دِلسِتکێن هئیرات
6
1 «هُژّار بێت!
وتی نێکێن کاران په مردمانی پێش دارگا مکنێت، چیا که اے ڈئولا شمارا چه آسمانی پتئے نێمگا هچ مُزّے نرسیت.
2 وهدے چیزے هئیراتَ کنئے، گڑا جار مجن و ڈَنڈۆر مکن.
دورو و دوپۆستێن مردم، کنیسه و کوچه و دَمْکانی تها اے ڈئولا کننت تانکه مردم آیان ستا بکننت و بساڑاینت.
شمارا راستێنَ گوَشان، مُزّے که آیان رَسگی اَت، رَستِش.
3 وهدے هئیراتے چه راستێن دستا دئیئے، چپّێن دست سهیگ مبیت،
4 تانکه تئیی داتگێن هئیرات سرپۆش و چێراَندری ببیت.
گڑا تئیی آسمانی پت، که چێرێنانَ گِندیت، تئیی مُزّا دنت.
دْوا
5 «وهدے دْوا کنێت، گڑا دورو و دوپۆستێن مردمانی ڈئولا مکنێت، چیا که آیان کنیسهانی تها و چارراهانی سرا اۆشتگ و دْوا کنگ دۆستَ بیت، تانکه مردم آیان بگندنت.
شمارا راستێنَ گوَشان، مُزّے که آیان رَسگی اَت، رَستِش.
6 بله هروهد دْوا کنئے، وتی لۆگا برئو، لۆگئے دپا ببند و چه وتی آسمانی پتا، که چه چمّان چێر و اَندێم اِنت، دْوا بلۆٹ، گڑا تئیی پت، که چێرێنانَ گِندیت، تئیی مُزّا دنت.
7 وهدے دْوا کنێت، گڑا درکئومێن مردمانی ڈئولا مُپت و ناهودگێن هبران لێس و پِلّێس* مکنێت، آ هئیالَ کننت که چه لێس و پِلّێسا آیانی دْوا گۆش دارگَ بیت.
8 آیانی پئیما مبێت، چیا که شمئے آسمانی پت چه لۆٹگا پێسر وتَ زانت که شمارا چے گَرَز اِنت.
9 «شما اے ڈئولا دْوا بلۆٹێت:
‹او مئے پت، که بُرزێن آسمانا ائے!
تئیی نام شرپدار بات.
10 تئیی بادشاهی بیایات.
تئیی واهگ و اِراده زمینئے سرا هم هما ڈئولا سرجم بات که آسمانا سرجمَ بیت.
11 مئے مرۆچیگێن رِزک و رۆزیگا مرۆچی مارا بدئے.
12 مئے گناه و رَدیان ببَکش، انچُش که ما وتی سجّهێن دئینکار بَکشتگ‌اَنت.
13 مارا آزمایش و چَکّاسا دئور مدئے و چه شئیتانا* برَکّێن.›*
14 «چیا که اگن شما مردمانی گناه و مئیاران ببَکشێت و سر بگوَزێت، گڑا شمئے آسمانی پت شمئے گناه و مئیاران هم بَکشیت و سرَ گوَزیت،
15 بله اگن شما مردمانی گناه و مئیاران مبکشێت و سر مگوَزێت، گڑا شمئے آسمانی پت هم شمئے گناه و مئیاران نبکشیت و سرَ نگوَزیت.
رۆچگ
16 «وهدے رۆچگَ بێت، دورو و دوپۆستێن مردمانی ڈئولا وتی دێما تابان و گمناک مکنێت.
آ وتی روا گیمُّرێننت و مونجا کننت تان مردم بزاننت رۆچگ اَنت.
شمارا راستێنَ گوَشان، مُزّے که آیان رَسگی اَت، رَستِش.
17 بله وهدے رۆچگَ بئے، گڑا وتی دێم و روا بشۆد و سرا چرپ کن،
18 تانکه مردم مزاننت تئو رۆچگ ائے، تهنا تئیی آسمانی پت که چێراَندێم اِنت، هما بزانت.
