پِتْرُس و یوهَنّا سرۆکانی دیوانئے دێما
4
1 پِتْرُس و یوهَنّا اَنگت گۆن مردمان هبر کنگا اتنت که دینی پێشوا، مزنێن پرستشگاهئے نِگهپانێن سپاهیگانی مستر و سَدوکی* اۆدا آتک و رَستنت.
2 آ، چه اے هبرا سکّ نارزا اتنت که کاسِدان مردم درس و سَبکَ دات و جارِشَ جت که:
«چه ایسّائے نام و راها مُردگ پدا زندگَ بنت.»
3 پِتْرُس و یوهَنّااِش گپتنت، بێوهد و بێگاه اَت، پمێشکا تان اے دگه رۆچا بندیگِش کرتنت.
4 بله بازێنے که آیانی کُلئو و پئیگامِش اِشکتگ‌اَت باورمند بوت و چه آیان کِساس پنچ هزار مردێن اتنت.
5 اے دگه رۆچا، یَهودیانی مستر، کماش و شَریَتئے زانۆگر* اورْشَلیما مُچّ بوتنت.
6 گۆن آیان مسترێن دینی پێشوا هَنّا و آییئے همراهیا کیاپا، یوهَنّا، اِسْکَنْدَر و مسترێن دینی پێشوائے سجّهێن کُٹُم و هاندان گۆن اتنت.
7 آیان پِتْرُس و یوهَنّا اۆشتارێنت و جُست گپتنت:
«شما گۆن کجام زۆر و واکا یا گۆن کئیی ناما اے کار کرتگ؟»
8 گڑا پِتْرُس چه هُدائے پاکێن روها سررێچ بوت و گوَشتی:
«او کئومئے سرۆک و کماشان!
9 اگن مرۆچی اے سئوبا چه ما جُست و پُرس بئیگا اِنت که ما په لَنگ و مُنڈێن مردێا نێکی کرتگ و جُستَ کنێت که آ چۆن دْراه بوتگ،
10 گڑا شما سجّهێن و اِسراییلئے درُستیگێن کئوم بزانێت، اے مرد که دْراه و تئیار شمئے دێما اۆشتاتگ، چه ایسّا مَسیه ناسِریئے نامئے برکتا دْراه بوتگ.
شما ایسّا سَلیب کَشّت و کُشت، بله هُدایا چه مُردگانی نیاما زندگ کرت.
11 ایسّا
هما سِنگ اِنت که شما، بانبَندێن اُستایان،* پسند نکرت و چَگل دات،
بله آ سِنگ، بُنهِشت* بوت.*
12 چه آییا اَبێد* دگه رَکّێنۆکے نێست، چیا که آسمانئے چێرا، ایسّائے ناما اَبێد، مردمان دگه نامے دئیگ نبوتگ که گۆن آییا ما رَکّت بکنێن.»
13 آیان که پِتْرُس و یوهَنّائے دِلێری و بهادُرّی دیست و زانتِش که آ ناواننده و آمیێن مردم اَنت، هئیران بوتنت.
رندا پَجّاهِش آورتنت، که آ ایسّائے همراه بوتگ‌اَنت.
14 بله په اے سئوبا که آ دْراه بوتگێن مرد آیانی کِرّا اۆشتاتگ‌اَت، چیزے گوَشتِش نکرت.
15 پمێشکا آاِش چه هَکدیوانا* ڈنّ رئوگئے هُکم دات و وت په شئور و سَلاها نِشتنت.
16 وت‌مان‌وتا گوَشتِش:
«گۆن اے مردمان چے بکنێن؟ چیا که اورْشَلیمئے سجّهێن جهمنندَ زاننت اِشانی دستا یک انچێن مۆجزهے زاهر بوتگ که نمَنّگَ نبیت.
17 بله چُش هم مبیت که اے هبر مردمانی نیاما گێشتر شِنگ و تالان ببیت.
باید اِنت آیان بتُرسێنێن که دگه برے په ایسّائے ناما گۆن هچکَسا هبر مکننت.»
18 پِتْرُس و یوهَنّااِش پدا لۆٹت و هُکم داتنت که هچبر ایسّائے ناما چیزے مگوَشنت و درس و سَبک مدئینت.
