Yɔna kɨ́sɨkɔ́ sɔpɔ́ yó u'sí ó'kúnginí Azapana
(Isa 38.10)
2
Gagala-nzyɛyɛ, Akulugu ó'tíkiní u'sí wenénuwó ké'miye Yɔna. Yɔna ozǐ kɨ́sɨkɔ́ sɔpɔ́ yó u'sí kʉmánɨ́ kʉ́sɨ́áʉ no túku ʉ́'sɨ́áʉ. 2 Yɔna kɨ́sɨkɔ́ sɔpɔ́ yó u'sí, ó'kúnginí Akulugu, Azapana kasɨ, 3 óboliní bhɔ̂:"Kɨ́sɨká magali kámɨ, nèmésíí Akulugu,
onibhísíí-ánɨbhɨ́sɨa.
Ʉkana wásíyi yó u'zi wá kʉlɨ́ndá
nòkugǒmóníí-kwô,
wokí dhiyǒ-ndɨkámɨ-ɔ́kɔ.
4 Wenipílíí-tó wásɨ́ bhuí kɨ́sɨká màmǎsí we dhitílí.
Ngbʉngbʉ́ yó dhibho a nɛmɨ yélínge.
Bhakpoki-mbákʉ na ngbʉngbʉ́-nzyakʉ ibhomu
opútí-tó ɨgʉlʉ-nzɨkámɨ.
5 Hɨ̌nzɨ ɨmɨ nèbhíga balapɔ́ bhɔ̂:
'Wenibhelí-tó bɔwɔ ne mise-mbákʉ.
Píi pɔ́tɛndɛ́ anɨ́, nàɨndabhá kágapɔ́ ká ndabhʉ-nzyakʉ́ ɨ́nzɨ́lawɔɔ́.'
6 Dhibho onidholí baba kó síngó,
négyégye a nɛmɨ welínge.
Malangá mó dhibho edhíngíkénégǐ-tó ká mʉlʉ́-mbʉkámɨ.
7 Nèsií baba wásíyi yá bhagʉmba,
kɨ́sɨká dhʉdhʉ́-nzɨ kupumúyi ebhí nɛmɨ kwádhàka kɛ́ bhɨzɛzɛ.
Píi wonidisí ʉ'wɨ̌sɨ kísiké négyégye,
ɨwʉ Akulugu, Azapana kámɨ.
8 Kɛ́ nɛdhɛ̀ngɛ-yɔ nèbhí matá-pɔ́ kátɨ́na mʉlʉ́ma,
nò'tómbóní Akulugu.
Dhɨkʉ́nga-ndɨ́kamɨ odholí baba kʉ́kakʉ́,
baba ká ndabhʉ-nzyakʉ́ ɨ́nzɨ́lawɔɔ́.
9 Bhombi-mbá bhakpakpana no mopóbho má'tʉ́tʉ,
bhakébie ngasa-nzɨ́kɔ́wɔ.
10 Píi ɨmɨ, nàkʉwá-bhá dhɨngɔsɔ
bhɔ́ nànámbe dhímbe índíkusisiowó dhɨ́bɨba.
Nà'kàlàgabhá nɛ́paká-kámɨ ɨ́yɔ nǒzi-ndɛ́mʉ.
Ʉmbɔlɔ a kʉ́ka Akulugu.a"
11 Ɨwâ, Akulugu ébhéliní no u'sí-yɔ, éndiní u'zeye Yɔna ké u'tìli.