Túkúngíéni kʉ́ka Azpana
3
Ké pènège, bhasʉnzaka, túkúngíéni kʉ́ka Azapana, dhɨtɛ́dhɨ́ bhɔ́ dhipóbho-ndɨ́ka Ngámá ɛ́yɛngɨ́ gagala bhapala ibhomu na ʉbɨbɨkana, kága átʉkʉ́ akázɨkana kúkonú. 2 Na dhɨtɛ́dhɨ́ bhɔ́ kɔ́mbɔlɔ́gɨ̌ kɨ́sɨkɔ́ mɔbhɔ́kɔ mó bhombi bhá málɛ́ngɛ́ na bhówówo, képosa ʉbhɨ́sɨa ásɨ́ kó bhombi bhobhomu. 3 Píi Ngámá a mombi-yɔ atɛ́lɛlɛ ké'zǐmènìe, ɨyɨ́ hɨ̌yɔ anúmoiso-bhá yɛ́kpɛ, na anúbhólolo-bhá bɔwɔ no mombi wo uwówo-yɔ. 4 Na kanoyí yábhɨ́sɨ̀a, ké dhine-ndɨ́ka Ngámá, kɛ́-gʉlʉ́-nzikonú bhɔ́ mopóbho-mbá kanobhónú kákàlɨ̀àga nánɔmɔ́ kâza, kâbhɔ́ názǎza. 5 Na Ngámá éyengísí kʉmɨlɨ́ma kúkonú kɨ́sɨkɛ́ dhɨkʉ́nda-ndɨ́ka Azapana, na kísiké vekese wá mʉ̌ma ɨ́mbʉ Kílísitó otúwú.Atɛ́lɛlɛ bhɔ́ kázɨ̌ kʉtɨ́ká
6 Píi bhasʉnzaka, kanebhónú kábala bhɔ̂, ké dhine-ndɨ́ka Ngámá kosú Yezu Kílísitó, gbǎnágěni no bhonómónú bhobhomu-mbá bhakɛ́yɛngɛ ɨ́ngangá, fɛsʉ kɨ́sɨká mápanʉ-mbá bhopótí kúkosú. 7 Képosa bhónú mombólóbhi nápɛmbɨɛ tàla ngbangá átʉkʉ́ atɛ́lɛlɛ bhɔ́ nɛ́bhɛ̀lɨ́ɨ́ dhɨsɨnga-ndíkosú. Képosa kébhí-ásɨ́ nɛ dhɨsɨnga dhɛ́ngangá sɔ́bhɨ́-nzikonú. 8 Na kólí-ásɨ́ dhɨyá-ndiko mombi ké titií, píi kɨ́sɨká angu na ʉ̌gala, kozǐ kʉtɨ́ká tuku na namánɨ́, dhɨtɛ́dhɨ́ bhɔ́ ka'bengiseniení mombi sɔ́bhɨ́-nzikonú. 9 Ásɨ́ bhɔ́ kébhí-ásɨ́ no uyǎngu bhɔ́ nátʉ́wʉ́, píi dhɨtɛ́dhɨ́ bhɔ́ bhósú mombólóbhi kánákʉ́wʉ́ ʉ'sʉmbʉ bhɔ́ nɛ́bhɛlɨ́ɨ́ dhɨsɨnga ndíkosú. 10 Képosa kɛ́ nɛdhɛ̀ngɛ-yɔ kébhígapɔ́ kúkonú, kébhíga-nʉ́bala dhipobho-ndɨ̂ bhɔ̂: "Bhíi mombi ásɨ́kʉ́nda káza kʉtɨ́ká, alánɨ-dɔpɔ́ dhɨyá." 11 Képosa kakɔ̂kɔ bhɔ́ bhombi-mbéné sɔ́bhɨ́-nzikonú bhakɛ́yɛngɛ ɨ́ngangá, bhásɨ́káza kʉtɨ́ká, píi bhakʉ́nda ʉsɔmɨkɔnɔ kísikó mopóbho mobhomu. 12 Kano bhombi-mbɛyɛ kábhʉbala, kanɔbhɔ́ kátʉwa, ké dhine-ndɨ́ka Ngámá Yezu Kílísitó bhɔ́, bházɨ̌ kʉtɨ́ká kísiké udesene, bhálɨ́ dhɨyá-ndɨkɔ́wɔ dhó mombólóbhi. 13 Píi bhónú bhasʉnzaka, nágalanɨ́ káza ʉnzá. 14 Bhíi mombi ásɨ́kʉ́nda kóbhólolo dhipóbho-ndíkosú ɨ́ndɨ a kɨ́sɨká bhalʉa-nzɔ, mindéni mombi-yɔ yánza, nádobukononí nayɨ́ dhɨtɛ́dhɨ́ bhɔ́ ápátɨ́ soni. 15 Ná'velení átʉkʉ́ nanyálá konú, píi u'túwéni átʉkʉ́ nómónú.
Bhalaka na salǎmʉ
16 Na Ngámá we udesene ɨyɨ́ mombólóbhi ánákʉ́ʉ́ udesene kɛ́ nɛ́dhɛngɛ u'bhomu, ká bhapɨ́ ibhomu. Ngámá ékí palěmotí nebhónú bhobhomu. 17 Salǎmʉ kámɨ Pɔlɔ , wɔ kʉbhɔ́kɔ-kʉ́kamɨ mombólóbhi, ɨ́nzɨ a pembíkésé kɨ́sɨká bhabhalʉa-mbákamɨ bhobhomu, nàkàlàga-ndɛ́-bhɔ́. 18 Ngasa-nzɨ́ka Ngámá kosú Yezu Kílísitó ékí nebhónú bhobhomu.