Dhɨsɨnga na kʉtɨ́ká-kʉkɔ Pɔlɔ ká Bhatesalonika
2
Képosa bhónú mombólóbhi nápɛmbɨɛ tàla, bhasʉnzaka, bhɔ́ ʉdhala-mbúkosú kúkonú ébhí-ásɨ́ ké titií. 2 Píi mámʉsá bhɔ́ kádhalɨ́ kúkonú, ko'pótí magali ne dhisobhí kɔ́ gbɔ̌tɔ́ we Filipi, kága atʉkʉ́ nábe tàla. Píi kopótí dhɨkpɛ́kpɛ́kpɛ́ dhá mʉlʉ́ma kʉ́ka Azapana kosú kánʉbalɨaga Dhipóbho Dhɛ́pɛpɛ́-ndɨka Azapana kísikó dhóngósó u'néni. 3 Képosa dhɨtʉ́a-ndíkosú ásɨ́ kákana kó mopóbho mé dhibhúngògo, tɛndɛ́ má ʉtámbànaga-mbúwówo, tɛndɛ́ kɛ́ ʉpɛtɛgɛ. 4 Píi ngbangá átʉkʉ́ Azapana otúbhísíí kátʉwa kʉtɨ́ká kwé Dhipóbho Dhɛ́pɛpɛ́, hɨkágǎ-nzɨ kapɔ́ kébhele, ásɨ́ kákabha dhɨkʉ́nda dhó bhombi, píi dhɨkʉ́nda-ndɨ́ka Azapana ɨ́yɔ ǎseese-ndɛ́ kʉmɨlɨ́ma-kúkosú. 5 Képosa kébhí-ásɨ́ ne dhipóbho-ndíbibikisonowó kó bhombi, ngbangá átʉkʉ́ nábe tàla, tɛndɛ́ na mʉlʉ́ma wá anga, Azapana a pembíkésé kosú. 6 Kókóbhí-ásɨ́ dɔpɔ́ dhɨ́bɨba kákana kó bhombi, tɛndɛ́ ké-bhónú, tɛndɛ́ kó bhombi-mbéné. 7 Kǎ bhósú átʉkʉ́ bhatɨ́kátɨ́ká-mbake Kílísitó kebhí-ngbɨndɨa bhɔ́ kékí nɛ ʉkpɛ́ ɨgʉlʉ́-nzikonú, píi kebhí átʉkʉ́ bheísí-mbɛ́nyɛlɔwɔ́ sɔ́bhɨ́-nzikonú, átʉkʉ́ yamá-yɔ akɛ́lɛlɛ bhanásɨ́́ mombólóbhi. 8 Hɨ̌nzɨ abhɔ̂, angǎ kebhí nɛ dhɨkʉ́nda bhuí nebhónú, kení yánza bhɔ́ kánákʉ́ʉ́ bhónú ibhomu, ásɨ́ gbǎgbǎ Dhipóbho Dhɛ́pɛpɛ́-ndɨka Azapana, píi baba na kʉmɨlɨ́ma-kúkosú tàla, képosa nótoní bhombi-mbókosú bhá mǔmeyí. 9 Képosa, bhasʉnzaka, támbánéni dhikùlu na ʉ̌gala-mbúkosú, kozǐ kʉtɨ́ká tuku na namánɨ́ kátɨ́a bhɔ́ ka'zǐmeniení mombi atápɔ́ motí sɔ́bhɨ́-nzikonú, konúbolíógǐ Dhipóbho Dhɛ́pɛpɛ́-ndɨka Azapana. 10 Bhónú ná bhepembíkésé-mbokosú, na Azapana tàla bhɔ́, kebhí nɛ dhɨsɨnga-ndɨ́lawɔɔ́, na dhá yǎngu, fɛsʉ nɛ ɨdhá sɔ́bhɨ́-nzikonú, bhónú-mba nó'bhísii-ndɛ́ Ngámá. 11 Kága átʉkʉ́ nábe tàla bhɔ́ kebhí sɔ́bhɨ́-nzikonú kúko mombi motí ké motí átʉkʉ́ yabǎ na bhanásɨ́́ mombólóbhi. 