Bhamɨya-mbá bha Bháklísitó
6
Bhombi bhobhomu-mbá bha bhamɨya, bhɛ́bhɛ́nɨ́ bhangámá mbɔkɔ́wɔ átʉkʉ́ bhombi-mbá bhatɛ́lɛlɛ kábhʉ́mbatɨa bhuí, dhɨtɛ́dhɨ́ bhɔ́ dhine ndɨ́ka Azapana na mápanʉ mbókosú asòsikonogoní. 2 Na-mbá bhangámá mbɔkɔ́wɔ bha na Azapana wabhɨ́sɨ̀a, bhabhʉ́dɛkɨɛnɨ́ angǎ bha nɔbhɔ́ kɛ́-nákamá. Píi atɛ́lɛlɛ bhɔ́ bhábhʉ́zɨ̌ɨ́ kʉtɨ́ká kwánza bhuí, képosa bha bhombi-mbá bha na Azapana wabhɨ́sɨ̀a na bha bhɔnɔ́mɔ́wɔ bhámǔmeyí hɨ̌mba bha nɔbhɔ́ kábhʉ́zɨa kʉtɨ́ká.Mopóbho-mbâ atɛ́lɛlɛ bhɔ́ wǎpanɨ́ɨ́ na ʉtɨ́kɨ̀a bhombi.
Mapanʉ mɔ́ bhɔngɔ kâ nekùmu wayǎngu
3 Bhíi mombi ówíní dhɨ́panʉ dhókotí, na ásɨ́kɛ́bhɛlɨɛ mopóbho má yǎngu ɨ́mbaka Ngámá kosú Yezu Kílísitó, tɛndɛ́ dhɨ́panʉ-ndɨ́ a kɨ́sɨká apɨ́-nzɨ́'kpakpanɔwɔ́ Azapana, 4 babhɔ́ akásʉ̀waga ɨvʉ, ásíbe kímbó, píi a nɛ ngbɛmɨ yé u'bhélé wó dhóngósó kó mopóbho-mbɔ́kɔ́kɔnɔwɔ́. No mopóbho átʉkʉ́-mba adikiso ʉ̌nɨɛnɛ mise mówówo, nɛ dhɨ́mànʉ, no mosobhí, na-támbànaga-mbúwówo, 5 no udhóngòsono fɛsʉ ně-pènege wó bhombi-mbá mʉlʉ́ wé dhibhólú ndɨkɔ́wɔ andɛ́ matá dhɛ́kɛ̀gɛ, ɨ́mba bhóbhúngìsogi-tɛ́ndɛ́ uyǎngu. Bhadhɛngɛ átʉkʉ́ ʉ'kpakpana Azapana amʉ́ apɨ́ ká'páta nekùmu. 6 A yǎngu bhɔ̂ ʉ'kpakpana Azapana amʉ́ nekùmu wenénuwó, bhíi mombi a nɛ-gyagyǎ ké kímbó-nzɨ a noyí. 7 Képosa kódikí-ásɨ́ndɛ́ ne kímbó kísikó nokúnzi, na kásɨ́dɔndɛ-pɔ́ ne kímbó. 8 Hɨ̌nzɨ bhíi ka no kímbó-nzɨlɔ́wɔ na-nzílólowó, mopóbho-mbɛyɛ ake nebhósú mɔ́tɔ́ngɔ̀nɔ. 9 Píi ɨ́mba bhakʉ́nda kéke bhombi bhé nekùmu bhakógwo kɨ́sɨkɔ́ mɔgɔ, nɛ dhɨlɛ́kʉ, na afěfé wo mopóbho mɛ́ngangá mɔ́ kʉkpɔ́, ɨ́mba a nɔbhɔ́ kɔ́bhɔ́lɔ, ɨ́mba akébhékitise bhombi kɨ́sɨkɛ́ ʉ̌kɛ̀gɛ, ne dhibhúngògo. 10 Képosa dhɨkʉ́nda dhó bhopíto a dhitíne dhó uwówo u'bhomu. Bhombi-mbéné ɨ́mba bhéndé na afěféyi bhuí bhóbhúngògi-tɛ́ndɛ́ bɔwɔ na ʉbhɨ́sɨ̀a, no-sumbo kʉmɨlɨ́ma kʉ́kɔ́wɔ mombólóbhi kɨ́sɨkɛ́ zɛ̌ngɛ́mɛ́nɛ́ wo mopóbho menéni.
