Bháklísitó kɨ́sɨká kanisa
5
Wa'gbɔ̌mɨ̀ɔgɔnɨ́ ʉ'kʉ́lʉ, píi ʉ'tʉ́wá átʉkʉ́ babǎkʉ. Bhɛ́nɛ́ bháganzá átʉkʉ́ bhanámákʉ́-mbemétuwó, 2 bhokúbhokólí átʉkʉ́ bhamamákʉ, bhasɨka átʉkʉ́ bhanámákʉ-mbo'kólúwo, kɨ́sɨká mʉlʉ́ma-mbʉ́takatɔwɔ́ kó mopóbho mobhomu.Bhokólí bhekwéne kɨ́sɨká kanisa
3 Bhúbhólóló bhokólí bhekwéne, ɨ́mba bhásɨ́ no mombi-yɔ abhúsìkegě. 4 Píi bhíi u'kólí u'kwéne a ne bheísí, bhêkâ bhanákanásɨ́, atɛ́lɛlɛ kpanga bhɔ́ ɨbhɔ́ bhɛ́pɛmbɨ́ɨ́ káza matandá-mbá aponikoso bhɔ́ bhabhá'kpakpana Azapana kɨ́sɨká ndabhʉ nzɨ́kɔ́wɔ mombólóbhi, kébhúsisie bhombi-mbá bhobhúbhókótí bhikímbó bhɛ́pɛpɛ́, képosa ɨ́nzyɛyɛ a yánza mámʉsá nzɨka Azapana. 5 Píi u'kólí u'kwéne-yɔ etígelító kakáka, ɨ́yɔ ásɨ́ no mombi-yɔ a'bhóloló, ézǐmesi-tɛ́ndɛ́ mʉlʉ́ma mbwasɨ kʉ́ka Azapana. Na masá mobhomu, túku na namánɨ́ awedhike ká ʉ'gǎmànɨaga Azapana kɨ́sɨkɛ́ dhɨkʉ́nga. 6 Píi ɨ́yɔ awedhike kɛ́bhɛ̀lɨɛgɛ nzala yá nʉtʉ nzyasɨ, okútókwô, pɔ́tɛndɛ́ bhɔ́ a ʉ'wɨ̌sɨ. 7 Bhʉ́balá u'bhélé-mbʉ, dhɨtɛ́dhɨ́ bhɔ́ bhakení ne dhipóbho-ndɨ́ bhombi bhabhúdhódho-pɔ́wɔ. 8 Píi mombi-yɔ ásíbhólolo bhombi mbasɨ, bapɔ́ bhuí bhombi bhá ndabhʉ nzyasɨ mombólóbhi, babhɔ́ ongóníító ʉbhɨ́sɨ̀a, na a mombi wowówo bhuí ká'pʉ́ta mombi-yɔ ásɨ́ na Azapana wabhɨ́sɨ̀a.
9 Kákàlaga dhine ndíko u'kólí u'kwéne kísikó bhúku yá kanisa, ékí-yɔ a matá ne mesisa-mbɔ́bhɔ́kɔtɔnɔwɔ́ modhíngo madhɨa, ɨ́yɔ éndé wakákala kʉ́kɛ ʉ'mɛtʉ kasɨ́ gbǎgbǎa, 10 na ékí ne dhilímí ká matandá mɛ́pɛpɛ́: bhíi ebhúlelí bheísí yánza, bhíi éndé-dhìkisege bhebika, bhíi éndé-sʉ̀kʉsaga magʉlʉ mó bhombi-mbá bha na Azapana wabhɨ́sɨ̀a, bhíi éndé-bhʉ́gamaga bhombi-mbá bhebhí kɨ́sɨká magali, bhíi ebhí na kpádhí ká kʉtɨ́ká kubhomu kwɛ́pɛpɛ́.
