Yɔna ó'tíiní Azapana
(2 Kum 14.25, Memb 139.7-10)
1
Dhipóbho-ndɨ́ka Akulugu ó'tókoni-ndɛ́ Yɔna, náka Amitai kábala bhɔ̂: 2 "Málá, ndɛ́ ké Nináwe, gbɔ̌tɔ́ wenénuwó, ʉ'yǎnɨ́ágǎ. Képosa uwówo-mbwasɨ okíí-tó baba kʉ́kámɨ." 3 Píi Yɔna ókoniiní kátɨ́a kɔ́ gbɔ̌tɔ́ wa Talasisi, bɔwɔ ne mise-mbáka Akulugu. Édidiní kɔ́ gbɔ̌tɔ́ wa Yafo, ótókoniní galʉ́ngʉ́-nzɨ éndé kɛ́ndɛ ká Talasisi, ówíni bhopító bhɛ́ dhɨzɨnda, ókiiní palěmotí no bhombi bhá galʉ́ngʉ́ kɛ́ndɛ ká Talasisi, bɔwɔ ne mise-mbáka Akulugu.4 Píi Akulugu ótísiiní mbumbó-nzinénuwó bhuí kísiké dhitílí, bhakpoki-mbɛ́kpɔ́wɔ bhódikiní kísiké dhitílí, galʉ́ngʉ́ ebhí pɨ́ɔ́nɔ́ bhɔ́ álɨkɨ́. 5 Bhombi bhá galʉ́ngʉ́ bhebhí kɨ́sɨká kʉbhánga badi, bhépétiiní kʉ́gɨaga mombi no mombi ká'gǎmànɨaga azapana kasɨ. Bhépílieginí bhikímbó-mbɨ éndé kɨ́sɨká galʉ́ngʉ́ ké dhitílí bhɔ́ galʉ́ngʉ́ akení wèti. Píi Yɔna éndé matá bhɔ́ edidǐ-tó kíseníyi yá galʉ́ngʉ́, ólonginí, ólóliní tɔlɔ́. 6 Gbukúlu wo bhombi bhá galʉ́ngʉ́ ésekiní bhíbi nayɨ́, ó'boliní bhɔ̂: "Hǒ! Kásá-nzɨ wapɔ́ kɔ́ tɔlâ? Zuzǔkó, ʉ'kʉ́ngá Azapana kakʉ́, bhêkâ bhɔ́ Azapana atwɛ́nɨɛ-nzyéné kokó kótúmbòso bhɔ́ kasíení." 7 Bhóboloniní ɨbhɔ́ kɛ́-bhɔ bhɔ̂: "Dikóni kébǐsí mapɨ́ngɔ, kɛ́pɛmbɨ́ɨ́ bhíi nzáká-nzɔ ótúdikisiiní kukwó-kʉ." Bhébǐsiní mapɨ́ngɔ, mapɨ́ngɔ ólíni nɔ Yɔna. 8 Bhó'boliní bhɔ̂: "Tʉ́balá, kukwó-kʉ kakɨ́sɛnɨ́ a ké dhipóbho-ndɨ́ka nzákâ? Kʉtɨ́ká-kwákʉ́ a-sâ? Wakódiko sanâ? Wa mombi wa dhʉdhʉ́-nzyanâ? Wa'zi bhanzákâ?" 9 Ébhúsisiiní bhɔ̂: "Ɨmɨ nà U'balanía, nà na Akulugu, Azapana wa tʉ́bǎ wambatɨa, ɨ́yɔ ozǐ dhitílí na dhʉdhʉ́." 10 Kʉbhánga-kúnénuwó ébhúveliní bhombi-mbɛyɛ, bhó'boliní bhɔ̂: "Kásá-nzɨ wozǐ-pɔ́ anɨ́a?" Képosa bhepembíí bhɔ́ éndé kátɨ́a bɔwɔ ne mise-mbáka Akulugu, ngbangá átʉkʉ́ óbhúboli-ndɛ́mʉ. 11 Bhómóusiní bhɔ̂: "Kákʉzɨ̌-bhʉnâ bhɔ́ dhitílí étúdeséníía?" Képosa dhitílí éndé gbǎgbǎ kɛ́ndɛ ne dǐngene na bhakpoki. 12 Óbhúboliní bhɔ̂: "Nivěni, nipílíéni kísiké dhitílí, hɨ̌nzɨ dhitílí adesene-pɔ́ ké-bhónú, képosa nǎbe tàla bhɔ́ a ké dhipóbho-ndɨ́kamɨ hɨ̌nzɨ bhakpoki-mbɛ́kpɔ́wɔ-mba bhapɔ́ ɨgʉlʉ́-nzikonú." 13 Bhombi-mbɛyɛ bhondóngí kó'pùlo galʉ́ngʉ́ bhɔ́ bhádhalɨ́ kɛ́ tɛtɛtɛ, bhóngbindí-ásɨ́, képosa dhitílí éndé kɛ́ndɛ ne dǐngene gbǎgbǎ na bhakpoki-mbɛ́kpɔ́wɔ bhuí. 14 Ɨwâ, bhépétiiní ʉ'gǎmànɨaga Akulugu kábala bhɔ̂: "Akulugu, kíkilíki, kasíení ké dhipóbho-ndíko mombi-nzɔ, watúbǐsení-dɔpɔ́ ne dhikita dhó kukwó-kuko mombi-nzɔ kásɨ́ ne dhipóbho nayɨ́. Képosa ɨwʉ Akulugu, hʉ̌yɔ-zǐ ngbangá átʉkʉ́ wokúndí. 15 Bhó'viní Yɔna, bhómufiní kísiké dhitílí, bhakpoki bhé dhitílí bhédeseniní. 16 Kʉbhánga-kúnénuwó ɨ́kʉka Akulugu ébhúveliní bhombi-mbɛyɛ. Bhówíni dhɨngɔsɔ kʉ́ka Akulugu, bhaná'tɨna nɛ́paká.