2
A ku goo gɛm
1 Nɛgibu, bɛɛ be i bɛsɛn Yinni yiikogii Yesu Kirisi nɑɑnɛ doke, i ku tɔmbun bɛɛrɛ kerɑnɑɑ mɛɛri. 2 Nge mɛ n tɛ̃ wɑ̃ɑ, gobigii goo u du bɛɛn mɛnnɔ yerɔ kɑ wurɑn tɑɑbu kɑ yɑbe burɑru, kpɑ sɑ̃ɑro goo u mɑɑ duumɑ kɑ yɑbe kĩɑnu. 3 Ì n yɑbe burɑrugii bɛɛrɛ wɛ̃ i nɛɛ, u sinɔ tɔn giro sin yerɔ, mɑ i mɑɑ sɑ̃ɑro sɔ̃ɔwɑ wi, u yɔ̃ro giɔ, ǹ kun mɛ u sinɔ temɔ, 4 i ǹ tɔmbun bɛɛrɛ kerɑnɑɑ mɛɛrimɔ? I ǹ mɑɑ bu sirimɔ kɑ bwisiku ni nu kun dɛnde?
5 Nɛn kĩnɑsibu, i swɑɑ dɑkio. Gusunɔ u bu gɔsɑ be bɑ sɑ̃ɑ sɑ̃ɑrobu hɑnduniɑn nɔni sɔɔ bu kɑ ko dukiɑgibu ben nɑɑnɛ dokebun sɔ̃, kpɑ bu bɑndu di te u be bɑ nùn kĩ nɔɔ mwɛɛru kuɑ. 6 Adɑmɑ bɛɛ i sɑ̃ɑro be gɛmɑ. N ǹ dukiɑgii berɑ bɑ bɛɛ dɑm dɔremɔ bɑ bɛɛ gɑwɑmɔ bɑ kɑ dɑɑmɔ siri yerɔ? 7 Beyɑ bɑ mɑɑ yĩsi gee te gɑri kɑm gerusimɔ te Gusunɔ u bɛɛ wɛ̃.
8 Kɑ gem, geɑ i mɔ̀, ì n bɑn te Gusunɔ u swĩin woodɑ mɛm nɔɔwɑ nge mɛ Gusunɔn gɑri geruɑ yi nɛɛ, <<A wunɛn tɔnusi kĩɔ nge wunɛn tii tii.>> 9 Adɑmɑ ì n tɔmbun bɛɛrɛ kerɑnɑɑ mɛɛrɑ durumwɑ i mɔ̀, mɑ woodɑ yɑ bɛɛ tɑɑrɛ wɛ̃ɛmɔ yèn sɔ̃ i ǹ ye mɛm nɔɔwɛ. 10 Domi bɑɑwure wi u woodɑbɑ kpuro swĩi mɑ u tiɑ torɑ, yɛ̃ro ye kpuro torɑriwɑ. 11 Geemɑ, wi u nɛɛ, <<I ku sɑkɑrɑru ko,>> wiyɑ mɑɑ nɛɛ, <<I ku tɔnu go.>> Yen sɔ̃, ɑ̀ kun sɑkɑrɑru kue, ɑdɑmɑ mɑ ɑ tɔnu go, ɑ woodɑ sɑrɑwɑ. 12 I gɑri geruo kpɑ i n mɔ̀ nge be Gusunɔ koo siri kɑ woodɑ ye yɑ tɔnu yɑkiɑmɔ. 13 Domi wi u kun wɔnwɔndu mɔ, wɔnwɔndu sɑriru sɔɔrɑ bɑ koo yɛ̃ro siri, ɑdɑmɑ wɔnwɔndɑ tɑ koo kpĩ tu woo kɑnɑ siribun wuswɑɑɔ.
Nɑɑnɛ dokebu
kɑ bin kookoosu
14 Nɛgibu, ɑre yerɑ̀ n mɔ, goo ù n geruɑ u nɛɛ, u nɑɑnɛ dokebu mɔ, kpɑ u kun bin kookoosu mɔ̀. Nɑɑnɛ doke bi, bu koo yɛ̃ro fɑɑbɑ ko? 15 Su gesi nɛɛ, bɛɛgii goo, tɔn durɔ ǹ kun mɛ tɔn kurɔ u yɑ̃nun yɑ̃ɑru mɔ̀ mɑ u ǹ mɑɑ mɔ ye u koo di. 16 Bɛɛn goo ù n nùn sɔ̃ɔwɑ u nɛɛ, kpunɑ mu n do, ɑ ku de wooru tu nun go, kpɑ ɑ di ɑ debu, ɑdɑmɑ u ǹ nùn wɛ̃ yèn bukɑtɑ u mɔ wɑsin sɔ̃, ɑrufɑɑni yerɑ̀ n mɔ. 17 Nge mɛyɑ nɑɑnɛ dokebu bù n wɑ̃ɑ bi tɔnɑ, bù kun sɔ̃ɔsire kɑ kookoosu, bu kuɑ kɑm.
18 Adɑmɑ goo u koo nɛɛ, wini u nɑɑnɛ doke, wiɔnɔ mɑɑ u kookoosu mɔ. Kon gere, ɑ mɑn wunɛn nɑɑnɛ dokebu sɔ̃ɔsio n kun kɑ kookoosu, kpɑ nɛ mɑɑ n nun nɛn nɑɑnɛ dokebu sɔ̃ɔsi kɑ nɛn kookoosu. 19 Geemɑ, ɑ nɑɑnɛ doke mɑ Gusunɔ turowɑ wɑ̃ɑ. N wɛ̃rɑ mɛ. Wɛrɛkunun tii nu mɑɑ yɛ̃ mɛ, mɑ nu diirimɔ bɛrum sɔ̃. 20 Adɑmɑ wunɛ lɑɑkɑri sɑrirugii, ɑ ǹ tubɑ mɑ nɑɑnɛ doke bi bu ǹ sɔ̃ɔsire kookoosu sɔɔ bu sɑ̃ɑwɑ kɑm? 21 Mbɑ n derɑ bɛsɛn sikɑdo Aburɑhɑmu u gem wɑ Gusunɔn wuswɑɑɔ. Win kookoosɑ, ye u kɑ win bii Isɑki yɑ̃kuru kuɑ. 22 A ǹ wɑ win nɑɑnɛ dokebu kɑ win kookoosu sĩimɔ sɑnnu? Mɑ win kookoosu sɔ̃ɔsi mɑ win nɑɑnɛ dokebu yibɑ. 23 Mɑ Gusunɔn gɑri koorɑ yi yi nɛɛ, <<Aburɑhɑmu u Gusunɔ nɑɑnɛ kuɑ, mɑ Gusunɔ u nùn gɑrisi gemgii.>> Mɑ bɑ nùn sokɑ Gusunɔn bɔrɔ. 24 Ǹ n mɛn nɑ, i wɑ mɑ Gusunɔ u tɔnu gem wɛ̃ɛmɔ win kookoosun sɔ̃, n ǹ mɔ win nɑɑnɛ dokebu tɔnɑn sɔ̃.