Pɔlɔ ó'tíkiní Timotei ká bhatesalonika
3
Hɨ̌nzɨ angǎ kóngbindúwó matá kɔ́kɔ̀nɨɔ, kení yánza kétigele ká Atɛnɛ bhósú kakáka, 2 kó'tíkí Timotei, nómósú, no mombi wa kʉtɨ́ká ka Azapana kísiké Dhipóbho Dhɛ́pɛpɛ́-ndike Kílísitó, dhɨtɛ́dhɨ́ bhɔ́ énúpinzíkésí na énúvekésí mʉ̌ma kɨ́sɨká ʉbhɨ́sɨa-mbúkonú. 3 Mombi atá-pɔ́ motí abhúnikoní kɨ́sɨká mʉ̌ma ká magali-nzɔ kakɨ́sɛnɨ́. Képosa bhónú mombólóbhi nábe tàla bhɔ́ kɛ́-gʉlʉ́ yé u'bhélé-mbwɛyɛ hɨ̌nzɨ kapɔ́wɔ. 4 Képosa kɛ́ nɛdhɛ̀ngɛ-yɔ kebhí-pɔ́ nebhónú, kónúboli-ndɛ́ mámʉsá bhɔ́ ka'pátabhá magali, anɨ́ hɨkágǎ-nzɨ ozikóní, nábe tàla. 5 Píi angǎ nǒngbindúwó matá kɔ́kɔ̀nɨɔ, hɨ̌nzɨ nò'tíkí-pɔ́ Timotei bhɔ́ nɛ̌pɛmbɨ́ɨ́ ʉbhɨ́sɨa-mbúkonú. Kátɨ́a bhɔ́ U'zǐlí-yɔ amaka-ndɛ́ bhombi kɨ́sɨkɔ́ mɔgɔ anʉ́makanɨ́ kɨ́sɨkɔ́ mɔgɔ-mbasɨ, ne dhikùlu-ndíkosú akení dhétitií.6 Píi gěgenzí, angǎ Timotei odikí-tʉ́tákaná kákana kúkonú, otúbolí u'bhélé-mbukonú wɛ́pɛpɛ́ wá ʉbhɨ́sɨa-mbúkonú, wɛ́ dhɨkʉ́nda-ndíkonú, na ngbangá átʉkʉ́ ná nebhósú kátambànaga yánza masá mobhomu, na nzala-nzíkonú bhuí kɛ́tɛnɛ, kága átʉkʉ́ bhósú ka na nzala bhɔ́ kɛ́nɛ́kwɛ́nɨ́ kâ bhónú. 7 Kɛ́-gʉlʉ́ yé u'bhélé-mbwɛyɛ, bhasʉnzaka, hɨ̌nzɨ kovǐ-pɔ́ dhɨkpɛ́kpɛ́kpɛ́ dhá mʉ̌ma kɨ́sɨkɛ́ zɛ̌ngɛ́mɛ́nɛ́ na magali kosú u'bhomu, angǎ kokí u'bhélé wá ʉbhɨ́sɨa-mbúkonú. 8 Hɨ̌nzɨ gěgenzí kówǒmuuní, képosa nábhámala yɛ́kpɛ́ kísiké dhine-ndɨ́ka Ngámá. 9 Képosa kásɨ́pɛmbɨɛ bhɔ́ ké'sisíí Azapana dhɨ́bɨba dhɨnzáláka ké dhipóbho-ndíkonú, kɛ́ dhɨgyagyǎ dhibhomu-ndɨ́ ka nodhí kɛ́-gʉlʉ́-nzikonú, mámʉsá-nzɨka Azapana kosú. 10 Tuku na namánɨ́ kaká'kʉnga Azapana ne dhikùlu bhɔ́ átʉ́ʉ́ apɨ́ kɛ́nɛ́nɨ́ nebhónú mise ké mise, kénúsekisie ɨ́nzɨ ná noyí yásɨ́ka kɨ́sɨká ʉbhɨ́sɨa-mbúkonú. 11 Píi Azapana mombólóbhi, Bobǒsú, na Ngámá kosú Yezu, ótókúlíí apɨ́ kɛ́ndɛ kúkonú. 12 Na Ngámá énúsekísíí na ónútúmísíí dhɨkʉ́nda dhágbalala bhónú ké-bhónú na kó bhombi bhobhomu, kága átʉkʉ́ bhósú ka nodhí ké-bhónú. 13 Énúpinzíkésí kʉmɨlɨ́ma kúkonú, fɛsʉ nɛ ɨdhá kɨ́sɨkɛ́ dhɨsɨnga-ndíkonú átʉkʉ́ bhombi-mbálawɔɔ́ mámʉsá-nzɨka Azapana Bobǒsú, kódiko-mbʉ́ka Ngámá kosú Yezu, palěmotí no bhombi-mbálawɔɔ́-mbasɨ bhobhomu.