19 آیان پَسّئو دات:
«وت شئور بکنێت، شمئے هبرئے زورگ شرتر اِنت یا هُدائے؟
20 بله ما چه وتی دیستگێن و اِشکتگێنانی پَدّر و درشان کنگا وتا داشتَ نکنێن.»
21 گڑا چه گێشترێن تُرسێنگ و پادتراپ.
* دئیگا رند، آاِش یله داتنت. په آیانی سِزا دئیگا شَرّێن راهے ندیستِش، چیا که گۆن اے اَجَبَّتێن کارئے گِندگا سجّهێن مردمان هُدا سَتا کرت و ساڑات.*
22 آ مرد که گۆن اے مۆجزها دْراه بوتگ‌اَت، اُمری چِل سالا گێش اَت.
باورمندانی دْوا
23 آزات بئیگا رَند، پِتْرُس و یوهَنّا وتی همراهانی کِرّا شتنت و آاِش چه مزنێن دینی پێشوا و کئومئے کماشانی گوَشتگێن هبران سهیگ کرتنت.
24 آیان که اِشکت، یکدل و همتئوار هُدائے بارگاها دْوا کرت و گوَشتِش:
«او زۆراکێن هُداوند، آسمان و زمین و دریائے اڈّ کنۆک و هر چیزے که آیانی تها اِنت!
25 تئو وت گۆن پاکێن روهئے اِلهاما چه مئے بُنپیرُک، وتی هِزمتکارێن داوودئے زبانا گوَشت:
‹آ دگه کئوم په چے شۆرشَ کننت و راج چیا مُپت و ناهودگێن پندلَ سازنت؟
26 جهانئے بادشاه تئیارَ بنت و هاکم یکجاه مُچّ، هُداوند و آییئے مَسیهئے هِلاپا اۆشتنت.›*
27 «په راستی، همے شهرا هیرودیس، پُنتیوس پیلاتوس، آ دگه درکئومێن مردم و بنی اِسراییلئے سجّهێن کئوم و کبیله همدست بوتنت و تئیی پاکێن هِزمتکار ایسّائے هلاپا پاد آتکنت، هما ایسّا که تئو گۆن رۆگن پِر مُشگا په بادشاهیا گچێن کرتگ‌اَت.
28 آیان گۆن وتی اے کارا، تئیی واک و واهگ که تئو چه پێشا گیشّێنتگ‌اَت، پوره و سرجم کرت.
29 او هُداوند!
نون اِشانی پادتراپانی نێمگا بچار و وتی هِزمتکاران کُمک بکن تانکه تئیی هبران په مزنێن بهادُرّی و نتُرسی درشان بکننت.
30 وتی پاکێن هِزمتکار ایسّائے ناما، په دْرهبکشی و مۆجزه و اَجَبَّتێن نشانیانی پَدّر کنگا، وتی دستا شهار دئے.»
31 چه آیانی دْوایا رند، آ جاگه که اۆدا مُچّ اتنت لَرزت، سجّهێن چه پاکێن روها سررێچ بوتنت و هُدائے هبرِش په دِلێری درشان کرت.
باورمندانی شریکداری
32 سجّهێن باورمند یکدل و یکجان اتنت، هچکَسا وتی مال و هستی تهنا وتیگَ نزانت و سجّهێن چیزان شریکدار اتنت.
33 کاسِدان گۆن مزنێن واک و تاگتے په هُداوندێن ایسّائے جاه جنَگا گواهیَ دات و گۆن آ سجّهێنان هُدائے مزنێن رهمت گۆن اَت.
34 چه آیان هچکَس مُهتاج نه‌اَت، چیا که هرکَسا لۆگ یا ڈگارے هست‌اَت بهاییَ کرت و
35 زرّی کاسِدانی دێما اێرَ کرتنت.
آیان اے زرّ په سجّهێنان، هرکَسئے گَرَز و زلورتانی سرا بهرَ کرتنت.
36-37 ایسُّپ نامێن مردێا هم ڈگارے هست‌اَت، بهایی کرت، زَرّی آورت و کاسِدانا داتنت.
آ کِبْرِسیے اَت و چه لاویانی کبیلها اَت.
کاسِدان آییئے نام بارنابا کرتگ‌اَت، بزان «دِلبڈّیئے* چُکّ».