11 Píi bhokólí bhekwéne ɨ́mba bha kpanga bhasɨka, wabhɨ́sɨanɨ́ kábhʉ́kàlaga kísikó bhúku yá kanisa. Képosa kɛ́ nɛdhɛ̀ngɛ-yɔ nzala yá nʉtʉ abhúvele-pɔ́mʉ, bha'bie Kílísitó, bhépétiiní kʉ́nda bhɔ́ bhávanɨ́ kagapɔ́wɔ. 12 Ɨwâ bha'páta azǎbhʉ, képosa bhobhúnító dhimbolí ndɨkɔ́wɔ dhámámʉsá. 13 Kâ-mʉ́, angǎ bhásɨ́ na kʉtɨ́ká-kʉ bhazǎ, bhapilie ungíkènege ká bhandabhʉ yó bhombi. Ásɨ́ gbǎgbǎ bhɔ́ bhásɨ́ ne kímbó-nzɨzɔwɔ́, píi bha bhombi bhɛ́ nɛ́lɛgɛlɛgɛ, na-mbá bhakʉ́nda ʉkɨtɛ kísikó mopóbho mó bhombi-mbéné, ne-bhéle mopóbho-mbá ásɨ́ mbɔkɔ́wɔ. 14 Hɨ̌nzɨ nàpɔ́ kákʉ́nda bhɔ̂ bhokólí bhekwéne-mbá bha bhasɨka bhávanɨ́ávana, bhɔ́bhɔ́kɔ́tɨ́ bheísí, bhóbhólólí bhɔlɔ́gɔ mbɔ́kɔ́wɔ bhánza, dhɨtɛ́dhɨ́ bhɔ́ kamʉwánɨ́ nanyǎlá kosúb pala kótúdhódho. 15 Képosa bhokólí bhekwéne bhókotí bhéngíkeni-tɛ́ndɛ́ kɛ́'bhɛ̀lɨɛ U'zǐlí. 16 Bhíi mombi-yɔ o'bhísíí Azapana a no bhokólí bhekwéne kɨ́sɨkɔ́ lɔ́gɔ kasɨ́, atɛ́lɛlɛ bhɔ́ óbhúbhólólí yánza, kanisa adhuoní dɨdɨlɨ yéti, dhɨtɛ́dhɨ́ bhɔ́ kanisa óbhúbhólólí bhokólí bhekwéne ɨ́mba bhásɨ́ no mombi-yɔ abhúsìkegě.
Bhapʉta bhá kanisa
17 Bhapʉta-mbá bha na kanisa yámalɨa yánza, atɛ́lɛlɛ kábhʉ́wa dhɨmbalɨ́-ndɨ́bhʉ́mbatɨɔwɔ́ mala ɨ́bhalɨ́ ká kʉtɨ́ká kʉkɔ́wɔ, bapɔ́ bhuí ɨ́mba bhakɛ́zɛ̌ngɛmɛnɨɛ kʉtɨ́ká kwé Dhipóbho ndɨ́ka Azapana nɛ dhɨ́pànʉ. 18 Képosa kɨ́sɨká Mabhɨ́mbɨ́ abhélikene bhɔ̂: «Wa'kandanɨ́ nɔkʉ bobǒ-ngɔmbɛ-yɔ akésékise ngánɔ na magʉlʉ mbasɨ,c», kâ bhɔ̂: «Mombi wa kʉtɨ́ká atɛ́lɛlɛ kámʉwá agbǎma kasɨ́.d» 19 Wabhɨ́sɨanɨ́ dhipóbho-ndɨ́ bho'songíí-pɔ́ ʉ'pʉta, kága bhɔ́ ódoniní kɔ́ kʉnɔkʉ kwó bhombi bhepembíkésé bhábhalɨ́ bhêkâ bhásɨ́áʉ. 20 Ɨ́mba bhakáza ubhuu, bhʉ́mɛnɨ́ɛ́ mámʉsá yó bhombi bhobhomu, dhɨtɛ́dhɨ́ bhɔ́ bhombi-mbéné bhápátɨ́ kʉbhánga.
21 Nàkákʉ̀bala u'bhélé-mbʉ no'sisó mámʉsá nzɨka Azapana, na mámʉsá nzike Kílísitó Yezu, na mámʉsá yá bhamalaɨka ɨ́mba Azapana óbhúsòguu-ndɛ́mʉ: Bhólóló u'bhélé-mbʉ wánza, fɛsʉ nɛ-mɛ́nɨ̀ɛgɛ mombi, na wazanɨ́ kímbó ké'sìsege mombi. 22 Wa'bǐsiení mombi mɔbhɔ́kɔ gagala kámʉwá kʉtɨ́ká kɨ́sɨká kanisa, wadobukononí no mombi kísikó ubhuu mbwasɨ, bhólíkónó ɨwʉ mombólóbhi yánza kɨ́sɨká mʉlʉ́ma-mbʉ́takatɔwɔ́.
23 Wanáganɨ́ dhibho gbǎgbǎ, ʉ'vǎgǎ magadi dhɛ̌kɛ kɛ́-gʉlʉ́ yɔ́ sɔpɔ́ nzyakʉ, nɛ bhɛngbɛmɨ-nzɨ́ akʉzaga-ndɛ́ ʉ'kpa. 24 Matandá mó ubhuu mó bhombi-mbéné na azǎbhʉ kɔ́wɔ a mbúndú ké mise mó bhombi bhobhomu, mámʉsá bhɔ́ bhábhʉ́sámbɨ́sɨ́. Píi mó bhombi-mbéné akɛ́bhʉ́bhɛlɨɛ kúmbiso. 25 Pɔ́tɛndɛ́ matandá mɛ́pɛpɛ́ a kága mbúndú ké mise mó bhombi bhobhomu, na-mbá ásɨ́kɛ́nɨ̀kɛnɛ ásɨ́kpátɨ̀aga mɔ́gbɔkɔmɔ.