. 15 Píi avabhá ʉmbɔ̀lɔ kɔ́ ʉbhɔ́kɔ̀tɔa, bhíi édhikiní kɨ́sɨká ʉbhɨ́sɨ̀a nɛ dhɨkʉ́nda, walawana kʉ́ka Azapana, fɛsʉ kákábha ʉ̌nɨ̀kɛnɛ.