Salǎmʉ
1
Pɔlɔ nɛ Sɨlɨvǎnɔ ne Timotei, ká kanisa yá Bhatesalonika, ɨ́nzɨka Yabǎ Azapana na-nzɨ́ka Ngámá Yezu Kílísitó. Ngasa ne udesene ékí nebhónú.Ʉ'sʉmbʉ wɛ́pɛpɛ́ kɨ́sɨká ʉbhɨ́sɨa wá Bhatesalonika
2 Kaké'sisie Azapana dhɨ́bɨba masá mobhomu kɛ́-gʉlʉ́-nzikonú, na ka nebhónú kátambàna ʉ'kpa kɨ́sɨkɛ́ dhɨkʉ́nga-ndíkosú. 3 Kakátambàna kʉtɨ́ká-kukonú kɨ́sɨká ʉbhɨ́sɨa, ne dhikùlu-ndíkonú kɨ́sɨkɛ́ dhɨkʉ́nda, na mʉ̌manda-mbúkonú kɨ́sɨkɛ́ sɨbhʉ́ndá-ndɨka Ngámá kosú Yezu Kílísitó mámʉsá-nzɨka Azapana Bobǒsú. 4 Kǎbe tàla, bhasʉnzaka, bhónú-mba Azapana ónúkúndi-ndɛ́mʉ, bhɔ́ ɨyɨ́ hɨ̌yɔ ónúsòguu-ndɛ́mʉ. 5 Képosa Dhipóbho Dhɛ́pɛpɛ́-ndikosú ódholí-ásɨ́ kúkonú ké u'bhélé gbǎgbǎ, píi ebhí kɨ́sɨkɛ́ ʉkpɛ́, na kɨ́sɨká Mʉlʉ́ma-mbʉ́kwálɔwɔ́, na kɨ́sɨká uyǎngu bhuí. Kága átʉkʉ́ nápɛmbɨɛ tàla bhɔ́ kébhíga bhombi bhɛ́ dhɨsɨnga-sá sɔ́bhɨ́-nzikonú, kɛ́-gʉlʉ́-nzikonú. 6 Nebhónú nótoní bhombi-mbɛ́bhɛlɨɔwɔ́ dhɨsɨnga-ndíkosú na-ndɨ́ka Ngámá. Képosa tɛndɛ́ kɨ́sɨká magali unéni, nóbhísíí dhipóbho-ndɨ́ka Azapana nɛ dhɨgyagyǎ dhá Mʉlʉ́ma-mbʉ́kwálɔwɔ́. 7 Ká-pɨ́-nzyɛyɛ nóponító ʉ'sʉmbʉ wɛ́pɛpɛ́ ɨ́mbʉ́bhɛlɨɔwɔ́ kó bhombi bhobhomu-mbá bhaká'bhɨ́sɨa Ngámá kɨ́sɨká dhʉdhʉ́ yá Makedoniya na Akaya. 8 Képosa ʉkana kúkonú dhipóbho ndɨ́ka Ngámá okíkónító, ásɨ́ kɨ́sɨká Makedoniya na Akaya gbǎgbǎ, píi ká bhapala ibhomu-nzɨ́ u'bhélé mbukonú akú kɔ́kɨ̀kɔnɔ, ngbangá átʉkʉ́ ná na Azapana wabhɨ́sɨ̀a, hɨ̌nzɨ tɛndɛ́ bhósú kásɨ́-pɔ́ ne dhipóbho-ndíbhélowó. 9 Képosa ɨbhɔ́ mombólóbhi bhakábalɨaga u'bhélé-mbukosú ngbangá átʉkʉ́ nótúpokíí kádhala-mbúkosú kúkonú, na ngbangá átʉkʉ́ néméngíkéníí Azapana, ne-bie kábɨba bhikókó, káza kʉtɨ́ká-kʉka Azapana wo ubhòmu na wa yǎngu. 10 Na ʉ'bhʉ́ndàga Násɨ-yɔ akódiko ʉkana ká tʉ́bǎ, Yezu, ɨ́yɔ ó'disi-ndɛ́ ká mbʉkʉ, ɨ́yɔ a nebhósú kómboiso ká nákàkùtu-yɔ akódiko.