12 Konókúú matʉ́a, nɛ dhɨkpɛ́kpɛ́kpɛ́ dhá mʉ̌ma, na konúkúngí yɛ́kpɛ́ dhɨtɛ́dhɨ́ bhɔ́ nɛ́yɛngɨ́ kɨ́sɨkɛ́ dhɨsɨnga-ndɨ́ Azapana abhɨ́sɨá, ɨ́yɔ a nebhónú kɛ́wɛsɨɛ kɛ́kɨtɛ kísiké dhikúmú-ndyasɨ mombólóbhi nɛ dhɨ́bɨba-ndyasɨ.13 Kɛ́-gʉlʉ́ yé dhipóbho-ndyɛyɛ hɨ̌nzɨ kapɔ́ ké'sisie Azapana dhɨ́bɨba fɛsʉ na ʉ̌gala, képosa kɛ́ nɛdhɛ̀ngɛ-yɔ nóbhísíí-pɔ́ dhipóbho-ndɨ́ka Azapana ɨ́ndɨ nókí nebhósú, nóbhísíí-ásɨ́ átʉkʉ́ dhipóbho dhó bhombi, píi ngbanga kága átʉkʉ́ amʉ yǎngu dhipóbho-ndɨ́ka Azapana, ɨ́ndɨ akáza kʉtɨ́ká kísiké bhónú-mba ná nodhí kábhɨsɨ̀a. 14 Képosa bhónú, bhasʉnzaka, nébhelii-tɛ́ndɛ́ dhɨsɨnga dhá makanisa-nzɨ́ka Azapana ɨ́nzɨ a kɨ́sɨká dhʉdhʉ́ yó Yuděya kísiké Kílísitó Yezu. Képosa ngbangá átʉkʉ́ bhombi bhá dhʉdhʉ́-nzikonú mombólóbhi bhenúzěngíí, nɛbhɔ́ tàla, bhombi bhá dhʉdhʉ́-nzɨkɔ́wɔ, Bhayuda, bhebhúzěngíí kágǎ anɨ́. 15 Ɨbhɔ́ hɨ̌mba bhómóli-ndɛ́ Ngámá Yezu na bhanabǐ, hɨ̌mba bhétúzěngii-ndɛ́ kâ bhósú. Bhásɨ́za dhɨkʉ́nda-ndɨ́ka Azapana na bha no dhóngósó no bhombi bhobhomu. 16 Bha nebhósú kátɨ̀a bhɔ́ kabalɨaganɨ́ Dhipóbho Dhɛ́pɛpɛ́ kó bhombi-mbá bhásɨ́ Bhayuda bhɔ́ bhavɨ̌ ʉmbɔlɔ. Bhakáza anɨ́ dhɨtɛ́dhɨ́ bhɔ́ bhétélélísí ubhuu-mbʉ́kɔ́wɔ ɨ́mbʉ bha-ndɛ́ noú káza masa mobhomu. Píi dhɨngbʉka-ndɨ́ka Azapana obhútókónító ké-penege.
Pɔlɔ a na nzala kɛ́ndɛ bhɛ́nɛ Bhatesalonika
17 Píi bhósú, bhasʉnzaka, angǎ kebiéní nebhónú dhɛ̌kɛ kɛ́ nɛ́dhɛngɛ motí, ká nʉtʉ ásɨ́ ká mʉlʉ́ma, kozǐ ʉkpɛ́ na nzala bhuí bhɔ́ kɛ́nɛ́nɨ́ kagapɔ́ nebhónú mise ké mise. 18 Hɨ̌nzɨ kébhíga-kʉ́ndapɔ́ bhɔ́ kɛ́ndɨ́ kúkonú, bapɔ́ bhuí ɨmɨ Pɔlɔ , nòndóngí-kànda dhɨzɨnda mala ɨ́bhalɨ́, píi U'zǐlí ebhí nebhósú bhátɨ̀a. 19 Képosa ɨsá-nzɨ kabǐsie-pɔ́ mʉlʉ́ma, bhêkâ dhɨgyagyǎ-ndikosú, bhêkâ gbǒndóló kosú wɛ dhɨ́bɨba? Ásɨ́ bhónúa mámʉsá-nzɨka Ngámá kosú Yezu kódiko-mbwasɨ́a? 20 Képosa bhónú ná dhɨ́bɨba-ndíkosú nɛ dhɨgyagyǎ-ndikosú.