Dhɨsɨnga-ndɨ́ Azapana akʉ́nda
4
Képipikese, bhasʉnzaka, ngbangá átʉkʉ́ nóvǐ nebhósú dhɨsɨnga-ndɨ́ atɛ́lɛlɛ bhɔ́ nɛ́yɛngɨ́ kɨ́sɛnɨ́ ɨ́ndɨ Azapana akʉ́nda, kága átʉkʉ́ nákɨ́sɛnɨ́ kɛ́yɛngɛ, ka nebhónú kákʉnga, na ka nebhónú kánákʉ́wa dhɨkpɛ́kpɛ́kpɛ́ kísiké dhine-ndɨ́ka Ngámá Yezu, bhɔ́ yengéni yánza bhuí kɨ́sɨkɛ́ dhɨsɨnga-ndyɛyɛ. 2 Képosa nápɛmbɨɛ bhɨtá-mbɨ konókúú tàla ké dhine-ndɨ́ka Ngámá Yezu. 3 Képosa dhɨkʉ́nda-ndɨ́ka Azapana abhɔ̂, kéni bhombi-mbálawɔɔ́, na tíéni kéke nɛ dhɨkpála. 4 Mombi motí ké motí kísiké bhónú ɛ́pɛmbɨ́ɨ́ kóbhólolo nʉtʉ-nzyasɨ mombólóbhi kéke ɨ́nzɨ́lawɔɔ́ na ɨ́nzɨ́mbatɨɔwɔ́. 5 Fɛsʉ káwána kɨ́sɨká afěfé wowówo, átʉkʉ́ bhombi-mbá bhásɨ́ Bhayuda ɨ́mba bhásímebe Azapana. 6 Mombi a'zɨanɨ́ námásɨ́ yóyi na a'pɛtɛgɛnɨ́ námásɨ́ kísiké dhipóbho-ndɨ̂. Képosa Ngámá asisie ikòsi kɛ́-gʉlʉ́ yé u'bhélé-mbʉ u'bhomu, kága átʉkʉ́ kónúboli-ndɛ́ mámʉsá na kénúpembikesi-ndɛ́ mbúndú. 7 Képosa Azapana étwésí-ásɨ́ndɛ́ bhɔ́ kékí kɨ́sɨká ʉ'fɨdhá, píi dhɨ̌sʉ bhɔ́ kékí bhombi-mbálawɔɔ́. 8 Hɨ̌nzɨ abhɔ̂, mombi-yɔ anganɨa mápanʉ-mbâ, ómóngóní-ásɨ́ mombi, píi omóngóníí Azapana ɨ́yɔ anákʉ́wa-ndɛ́ Mʉlʉ́ma-mbwasɨ-mbʉkwálɔwɔ́.9 Kɛ́-gʉlʉ́ yɛ́ dhɨkʉ́nda dhɛ́-nákamá, násɨ́-pɔ́ na nzala bhɔ́ nànʉ́kalɨ́ágɨ̌. Képosa Azapana hɨ̌yɔ onúponíí bhónú mombólóbhi kákʉndàna bhónú ké-bhónú. 10 Na anɨ́ hɨ̌nzɨ ná noyí kâza kó bhonómósú bhobhomu-mbá bha kɨ́sɨká dhʉdhʉ́ yá Makedoniya ibhomu. Na ka nebhónú kánákʉ́wa dhɨkpɛ́kpɛ́kpɛ́ bhasʉnzaka, bhɔ́ zěni kágapɔ́ yágbalala. 11 Zěni ʉkpɛ́ kéke kísiké udesene, kéni ne dhikùlu-ndɨ́zɔwɔ́ mopóbho-mbókonú mombólóbhi, na ʉza kʉtɨ́ká nɔ mɔbhɔ́kɔ-mbókonú mombólóbhi, kága átʉkʉ́ kónúboli-ndɛ́mʉ. 12 Dhɨtɛ́dhɨ́ bhɔ́ nékí nɛ dhɨsɨnga-ndɨ́bɨbɔwɔ́ mámʉsá yó bhombi-mbá bha kúnzi, na bhɔ́ nákení nɛ dhɨkʉ́nga kúko mombi.
Udiko-mbʉ́ka Ngámá no-dono wó bhombi kɨ́sɨká bhambʉkʉ
13 Bhasʉnzaka, kásɨ́kʉ́nda bhɔ́ néki bhaínga kɛ́-gʉlʉ́ yó bhombi-mbá bha matá bhókwô, dhɨtɛ́dhɨ́ bhɔ́ nákení kísikó kokó átʉkʉ́ bhombi-mbéné ɨ́mba bhásɨ́ nɛ sɨbhʉ́ndá. 14 Képosa bhíi kakábhɨ́sɨa bhɔ́, Yezu ókú-ndɛ́mʉ na ódoni-ndɛ́ ká mbʉkʉ, a kágǎ anɨ́ bhɔ́, bhombi-mbá bhabhɔ́lɔ̀ngɔ kísiké Yezu, Azapana abhúdikiso-bhá kágǎ palěmotí nayɨ́. 15 Képosa, ké dhipóbho-ndɨ́ka Ngámá, ka nebhónú kábala bhɔ̂, bhósú-mba ka bhawɨ̌sɨ, na-mbá kakěka pɔ́wɔ kɛ́ dhɨsá-ndɨ Ngámá adikǒka pɔ́wɔ, kásɨ̌kábhʉ́gbalàla bhombi-mbá bhabhɔ́lɔ̀ngɔ. 16 Képosa Ngámá mombólóbhi asiěká kákana ká tʉ́bǎ, ne pembíkésé wo dhiyǒ-ndɨkpɔ́wɔ, no dhiyǒ-ndɨka malaɨka wenénuwó, no dhiyǒ dhɛ́ dhɨpakálá-ndɨka Azapana. No bhombi-mbá bhésíi-ndɛ́ bhɔ́ ɨbhɔ́ ne Kílísitó wabhɨ́sɨ̀a, bhadonǒka kpanga ká bhambʉkʉ. 17 Kúmbisoyí, bhósú-mba kabhawɨ̌sɨ, ɨ́mba kakěka pɔ́wɔ kɛ́ dhɨsá-ndyɛyɛ, kawɛwɛ̌ka palěmotí nɔbhɔ́ kɨ́sɨká andìndi wa tʉ́bǎ, kɛ́ndɛ-dʉkana na Ngámá kɨ́sɨkɛ́ nɛpɛ̀nɛ. Na hɨ̌nzɨ kakěkapɔ́ palěmotí na Ngámá masá mobhòmu. 18 Wánéni topí dhɨkpɛ́kpɛ́kpɛ́ dhá mʉ̌ma bhónú ké-bhónú ké u'bhélé-mbʉ.