Ukwóno, nɔ'tɔ̀kɔ magali kɛ́-gʉlʉ́ nzike Yezu Kílísitó
2
Hɨ̌nzɨ ɨwʉ nâmɨ, vǎ dhɨkpɛ́kpɛ́kpɛ́ kɨ́sɨká ngasa-nzɨ́ a kísiké Kílísitó Yezu. 2 No mopóbho-mbá wokí kʉ́kámɨ mámʉsá yó bhombi bhepembíkésé bhenéni, mopóbho-mbɛyɛ bhʉ́wá bhombi-mbá bhatɛ́lɛlɛ kébhúbǐsie mʉ̌ma, ɨ́mba bhangbɨndɨa kápanɨa bhombi-mbéné.3 Vekésé mʉ̌ma kɨ́sɨká magali palěmotí nɛmɨ, átʉkʉ́ abhǎká wɛpɛpɛ́ ke Kílísitó Yezu. 4 Mombi-yɔ akáza kʉtɨ́ká kwá abhǎká, bhíi abhɔ́ ámʉwʉ́ dhɨgyagyǎ mombi-yɔ o'kológǐ kéke abhǎká, ásíke bhɔ́ anázɛ̌ngɛmɛnɨɛ mopóbho má masá ma'kpa-mbá kàkege nɔmɔ́. 5 A kága átʉkʉ́ mombi-yɔ akáza polí-nzidhóngosonowó, bhásɨ́-u'lólìso gbǒndóló bhíi ódhóngósóní-ásɨ́ kɨ́sɨká apíyi. 6 Mombi-yɔ eděmí ndɛsɨ́ nɔ'tɔ̀kɔ magali wa kʉtɨ́ká, ɨyɨ́ kpanga hɨ̌yɔ apɛ́tɨɛ ʉlá bumó yɛ́ ndɛsɨ́. 7 Tóngúó yánza kɛ́ dhipóbho-ndɨ́ nà nodhí kébhéle, képosa Ngámá akʉwábhá mʉlʉ́ wé dhibhólú kó mopóbho mobhomu.
8 Ʉ'támbáná Yezu Kílísitó, ɨ́yɔ ózuzuki-ndɛ́ kɨ́sɨká kʉlɨ́ndá, wɛ dhɨbhɔ́kɔtɔ ndɨ́ka Daudi, ngbangá átʉkʉ́ Dhipóbho Dhɛ́pɛpɛ́ akébhéle, ɨ́ndɨ nà nodhí kábalɨaga. 9 Kɛ́-gʉlʉ́ yé Dhipóbho Dhɛ́pɛpɛ́-ndɨ hɨ̌nzɨ nàpɔ́ kɔ́'tɔ̀kɔ magali, baba kánɨkandana na malamba mé bhiwǒtí átʉkʉ́ mombi wa málɛ́ngɛ́. Píi Dhipóbho ndɨ́ka Azapana ásɨ́kandɨkaná. 10 Hɨ̌nzɨ nàpɔ́ kévekese mʉ̌ma kó mopóbho mobhomu kɛ́-gʉlʉ́ yó bhombi-mbá Azapana óbhúsòguu-ndɛ́mʉ, dhɨtɛ́dhɨ́ bhɔ́ nɛbhɔ́ tàla bhávɨ̌ ʉmbɔ̀lɔ ɨ́mbʉ a kísiké Kílísitó Yezu palěmotí nɛ dhɨ́bɨba dhɛ́ bhɨzɛzɛ. 11 Dhipóbho-ndɨ́ a dháyǎngu bhɔ̂:
«Bhíi kokú palěmotí nayɨ́, kakebhá kágǎ bha'wɨ̌sɨ palěmotí nayɨ́.
12 Bhíi kévekesiní mʉ̌ma, kalábhá dhikúmú palěmotí nayɨ́.
Bhíi kómóngoniiní, nɛ-yɨ́ tàla atwánganɨabhá kâ bhósú.
13 Bhíi bhósú kásɨ́ bhombi-mbákákalɔwɔ́, ɨyɨ́ masá mobhomu a mombi wakákalɔwɔ́a,
képosa ásɨ́ngbɨndɨa kánganɨana ɨyɨ́ mombólóbhi.»