Matʉ́wa mbákɔ Pɔlɔ kúke Timotei
11 Píi ɨwʉ, mombi ka Azapana, tɨ́yá mopóbho-mbâ. Bhɛlɨ́ɛ́gɛ̌ uyǎngu, ʉ'kpakpana Azapana, ʉbhɨ́sɨ̀a, dhɨkʉ́nda, uvekese mʉ̌ma, nɛ dhɨzɨɔ. 12 Kwónó ʉ'kandʉ́ wɛ́pɛpɛ́ kɨ́sɨká ʉbhɨ́sɨ̀a, velé ubhomu wɛ́ bhɨzɛzɛ ɨ́mbʉ Azapana ékwésii-ndɛ́pɔ́mʉ, na-mbʉ́ wěpembikesi-ndɛ́pɔ́ ʉbhɨ́sɨa mbwakʉ wɛ́pɛpɛ́ mámʉsá yó bhombi bhenéni. 13 Nǒkutíkiiní u'bhélé-mbʉ mámʉsá nzɨka Azapana, ɨ́yɔ awá-ndɛ́ ubhomu ké bhikímbó bhibhomu, na mámʉsá nzike Kílísitó Yezu, ɨ́yɔ ówí-ndɛ́ pembíkésé wɛpɛpɛ́ wa ʉbhɨ́sɨ̀a mámʉsá nziko Póso Pilato: 14 bhólóló dhipóbho-ndɨ́ nǒkutíkiiní-ndɨ dhánza fɛsʉ nɛ ɨdhá, akení ne dhipóbho-ndɨ́ bhombi bhakudhódho-pɔ́wɔ, baba kɛ́ dhɨsá-ndɨ Ngámá kosú Yezu Kílísitó ǎnɨkɛnɛ̌ká-pɔ́wɔ. 15 Képosa ǎnɨkɛnɛ̌ká kɛ́ nɛ́dhɛngɛ ka Azapana mombólóbhi, ɨ́yɔ a na ʉnzá u'bhomu, ɨ́yɔ ʉkpɛ u'bhomu a-mbwasɨ kakáka, Kúmú wo bhokúmú na Ngámá wa bhangámá, 16 ɨyɨ́ kakáka hɨ̌yɔ ásíkwó, awedhike kɨ́sɨkɛ́ ʉgbɛlɛgbɛlɛ-mbʉ́ mombi ásɨ́dhala-kú. Atápɔ́ mombi motí ásɨ́ndɛ́-pɔ́ nayɨ́ wɛ̌nɛ, no mombi ásɨ́ngbɨndɨa kɛ́mɛnɛ. Kʉ́kasɨ́ ékí ʉmbàtɨa, nɛ ʉkpɛ́ wé dhikúmú kɛ́ bhɨzɛzɛ! Oyí.
Matʉ́wa kó bhombi bhé nekùmu
17 Bhʉ́balá bhombi bhé nekùmu wó nokúnzi-nzɔ bhɔ̂ bhasʉ̀waganɨ́ ɨvʉ, na bhazǐmesení mʉ̌ma mbʉ́kɔ́wɔ ké nekùmu-yɔ ásíbhúo, píi bhé'zǐméníí Azapana, ɨ́yɔ atʉ́wa-ndɛ́ bhikímbó bhibhomu bhágbalala, dhɨtɛ́dhɨ́ bhɔ́ kékí nobhí kɨ́sɨkɛ́ dhɨgyagyǎ. 18 Bházɨ̌ ʉnzá, bhékí bhombi bhé nekùmu kɨ́sɨká matandá mɛ́pɛpɛ́, bhékí bhombi-mbáwanàgɔwɔ́ na mʉlʉ́ma wɛ́pɛpɛ́, ɨ́mba bhakʉ́nda ugomboso bhikímbó mbɨkɔ́wɔ no bhombi-mbéné. 19 Káza anɨ́, bha'pìke gbuma wɛpɛpɛ́ we nekùmu kɛ́-bhɔ́ mombólóbhi kɛ́ nɛdhɛ̀ngɛ-yɔ akódiko, dhɨtɛ́dhɨ́ bhɔ́ bhékí no ubhomu wáyǎngu.
20 Námɨ Timotêi, u'bhólóló kɔ̀tɔ wo mopóbho mɛ́pɛpɛ́ ɨ́mba Azapana okuwú. Wabhɛ̀lɨɛgɛnɨ́ mopóbho-mbébhébhènegowó ímbo'dhóngosowó Azapana, no udhóngosono-mbʉ́ bhawɛ́sɨɛ bhɔ́ mʉlʉ́ wé dhibhólú kɔ́ bhɔngɔ. 21 Képosa bhombi-mbéné ɨ́mba bhéndé-bala bhɔ́ bha na mʉlʉ́ wé dhibhólú, bhébii-tɛ́ndɛ́ apɨ́ yá ʉbhɨ́sɨ̀a.
Ngasa nzɨ́ka Azapana ékí palěmotí nanáwʉ!