آ وهدی تئیی آسمانی پت که چێراَندریَ گندیت تئیی مُزّا دنت.
آیۆکێن جهانئے تۆشگ
19 «اے جهانا په وت مال و مَڈّی* مُچّ مکنێت، که اِدا آیان وَرۆک و رَمێزَ* وارت و زَنگَ گیپت و دُزِّشَ پُلنت و برنت.
20 په وت آسمانا گنج و هزانگ اَمبار بکنێت که اۆدا نه آیان وَرۆک و رَمێزَ وارت، نه زنگَ گیپت و نه دُزَّ پُلنت و برنت.
21 تئیی دل هما جاها رئوت که مال همۆدا اِنت.
جِسم و جانئے چِراگ
22 «چَمّ، جِسم و جانئے چِراگ اِنت.
اگن تئیی چمّ وشّ و دْراه اِنت، گڑا تئیی سجّهێن جِسم و جان رُژناگَ بیت.
23 بله اگن تئیی چمّ ناجۆڑ اِنت، گڑا تئیی سجّهێن جِسم و جان تهارَ بیت.
نون اگن تئیی جِسم و جانئے رُژن وت تهاریے ببیت، گڑا آ تهاری چۆنێن مزنێن تهاریے بیت.
آسودگێن زِند
24 «هچکَس په دو واجها گُلامی کرتَ نکنت، یا گۆن یکّێا دژمنیَ کنت و دومیگی دۆستَ بیت، یا گۆن ائولیگا وپادارَ بیت و چه آ دگرا بدیَ کئیت.
شما یَکوهد و یَکجاه هُدا و زَرّئے گُلامیا کرتَ نکنێت.
25 پمێشکا شمارا گوَشان که په وتی زِندا پرێشان و دِلتپرکه مبێت که:
‹چے بوَرێن و چے بنۆشێن؟› نه په وتی جِسم و جانا که:
‹چے بپۆشێن؟›.
زِند چه وراکا و جِسم و جان چه پۆشاکا گێشترَ نکرزیت؟
26 آسمانئے بالی مُرگان بچارێت، نه کِشنت و نه رُننت و نه اَمبارَ کننت، بله اَنگت شمئے آسمانی پت آیان وراک و رۆزیگَ دنت.
شمئے اَرزش و کیمّت چه آیان گێشتر نه‌اِنت؟
27 کئے گۆن پِگر و هئیالانی زۆرا وتی زِندئے رۆچان یک ساهتے هم گێش کرتَ کنت؟*
28 په پُچّ و پۆشاکا چیا پرێشان اێت؟ گیابانئے گُل و پُلّانی نێمگا دلگۆش کنێت، چۆن رُست و رُدۆمَ کننت.
نه زهمتے کَشّنت و نه رێسنت و گوَپنت،
29 بله شمارا گوَشان که سُلئیمان بادشاها گۆن وتی مزنێن شان و شئوکتا اے پُلّانی همدْرۆشمێن پۆشاک گوَرا نبوتگ.
30 او کَمباوران!
وهدے هُدا گیابانئے کاهان اے ڈئولا زێبا و بْرَهدارَ کنت که مرۆچی هست‌اَنت و باندا تَرونا سۆچگَ بنت، گڑا شمارا چِه پئیما شرترێن پۆشاکَ ندنت؟
31 «پمێشکا پرێشان و دِلتپرکه مبێت و مگوَشێت که:
‹بارێن چے بوَرێن و چے بنۆشێن؟› یا:
‹چے بپۆشێن؟›.
32 دنیائے سجّهێن هُداناباورێن مردم اے چیزانی رَندا تچنت، بله شمئے آسمانی پتَ زانت که شمارا اے چیز پَکار اَنت.
33 چه هر چیزا پێسر، هُدائے بادشاهی و آییئے راستێن راهئے شۆهازا ببێت، اے سجّهێن وت شمارا دئیگَ بنت.
34 په بانداتیگێن رۆچا پرێشان و پِگریگ مبێت، چیا که باندات، وتی پِگرا وتَ کنت.
مرۆچیگێن جنجال، په مرۆچیگا بَسّ اَنت.*