Mombi wa kʉtɨ́ká wɛpɛpɛ́ ɨ́yɔ ásɨ́ no soni
14 Bhútómbósíó bhombi mopóbho-mbâ, wanábhéle no'sisó mámʉsá nzɨka Azapana bhɔ̂ bhadhóngosononí kɛ́-gʉlʉ́ yó mopóbho. Ɨ́nzyɛyɛ ásɨ́ na u'tàni, a gbǎgbǎ kákábha ubhékìsege bhombi-mbá bha noyí kɔ̂kɔ. 15 Dhiké na angu kápanɨkana ɨwʉ mombólóbhi bhɔ́ wa wɛtɛ́lɛlɛ mámʉsá nzɨka Azapana, mombi wa kʉtɨ́ká-yɔ ásɨ́ no soni, wanápànɨaga Dhipóbho dhá yǎngu kɨ́sɨká dɨ̌ngba. 16 Wakɨtɛnɨ́ kísikó mopóbho-mbébhébhenegowó ímbo'dhóngosowó Azapana. Képosa ɨ́mba bhabháwána kɨ́sɛnɨ́, bhandɛbhá nɔmɔ́ na-dhɨ́kanɨa kísikó uwówo. 17 U'bhélé mbʉkɔ́wɔ ayadhabhá átʉkʉ́ pʉ́lá-nzívelowó. Kísiké igbangú-nzyɛyɛ a no bhombi átʉkʉ́ Hɨmɛnɛya ne Fileto, 18 ɨ́mba bhébii-tɛndɛ́ apɨ́ yá uyǎngu ébie. Bhabala bhɔ́ uzuzuko wá kʉlɨ́ndá ópúti-tɛ́ndá-pʉta, na bhakóguso ʉbhɨ́sɨa wó bhombi-mbéné. 19 Píi gbuma wɛkpɔ́wɔ ka Azapana a wǎmàla, ɨ́yɔ anzálá kasɨ́ apɔ́ webǐse, u'bhélé-mbʉ apɔ́ wakàlaga bhɔ̂: «Ngámá abhébe bhombi mbasɨ tàla,b» kâ bhɔ̂: «Ɨ́yɔ adhɛngɛ dhine ndɨ́ka Ngámá bhɔ́ a mombi kasɨ́, ébií káza uwówo.»
20 Kɨ́sɨká ndabhʉ-nzínénuwó ásɨ́ kɨ́sɛnɨ́ bhikímbó bhá mbalɨ́ gbǎgbǎ na bhé mekpéngbélé, píi a kâ ne bhikímbó-mbɨ bhobhongísí kɛ́ ɨngbángá na-mbɨ́ bhobhongísí ká tʉkʉ. Ímbyené a-mbɨ́mbatɨɔwɔ́, ímbyené ásɨ́-mbɨ́mbatɨɔwɔ́. 21 Hɨ̌nzɨ bhíi mombi ósukusoniní mombólóbhi kébiene no mopóbho mówówo-mbâ, akebhá kímbó-nzɨ́mbatɨɔwɔ́, ɨ́nzɨ́lawɔɔ́, na-nzɨ́ etélélí ká kʉtɨ́ká-kuko mombi wa ndabhʉ, kímbó-nzɨ bhobhongísí kɛ́-gʉlʉ́ yá kʉtɨ́ká kubhomu kwɛ́pɛpɛ́.
22 Ʉ'tɨ́yá afěfé wa kʉ́ganzá, bhɛlɨ́ɛ́gɛ̌ uyǎngu, ʉbhɨ́sɨ̀a, dhɨkʉ́nda, ne desene palěmotí no bhombi-mbá bhakɛ́mɛsɨ̀ɛgɛ Ngámá kɨ́sɨká mʉlʉ́ma-mbʉ́takatɔwɔ́. 23 Wabhɨ́sɨanɨ́ dhóngósó kó mopóbho mɔ́ kʉkpɔ́, na má kuvǎgbelu. Wǎbe tàla bhɔ́ abhɔ́kɔtɔ mamànʉ. 24 Kǎ ʉ'mɨya ka Ngámá ásɨ́tɛ́lɛlɛ bhɔ́ ɔ́mɔ́nɨ́, píi ékí dhɨ̌sʉ mombi wɛ dhɨzɨɔ kó bhombi bhobhomu, ɨ́yɔ angbɨndɨa kápànɨa bhombi, ɨ́yɔ a na mʉ̌ma-mbʉ́ngbɨndɨɔwɔ́ uwówo. 25 Atɛ́lɛlɛ bhɔ́ ábhʉ́panɨ́ɨ́ nɛ dhɨzɨɔ bhombi-mbá bhaza dhóngósó nayɨ́, kákábha bhɔ́ bhíi Azapana abhʉ́wa-kápɔ̌ ngasa kéngíkese matandá mbɔkɔ́wɔ bhɔ́ bhɛ́pɛmbɨ́ɨ́ uyǎngu. 26 Hɨ̌nzɨ bhapáta kágapɔ́ dhibhólú ndɨkɔ́wɔ dhɛ́pɛpɛ́ kódono kɨ́sɨkɛ́ dhɨlɛ́kʉ ndɨ́ka mádinganga, ɨ́ndɨ ébhúveli-ndɛ́ kɨ́sɛnɨ́ káza dhɨkʉ́nda ndyasɨ.