Salǎmʉ
1
Bhalʉwa-nzɔ a-yakámɨ kɔ Pɔlɔ, ʉ'mɨya ka Azapana na tɨ́kátɨ́ká ke Yezu Kílísitó. Azapana enibǐsí ká kʉtɨ́ká kwó bhombi-mbá óbhúsòguu-ndɛ́mʉ bhɔ́ nɔ̀bhʉ́kɔ́kɨ́ ká'bhɨ́sɨa ɨyɨ́, na kébhúpembikese uyǎngu-mbʉ a'tɨ́kɨa mombi ká'kpakpana Azapana, 2 bhɔ́ bhékí kɨ́sɨkɛ́ sɨbhʉ́ndá dhó ubhomu wɛ́ bhɨzɛzɛ. Azapana-yɔ ásɨ́ndɛ́-bhélège bhɔngɔ hɨ̌yɔ étúbǐsii-ndɛ́ dhimbolí-ndɨ ʉbhanda ndɛ́lɨ kɛ́ bhɛnɛ́dhɛngɛ bhɛ́ bhɨzɛzɛ, 3 angǎ odholí kɛ́ nédhengeyí, hɨ̌nzɨ oponíkósí-pɔ́ Dhipóbho ndyasɨ mbúndú kɨ́sɨká kʉtɨ́ká-kʉ ónuwú-ndɛ́ ɨmɨ ɨ́kʉ́balɨagɔwɔ́ Dhipóbho-ndyɛyɛ, ngbangá átʉkʉ́ Azapana, Ambosó kosú otíkíí. 4 Nàkákʉ̀kalɨaga-wʉ Tito, námɨ wayǎngu kɨ́sɨká ʉbhɨ́sɨa u'motí-mbʉ ka kɨ́sɛnɨ́ bhódobukono. Ngasa ne-desene kákana kʉ́ka Yabǎ Azapana, ne Kílísitó Yezu Ambosó kosú ékí palěmotí nanáwʉ.Bhapʉta bhá kanisa
5 Nèkubií ká dhʉdhʉ́ yé Kelete dhɨtɛ́dhɨ́ bhɔ́ wǒbhongísí mopóbho-mbéné ɨ́mba etígelí, ne-bǐse bhapʉta bhá kanisa kɨ́sɨkɔ́ bhɔgbɔ̌tɔ́ motí ké motí, ngbangá átʉkʉ́ nòkutíkíí. 6 Atɛ́lɛlɛ bhɔ́ ʉ'pʉta wa kanisa ékí mombi-yɔ ásɨ́ wɛdhɛ̀ngɨkɛnɛgɛ kó uwówo, ʉ'mɛtʉ-yɔ awakákala kʉ́ka ʉ'kálásɨ gbǎgbǎa, ɨ́yɔ bhanásɨ́ bha na Azapana wabhɨ́sɨ̀a, na bhásɨ́-bhʉ́dhɛ̀ngɛgɛ ká matandá mɔ́ kʉkpɔ́, tɛndɛ́ átʉkʉ́ bhombi bhá mányɛ́nyɛ́. 7 Atɛ́lɛlɛ bhɔ́ mombi-yɔ amalɨa kanisa akení wɛdhɛ̀ngɨkɛnɛgɛ kó uwówo, képosa a ngbangá átʉkʉ́ abhóloló wa ndabhʉ nzɨ́ka Azapana, akení mombi-yɔ ásɨ́kʉ́nda ʉbhɔ́kɨɔ bhombi-mbéné, akení mombi wangbʉ̀kanagɔwɔ́, akení na nalɨ́lɔ wa makáná, akení mombi wa málɛ́ngɛ́, akení mombi wa'kábhɔwɔ́ nekùmu ká-pɨ́ yówówo. 8 Píi ékí mombi-yɔ adhìkisege bhebika, mombi-yɔ akʉ́ndàga ʉnzá, mombi-yɔ a na-támbànaga wɛ́pɛpɛ́, mombi wa yǎngu, mombi walawɔɔ́ ka Azapana, ɨ́yɔ a nɛ dhɨsɨnga ndyasɨ dhóbhólìkoso. 9 Ékí wakpakpana ké dhipóbho-ndɨ́ atɛ́lɛlɛ kábhɨ́sɨ̀a, ɨ́ndɨ a ngbangá na mápanʉ-mbá opótí, dhɨtɛ́dhɨ́ bhɔ́ ángbɨndɨ́ɨ́ kátʉ́wa bhombi na mápanʉ má yǎngu, no ungyoniso bhombi-mbá bhakábha kódhongòso.
Dhɨsɨnga dhá bhamalimo bhɔ́ bhɔngɔ
10 Képosa a no bhombi bhenéni bhá mányɛ́nyɛ́, bhebhélékú bhó mopóbho má'tʉ́tʉ, bhamalimo bhɔ́ bhɔngɔ, bapɔ́ bhuí kɨ́sɨká Bhayuda bhombi bhé dhimóyó. 11 Atɛ́lɛlɛ bhɔ́ wabhʉ́dhakɨ́ kʉnɔkʉ, képosa bha bhombi-mbá bhakéngbéngemese bhombi bhobhomu kɨ́sɨká bhandabhʉ inéni, bhanábhʉ́panɨa mopóbho-mbá ásɨ́tɛ́lɛlɛ́, kákábha mekpéngbélé ká-pɨ́ yówówo. 12 Mombi motí kɔ́wɔ, nabǐ kɔ́wɔ mombólóbhi óboli-ndɛ́ bhɔ̂:
«Bhekelete bha bhombi bhɔ́ bhɔngɔ masá mobhomu,
bhanyama bhɛ́ dhɨngámá,
bhodulukú, na bhásɨ́kʉ́nda-za kʉtɨ́ká.b»
13 Pembíkésé-nzɔ a wayǎngu. Hɨ̌nzɨ apɔ́ bhɔ̂ bhʉ́mɛnɨ́ɛ́ yɛ́kpɛ, dhɨtɛ́dhɨ́ bhɔ́ bhékí bhombi-mbá bha na ʉbhɨ́sɨa wáyǎngu. 14 Bhabǐsení motói kɔ́kɔ̀nɨɔgɔ kugyěgyení kwá'tʉ́tʉ kwá Bhayuda, tɛndɛ́ ʉbhɛlɨɛ bhɨtá bhó bhombi-mbá bhéngíkeni-tɛ́ndɛ́ kébie uyǎngu. 15 Bhikímbó bhibhomu a bhátàkata kó bhombi-mbá bha na kʉmɨlɨ́ma kwátàkata, píi kó bhombi bhá ʉ'sʉgʉ̌ mámʉsá nzɨka Azapana, na-mbá bhásɨ́-ʉ'bhɨ́sɨ̀a Azapana, ásɨ́ ne kímbó-nzɨ a yátàkata. Képosa mʉlʉ́ wé dhibhólú ndɨkɔ́wɔ, na-támbànaga wá mʉ̌ma mbʉ́kɔ́wɔ tàla a na ʉ'sʉgʉ̌ mámʉsá nzɨka Azapana. 16 Bhabala bhɔ́ bhamébe Azapana tàla, píi ká matandá mbɔkɔ́wɔ bha nayɨ́ kámangànɨa. Bha bhombi bhówówo ké mise mbáka Azapana, no bhombi bhá mányɛ́nyɛ́, ɨ́mba káza kʉtɨ́ká kubhomu kwɛ́pɛpɛ́ bhásɨ́ngbɨndɨá.