Mapanʉ má bhamalimo bhɔ́ bhɔngɔ
4
Píi Mʉlʉ́ma-mbʉ́kwálɔwɔ́ akébhéle mbúndú bhɔ̂, kɨ́sɨkɛ́ nɛ́dhɛngɛ wěpènegowó, bhombi-mbéné bhabiěká ʉbhɨ́sɨa mbʉ́kɔ́wɔ kɛ́bhɛlɨɛ kʉmɨlɨ́ma kwé dhibhúngògo na mápanʉ má bhayaú. 2 Bhabhʉ́bhɛlɨɛ̌ká bhombi bhesídhí, ɨ́mba bhabhéle bhɔngɔ kɛ́pɨ̀tɛgɛ bhombi, ɨ́mba ʉtámbànaga wá mʉ̌ma mbʉ́kɔ́wɔ mombólóbhi ókosi-tɛ́ndá-kàsa. 3 Bhombi-mbɛyɛ bhake bhɔ́ bhanábhʉ́tɨ̀ya bhombi bhɔ́ bhavananɨ́, na bhanábhʉ́bala bhɔ́ bhalánɨ́ malá-mba Azapana ozǐ, dhɨtɛ́dhɨ́ bhɔ́ bhombi-mbá bha nayɨ́ wabhɨ́sɨ̀a, ɨ́mba bhǎbe uyǎngu, bhálɨ́ ké'sìsie Azapana dhɨ́bɨba. 4 Képosa bhikímbó bhibhomu-mbɨ́ Azapana ozǐ a bhánza, ásɨ́ na-nzípíliowó, bhíi gbǎgbǎ bhɔ́ mombi ópótiní ké'sìsie Azapana dhɨ́bɨba. 5 Képosa kímbó ibhomu osukúsóní ké Dhipóbho ndɨ́ka Azapana na kɛ́ dhɨkʉ́nga.Mombi wa kʉtɨ́ká wɛpɛpɛ́ ke Yezu Kílísitó
6 Bhíi wǒpònioginí mopóbho-mbá ká bhanákamá, wakebhá mombi wa kʉtɨ́ká wɛpɛpɛ́ ke Kílísitó Yezu, ɨ́yɔ akɛ́ndɛ něpìene kísikó mopóbho má ʉbhɨ́sɨ̀a, na mɛ́ dhɨ́panʉ dhɛ́pɛpɛ́-ndɨ wa-ndɛ́ nodhí kɛ́bhɛ̀lɨɛgɛ dhánza. 7 Píi wabhɨ́sɨanɨ́ mopóbho-mbó'dhóngosowó Azapana, ne kugyěgyení kwá'tʉ́tʉ kwó bhokúbhokólí. Mɛlɨ́ɛ́ dhɨ̌sʉ ɨwʉ mombólóbhi kéke wa'kpàkpana Azapana. 8 Képosa ʉmɛlɨɛ-mbʉ́vɔwɔ́ dhɨkpɛ́kpɛ́kpɛ́ dhá nʉtʉ a wánza kó mopóbho dhɛ̌kɛ, píi ʉ'kpàkpana Azapana a wánza kó mopóbho mobhomu, képosa a ne dhimbolí dhó ubhomu wé gěgenzí na-mbʉ́ akódiko. 9 Dhipóbho-ndɨ́ a dháyǎngu, ɨ́ndɨ atɛ́lɛlɛ kó bhombi bhobhomu kézǐmesie mʉ̌ma. 10 Hɨ̌nzɨ kapɔ́ káza ʉkpɛ́, na kakókwóno, képosa kézǐmesi-tɛ́ndɛ́ mʉ̌ma mbúkosú kʉ́ka Azapana, ɨ́yɔ a no ubhomu, ɨ́yɔ amʉ́ Ambosó wo bhombi bhobhomu, bapɔ́ bhuí, ɨ́mba bha nayɨ́ wabhɨ́sɨ̀a.
11 Mopóbho-mbá nǒkùboliní-mba, bhʉ́tɨ́kɨ́á bhombi bhɔ́ bhâzɨ̌, na bhʉ́panɨ́ágǎ. 12 Mombi adɛkɨɛnɨ́ kʉ́ganzá kwákʉ, píi mámʉsá yó bhombi-mbá bha na Azapana wabhɨ́sɨ̀a, dhiké ʉ'sʉ̀mbʉ ɨ́mbʉ́bhɛlɨɔwɔ́: kísiké ubhélènege mbwakʉ, kɨ́sɨkɛ́ dhɨsɨnga ndyakʉ, kɨ́sɨkɛ́ dhɨkʉ́nda, kɨ́sɨká ʉbhɨ́sɨ̀a, na kɨ́sɨká mʉlʉ́ma-mbʉ́takatɔwɔ́. 13 Baba-átʉkʉ́ nàdiko-bhámʉ, dhiké na kpádhí kɔ́sɔ́mɔ Mabhɨ́mbɨ́ mámʉsá yó bhombi, kátʉ́wa bhombi, na-wá mápanʉ. 14 Wadɛkɨɛnɨ́ dhɨwá ndɨka Azapana ɨ́ndɨ wopóti-ndɛ́ ká ngasa nzyasɨ, ɨ́ndɨ a kíseníyi nzyakʉ, ɨ́ndɨ Azapana ókuwú-ndɛ́ ké u'bhélé wá bhanabǐ, na kɛ́ nɛdhɛ̀ngɛ-yɔ angbadɨlɨ wa bhapʉta bhá kanisa bhékùbǐsii-ndɛ́pɔ́ mɔbhɔ́kɔ. 15 Bǐsé u'bhélé-mbʉ kɨ́sɨká mʉlʉ́ma mbwakʉ, wáná ɨwʉ u'bhomu ké u'bhélé-mbʉ, dhɨtɛ́dhɨ́ bhɔ́ bhombi bhobhomu bhɛ́nɨ́ bhɔ́ wakɛ́ndɛ mámʉsá. 16 Ɨndá yánza kɛ́ dhɨsɨnga ndyakʉ mombólóbhi, nɛ dhɨ́panʉ ndyakʉ, kpátɨ́á kísiké u'bhélé-mbʉ. Képosa bhíi wǒziní anɨ́, wamboisonobhá ɨwʉ mombólóbhi palěmotí no bhombi-mbá bha nanáwʉ kɔ̂kɔ.