Bhombi-mbá bhamalɨa kanisa
3
Dhipóbho-ndɨ̂ a dháyǎngu: Bhíi mombi ókúndiní kʉtɨ́ká-kʉ́malɨɔwɔ́ kanisa akákʉ́nda kʉtɨ́ká kwɛ́pɛpɛ́. 2 Atɛ́lɛlɛ bhɔ́ mombi-yɔ amalɨa kanisa akení ɨ́yɔ bhombi bha nayɨ́ kódhódho, ékí ʉ'mɛtʉ-yɔ a wakákala kʉ́ka ʉ'kálásɨ gbǎgbǎa, akení mombi wa nalɨ́lɔ yé kímbó, ékí mombi wa ʉtámbànaga wɛ́pɛpɛ́, mombi wo bhólikonowó, mombi-yɔ adhìkisege bhebika, mombi-yɔ ǎbe káwá dhɨ́panʉ. 3 Akení na nalɨ́lɔ wa makáná, akení mombi wa málɛ́ngɛ́, píi ékí mombi wɛ dhɨzɨɔ, mombi wa mʉ̌ma-mbʉ́dɛkɔwɔ́, mombi-yɔ ásɨ́ na afěfé we mekpéngbélé, 4 ɛ́pɛmbɨ́ɨ́ kámalɨa ndabhʉ nzyasɨ mombólóbhi, ngbangá átʉkʉ́ etélélí kó mopóbho mobhomu, ne-bǐse bhanásɨ́ kɨ́sɨkɛ́ dhɨzɨɔ na ʉmbàtɨa. 5 Képosa mombi-yɔ ásíbe kámalɨa ndabhʉ nzyasɨ mombólóbhi, abhólolo kanisa nzɨ́ka Azapana dhɨnzálákâ? 6 Akení mombi-yɔ o'bhísíí Yezu gěgenzí, dhɨtɛ́dhɨ́ bhɔ́ asʉ̀waganɨ́ ɨvʉ, no-gwo kɨ́sɨká azǎbhʉ ká Mádinganga*. 7 Atɛ́lɛlɛ bhɔ́ ékí ne dhilímí dhɛ́pɛpɛ́ baba kó bhombi-mbá bhásɨ́ kɨ́sɨká kanisa, dhɨtɛ́dhɨ́ bhɔ́ akení ɨ́yɔ bhombi bha nayɨ́ wɛdɛkɨɛ, na andɛnɨ́-gwo kɨ́sɨkɛ́ dhɨlɛ́kʉ ndɨ́ka Mádinganga.Bhombi bhá kʉtɨ́ká bhá kanisa
8 Bhombi bhá kʉtɨ́ká bhá kanisa* kágǎ anɨ́, bhékí bhombi-mbá bhatɛ́lɛlɛ kábhʉ́mbàtɨa, bhakení bhombi bhó mopóbho mábhalɨ́ kɨ́sɨká mʉlʉ́ma, bhakení na nalɨ́lɔ káná makáná, bhakení na afěfé wakábhɔwɔ́ mekpéngélé ká-pɨ́-nziwówo, 9 bhóbhólólí kɨ́sɨká ʉtámbànaga wá mʉ̌ma-mbʉ́takatɔwɔ́ ɨbha yá ʉbhɨ́sɨ̀a ɨ́nzɨ óponikoni-ndɛ́mʉ. 10 Na atɛ́lɛlɛ bhɔ́ bhɔ́bhʉ́ndɔ́ngɨ́ kpanga, bhíi bhénikeniní bhɔ́ bhásɨ́ bhɛ́dhɛ̀ngɨkɛnɛgɛ kó uwówo, ama bházɨ̌ matá kʉtɨ́ká kʉkɔ́wɔ tɛndɛ́.
11 Bhokólí bhá kʉtɨ́ká bhá kanisa kágǎ anɨ́, bhékí bhombi-mbá bhatɛ́lɛlɛ kábhʉ́mbàtɨa, bhakení nɛ nɛ́lɛgɛlɛgɛ, bhakení na nalɨ́lɔ yé kímbó, bhékí bhombi-mbá bhatɛ́lɛlɛ kébhúbǐsie mʉ̌ma kísikó mopóbho mobhomu. 12 Atɛ́lɛlɛ bhɔ́ bhombi bhá kʉtɨ́ká bhá kanisa bhékí motí ké motí ʉ'mɛtʉ-yɔ awakákala kʉ́ka ʉ'kálásɨ motí gbǎgbǎb, bhɛ́pɛmbɨ́ɨ́ kámalɨa bhɔnɔ́wɔ yánza, na bhandabhʉ nzɨ́kɔ́wɔ mombólóbhi. 13 Képosa bhombi-mbá bhakáza kʉtɨ́ká kʉkɔ́wɔ́ kwánza, bhakáwána dhilímí dhɛ́pɛpɛ́ kɛ́-bhɔ́ mombólóbhi, na bhásɨ́ na kʉbhánga atápɔ́ dhɛ̌kɛ kɨ́sɨká ʉbhɨ́sɨa-mbʉ́ ka noú kísiké Kílísitó Yezu.
Ɨbha-nzɨ́ oponíkóní ká-pɨ́-nzɨ́'kpakpanɔwɔ́ Azapana
14 Nǒkùkolioginí mopóbho-mbâ bhɔ́ nànátámbànaga kódiko kʉ́kakʉ́ gagala. 15 Píi bhíi nòbhúuní kódiko, a yánza bhɔ́ wɛ̌pɛmbɨ́ɨ́ dhɨsɨnga-sá-ndɨ atɛ́lɛlɛ bhɔ́ wekí nodhí kɨ́sɨká ndabhʉ nzɨ́ka Azapana, ɨ́nzɨ amʉ́ kanisa nzɨ́ka Azapana-yɔ a no ubhomu, ɨ́nzɨ amʉ́ bobǒ no gbumac wa uyǎngu. 16 Na ásɨ́ no mombi-yɔ adhóngoso bhɔ̂, ɨbha-nzɨ́ oponíkóní ká-pɨ́-nzɨ́'kpakpanɔwɔ́ Azapana a-nzínénuwó, ɨ́nzɨ abhéle bhɔ̂ Kílísitó:
Ɨyɨ́ óponikoni-ndɛ́ na nʉtʉ yó mombi.
Uyǎngu mbwasɨ óponikoni-ndɛ́ ká-pɨ́ yá Mʉlʉ́ma-mbʉ́kwálɔwɔ́.
Énikeni-ndɛ́ ká bhamalaɨka.
Bhóboliogi-ndɛ́ u'bhélé mbwasɨ kísikó bhombi-mbá bhásɨ́ Bhayuda.
Bhó'bhísii-ndɛ́ kísikó nokúnzi.
Azapana ó'dhoni-ndɛ́ ɨgʉlʉ́ kɨ́sɨkɛ́ dhɨ́bɨba.