Dhɨsá-ndɨka Ngámá, kâ udiko-mbúko mombi wa mányɛ́nyɛ́
2
Píi bhasʉnzaka, kane-bhónú kákʉnga kɛ́-gʉlʉ́-nzídikowó ɨ́mbʉka Ngámá kosú Yezu Kílísitó, no udobukonogo-mbúkosú kʉ́kasɨ́, 2 bhɔ́ námbambalanɨ́ gagala kɨ́sɨká ʉtámbànaga-mbúkonú, nákení nɔ bhʉɔsɔ́ bhêkâ ká mʉlʉ́ma, bhêkâ ké dhipóbho, bhêkâ ká bhalʉwa átʉkʉ́-yɔ akákana kúkosú, kábala bhɔ́ dhɨsá-ndɨka Ngámá etélélító. 3 Mombi anákʉ́pɛ̀tɛ̀gɛnɨ́ atápɔ́ ká apɨ́ ímotí, képosa dhɨsá-ndyɛyɛ ásɨ́bhá-tɛlɛ̀lɛ́ kága bhɔ́ dhóngósó wenénuwó kɛ́-gʉlʉ́-nzɨka Azapana ódikiní, no mombi wa mányɛ́nyɛ́ énikeniní, mombi we dhibhúngògo. 4 Ɨyɨ́ Adhóngosó, na adhonikono-bhá mombólóbhi ɨgʉlʉ́ yé bhikímbó bhibhomu-mbɨ́ a ké dhine-ndɨ́ka Azapana, ne kímbó ibhomu-nzɨ́'bɨbɔwɔ́ Azapana, babǎtʉkʉ́ ɨyɨ́ andɛ-dhike kɨ́sɨká ndabhʉ nzɨ́ka Azapana, óponikoniní ɨyɨ́ mombólóbhi átʉkʉ́ Azapana. 5 Násɨ́támbana bhɔ́ nèbhíga-nʉ́bala dhipóbho-ndɨ́ kɛ́ nɛdhɛ̀ngɛ-yɔ nèbhígapɔ́ kúkonua? 6 Ne gěgenzí bhónú nábe tàla kímbó-nzɨ ane u'bhélé-mbʉ wátɨ̀a, bhɔ́ mombi-yɔ ɛ́nɨ́kɛ́nɨ́ kɛ́ nɛ́dhɛngɛ kasɨ́ mombólóbhi. 7 Képosa kʉtɨ́ká kuko mombi wa mányɛ́nyɛ́ amata kázɨkàna kɨ́sɨkɔ́ ʉgbɔkɔ̀mɔ. A gbǎgbǎ bhɔ́ ɨ́yɔ anayɨ́ watɨ̀a gěgenzí kága bhɔ́ ókoniní. 8 Ɨwâ, hɨ̌nzɨ mombi wa mányɛ́nyɛ́-yɔ ǎnɨkɛnɛbhá-pɔ́wɔ, ɨ́yɔ Ngámá Yezu amɔ́lɔ-bhá nɔ bhɔdɨ̌ wɔ́ nɔkʉ-mbwasɨ, ne mékìsège ká ʉpanɨkana-mbúdikowó-mbwasɨ. 9 Mombi wa mányɛ́nyɛ́-yɔ adiko-bhá nɛ ʉkpɛ́-mbuke U'zǐlí káza matandá mobhomu mɛ́ bhipuní nɛ bhɨpʉngʉ bhɔ́ bhɔ̌ngɔ. 10 Azabhá mopóbho mobhomu mówówo kɛ́bhʉ́pɛ̀tɛ̀gɛ bhombi-mbóbhungògowó, képosa bhókúndí-ásɨ́ndɛ́ kábhɨsɨ̀a uyǎngu bhɔ́ bhɔ́mbɔlɨ́. 11 Hɨ̌nzɨ Azapana óbhútísiiní-pɔ́ ʉkpɛ́ wé dhibhúngògo, bhɔ́ bhábhɨ́sɨ́ɨ́ mopóbho mɔ́ bhɔ̌ngɔ. 12 Dhɨtɛ́dhɨ́ bhɔ́ bhá'pátɨ́ azǎbhʉ bhombi bhobhomu-mbá bhóbhísíí-ásɨ́ndɛ́ uyǎngu, píi bhéndé nɛ dhɨgyagyǎ kísikó uwówo.Máléni yɛ́kpɛ kɨ́sɨká ʉbhɨ́sɨa-mbúkonú
13 Píi bhósú, atɛ́lɛlɛ bhɔ́ ké'sisíí Azapana dhɨ́bɨba masá mobhomu kɛ́-gʉlʉ́-nzikonú bhasʉnzaka, bhónú-mba Ngámá ónúkúndi-ndɛ́mʉ. Képosa Azapana ónúsòguu-ndɛ́ bhónú mámʉsá, bhɔ́ návɨ̌ ʉmbɔlɔ kɨ́sɨká ʉsʉkʉsana wá Mʉlʉ́ma-mbʉ́kwálɔɔ́ na ʉbhɨ́sɨa wá uyǎngu. 14 Anɨ́ hɨ̌nzɨ enékwésíí-pɔ́wɔ ká apɨ́ yé Dhipóbho Dhɛ́pɛpɛ́-ndikosú, dhɨtɛ́dhɨ́ bhɔ́ návɨ̌ dhɨ́bɨba-ndɨ́ka Ngámá kosú Yezu Kílísitó. 15 Hɨ̌nzɨ a bhɔ̂, bhasʉnzaka, máléni yɛ́kpɛ, bhólóléni yánza mápanʉ-mbá konúponíí, bhêkâ ké u'bhélé, bhêkâ ká bhalʉa kosú. 16 Na Ngámá kosú Yezu Kílísitó ɨyɨ́ mombólóbhi, na Azapana Bobǒsú ɨ́yɔ ótúkúndi-ndɛ́mʉ, na-tʉ́wa dhɨgyagyǎ dhɛ́ bhɨzɛzɛ nɛ bhɨzɛzɛ nɛ sɨbhʉ́ndá dhɛ́pɛpɛ́ ká ngasa, 17 ánákʉ́ʉ́ dhɨgyagyǎ ká kʉmɨlɨ́ma kúkonú, ónúmóísí yɛ́kpɛ kɨ́sɨká ɨtandá ibhomu ne dhipóbho dhibhomu dhɛ́pɛpɛ́.