Dhɨsá-ndɨ Ngámá adikǒka pɔ́wɔ
5
Píi bhasʉnzaka, kɛ́-gʉlʉ́ yɛ́ nɛ́dhɛngɛ, bhêkâ ɨzɛzɛ-nzɨ́ u'bhélé-mbʉ azɨkana pɔ́wɔ, násɨ́-pɔ́ na nzala bhɔ́ nànʉ́kalɨ́ágɨ̌. 2 Képosa bhónú mombólóbhi nábe yánza bhuí bhɔ́, dhɨsá-ndɨka Ngámá akódiko kága átʉkʉ́ mombi we kibhe kísikó tuku. 3 Kɛ́ nɛdhɛ̀ngɛ-yɔ bhombi bhabalapɔ́ bhɔ̂: "Kabhédesene, kabhóbhólìkòno", ɨwâ hɨ̌nzɨ ʉ̌kɛ̀gɛ apɔ́ kódiko ɨgʉlʉ́-nzɨkɔ́wɔ gagala fɛsʉ něbikene, átʉkʉ́ ʉlɔnɔ wɛ́ dhɨbhɔ́kɔ̀tɔ o'tókóní u'kólí wa dhɨmɨ, na bhásɨ̌kambɔ̀lɔgɔ̌ atápɔ́ dhɛ̌kɛ. 4 Píi bhónú, bhasʉnzaka, násɨ́ kísiké milili , bhɔ́ dhɨsá-ndyɛyɛ ánʉ́tákánɨ́ bhásàna, átʉkʉ́ mombi we kibhe. 5 Képosa bhónú bhobhomu ná bheísí bhá ʉ'kpɨ́yǎ, ne bheísí bhá namánɨ́. Bhósú kásɨ́ bheísí bhó tuku, tɛndɛ́ bhé milili . 6 Hɨ̌nzɨ apɔ́ bhɔ́, kalɔ́lɔnɨ́ tɔlɔ́ átʉkʉ́ bhombi-mbéné, píi kékí mise mbúndú, na kakení na nalɨ́lɔ yé kímbó. 7 Képosa bhombi-mbá bha kɔ́ tɔlɔ́ bhakɔ́lɔ́lɔ tɔlɔ́ tuku, na-mbá bhaná makáná bhɔ́ dayó bhake bhɔ́ dayó tuku. 8 Píi bhósú-mba ka bhá namánɨ́ kakení na nalɨ́lɔ yé kímbó, kólólí ʉbhɨ́sɨa nɛ dhɨkʉ́nda átʉkʉ́ kutúlú kwé iwǒtí kɛ́ dhɨkpɔ́, nɛ sɨbhʉ́ndá ɨ́ndɨ́mbɔlɔwɔ́ átʉkʉ́ dhitíko. 9 Képosa Azapana étúbǐsú-ásɨ́ndɛ́ bhɔ́ késíí kɨ́sɨkɛ́ dhɨngbʉka-ndyasɨ, píi dhɨ̌sʉ bhɔ́ kávɨ̌ ʉmbɔlɔ kʉ́ka Ngámá kosú Yezu Kílísitó. 10 Ɨyɨ́ hɨ̌yɔ okú kɛ́-gʉlʉ́-nzikosú, dhɨtɛ́dhɨ́ bhɔ́ bhíi kabhawɨ̌sɨ bhêkâ bhɔ́ kabhɔ́lɔ̀ngɔ, kékí palěmotí nayɨ́. 11 Hɨ̌nzɨ abhɔ̂, wánéni dhɨkpɛ́kpɛ́kpɛ́ dhá mʉ̌ma bhónú ké-bhónú, ne uvekesene kʉmɨlɨ́ma mombi no mombi na dǎsɨ, ngbangá kága átʉkʉ́ ná noyí kâza.Matʉ́wa na salǎmʉ wepipikesowó
12 Píi, bhasʉnzaka, ka nebhónú kákʉnga bhɔ̂, bhúpembíéni bhombi-mbá bhakáza dhikùlu sɔ́bhɨ́-nzikonú, ɨ́mba bha nebhónú bhámàlɨ̀a kísiké dhine-ndɨ́ka Ngámá, ɨ́mba bha nebhónú kátʉwa. 13 Kéni nɔbhɔ́ nɛ dhɨzɨɔ bhuí kɨ́sɨkɛ́ dhɨkʉ́nda kɛ́-gʉlʉ́ yá kʉtɨ́ká kʉkɔ́wɔ. Bhónú bhobhomu kéni kísiké udesene. 14 Bhasʉnzaka, ka nebhónú kákʉnga bhɔ̂, bhútúéni bhombi bhá mányɛ́nyɛ́, bhúvekéséni mʉ̌ma ɨ́mba bhásɨ́ na angu, bhésíkéni-mba bha bhɔ́dɔ̌gɔ, kéni na mʉ̌manda kó bhombi bhobhomu. 15 Indéni yánza, atápɔ́ mombi motí a'sisiení mombi uwówo kó uwówo, píi bhelíéni ʉnzá masá mobhòmu bhónú ké bhónu na kó bhombi bhobhomu. 16 Kéni nɛ-gyagyǎ masá mobhòmu. 17 Nábiení kákʉnga. 18 U'sisíéni Azapana dhɨ́bɨba kó mopóbho mobhòmu, képosa ɨ́nzyɛyɛ a dhɨkʉ́nda-ndɨ́ka Azapana ké-bhónú kísiké Kílísitó Yezu. 19 Nátɨanɨ́ kʉtɨ́ká kwá Mʉlʉ́ma-mbʉ́kwálɔwɔ́. 20 Nádɛkɨ̀ɛnɨ́ u'bhelé wá bhanabǐ. 21 Píi seéséni mopóbho mobhòmu, bhólóléni-ndɨ́ a dhánza. 22 Biénéni no uwówo wa ʉ'sʉ̀mbʉ u'bhomu. 23 Azapana-yɔ a ne udesene, ɨyɨ́ mombólóbhi ánʉ́lawɨ́, kísikó ubhomu-mbúkonú u'bhomu-anɨ́: mʉlʉ́ma, na ʉtámbànaga, na nʉtʉ. Dhɨtɛ́dhɨ́ bhɔ́ ékí wóbhólìkòno wánza fɛsʉ nɛ ɨdhá kɛ́ nɛdhɛ̀ngɛ-yɔ Ngámá kosú Yezu Kílísitó adiko-pɔ́wɔ. 24 Ɨyɔ a nebhónú kɛ́wɛsɨ̀ɛ a mombi wakákalɔwɔ, ɨyɨ́ hɨkágǎ-yɔ azǎ. 25 Bhasʉnzaka, kʉ́ngéni-kâ kɛ́-gʉlʉ́-nzikosú. 26 Bhúéni bhonómósú bhobhomu salǎmʉ, no udhúngono wɛ́pɛpɛ́ wɛ́nákamá. 27 Nònútínikosiní nɛ́paká ké dhine-ndɨ́ka Ngámá bhɔ̂, u'sómóni bhalʉa-nzɔ kó bhonómósú bhobhomu. 28 Ngasa-nzɨ́ka Ngámá kosú Yezu Kílísitó ékí palěmotí nebhónú.