Yɔna 4

Azapana ó'túuní Yɔna kɛ́ dhɨngbʉka-ndyasɨ

(Memb 103.8-14, 145.8-9, Yel 20.7-9, 14-18, Luk 15.28)

Ɨtandá-nzyɛyɛ eníkéní yóyi badi ké mise-mbákɔ Yɔna, óngbukiní. 2 Ó'kúnginí Akulugu, óboliní bhɔ̂: "Nǒkukúnginí Akulugu, ásɨ́ dhipóbho-ndɨ́ nèbhíga balá hɨ̌ndɨbhâ kú nèbhíga-kú ká dhʉdhʉ́-nzɨkámɨa? Hɨ̌nzɨ nòzigapɔ́ gagala bhɔ́ nàtɨ́yɨ́-nzɨkámɨ ká Talasisi. Képosa nèbhígǎbe tàla bhɔ́ ɨwa Azapana wa ngasa, na wokokó, ɨwa na mʉ̌manda na ʉnzá unéni, wasíbhúogo ne bie uwówo-mbʉ webhí bhɔ̂ abhʉ́zɨ̌ɨ́ bhombi. 3 Píi gěgenzí Akulugu, nǒkukúnginí bhɔ́, vǎ mʉlʉ́ma-mbʉ́kámɨ, képosa a yánzapɔ́ bhɔ́ nòkú kápʉ́ta bhɔ́ nèkí."

4 Akulugu é'sisiiní bhɔ̂: "Wǒziní yánza kángbʉka?" 5 Yɔna ódoniní kɨ́sɨkɔ́ gbɔ̌tɔ́, éndiní dhike nambɛ̌tʉ kú mánɨ́ adiko-kú. É'pikiní angbalɨ kasɨ́, édhikiní kísikó kùlùlu kwásɨ, épétiiní bhʉ́ndaga bhɔ́ ɛ́nɨ́ ɨ́nzɨ azɨkana kɨ́sɨkɔ́ gbɔ̌tɔ́. 6 Akulugu Azapana ótoisiní tɨsɛsɛ, ómoisiní ɨgʉlʉ́-nzɨkɔ Yɔna kámʉwá kùlùlu ɨgʉlʉ́ yá mʉlʉ́-mbwasɨ no u'koso kísikó kokó-nzyasɨ. Yɔna ebhí nɛ dhɨgyagyǎ dhinéni kɛ́-gʉlʉ́ yɛ́ tɨsɛsɛ-tyɛyɛ. 7 Píi ópumóyi kɛ́ dhɨsá kásʉka, Azapana ó'tíkiní u'dhízi kálá tɨsɛsɛ-tyɛyɛ, tɨsɛsɛ-tyɛyɛ ókúni. 8 Angǎ mánɨ́ odoní, Azapana ótísiiní àkùku wɛkpɛ́ wa nambɛ̌tʉ kú mánɨ́ adiko-kú. Mánɨ́ épétiiní u'sumbo Yɔna kɨ́sɨká mʉlʉ́ bhíbi bhɔ́ átɨ́nɨ́ mʉlʉ́ma. Yɔna ókúnginí kukwó, óboliní bhɔ̂: "A yánza kʉ́kámɨ bhɔ́ nòkú kápʉ́ta bhɔ́ nèkí." 9 Azapana ó'boliní Yɔna bhɔ̂: "Wǒziní yánza kángbʉka ké dhipóbho dhɛ́ tɨsɛsɛ-tɨ́bhâ?" Yɔna ésisiiní bhɔ̂: "Oyí, nòzǐ yánza kángbʉka baba kákʉnga kukwó." 10 Akulugu ó'boliní bhɔ̂: "Wěniní kokó kɛ́ tɨsɛsɛ-tɨ́ wozǔ-ásɨ́pɔ́ kʉtɨ́ká, na wodhí-ásɨ́dɔmʉ́, ɨ́tɨ osósí túku no-kwó túku-wéné. 11 Hǐí kɛ̂-mɨ, nàsɨ́nɛ kokó ké Nináwa, gbɔ̌tɔ́ wenénuwó, ɨ́yɔ bhombi bha kɨ́sɛnɨ́ bhápʉ́ta ɛ́lɛfʉ mɨa no modhíngo mábhalɨ́, ɨ́mba bhásíbe kʉbhɔ́kɔ kʉ́kɔ́wɔ kwɛ́pɛpɛ́ na kwɛ́ kʉmɛsʉ́, no nzumbú inéni yá bhanyama?