TIRE
TE YAKƆBU U YORUA
1
Tɔbiribu
1 Bɛɛ, bwesenu wɔkurɑ yiru, bɛɛ be i yɑrinɛ hɑnduniɑ kpuro sɔɔ, nɛ Yɑkɔbu, Gusunɔ kɑ Yinni Yesu Kirisin yoo, nɑ bɛɛ tɔburɑ.
A bwisi kɑnɔ kɑ nɑɑnɛ
2 Nɛgibu, lɑɑkɑri mɛɛri bwese bwesekɑ yè sɔɔ i wɔri kpuro i ye gɑrisio gɔ̃ru dobu. 3 Domi i yɛ̃ mɑ bɛɛn nɑɑnɛ dokebu bù kun lɑɑkɑri mɛɛribu kpɑnɛ bu koo bɛɛ tɛmɑnɑbu mɑruɑ. 4 Adɑmɑ i de tɛmɑnɑbu bu bin sɔmburu ko sɑ̃ɑ sɑ̃ɑ kpɑ i n kɑ sɑ̃ɑ tɔn girobu be bɑ yibɑ, kpɑ gɑ̃ɑnu kun mɑɑ bɛɛ tie. 5 Bwisi yì n bɛɛn goo kɔmiɛ u Gusunɔ bikio, u koo nùn yi wɛ̃ domi Gusunɔ wiyɑ u yi tɔmbu kpuro wɛ̃ɛmɔ kɑ nuku tiɑ gerusibu sɑri. 6 Adɑmɑ yɛ̃ro u bikio kɑ nɑɑnɛ, n kun kɑ sikɑ. Domi wi u sikɑ mɔ̀ u sɑ̃ɑwɑ nge nim wɔ̃kun nim mɛ woo gɑ suɑmɔ gɑ bɔrikiɑmɔ yɑm kpuro. 7-8 U sɑ̃ɑwɑ gɔ̃rusu yirugii wi u ǹ swɑɑ tiɑ swĩi win wɑ̃ɑru sɔɔ. Tɔnu win bweseru u ku bwisiku mɑ u koo gɑ̃ɑnu gɑnu wɑ Yinni Gusunɔn mi.
Sɑ̃ɑro kɑ gobigii
9 I de nɑɑnɛ dokeo bwɛ̃ɛbwɛ̃ɛ u woo kɑnɑ yèn sɔ̃ Gusunɔ u nùn wɔlle suɑ. 10 Dukiɑgii mɑɑ u woo kɑnɔ win kɑwɑbun sɔ̃, domi u koo doonɑ nge yɑkɑsun wɛ̃su. 11 Sɔ̃ɔ yɑrɑ kɑ win yɑm susuru mɑ yɑkɑsu gberɑ, sin wɛ̃su dɛrurɑ mɑ sin burɑm kpɑ. Nge mɛyɑ dukiɑgii u koo dɛrurɑ win sɔmɑ sɔɔ.
Lɑɑkɑri mɛɛribu kɑ kɔkiribu
12 Doo nɔɔrugiiwɑ wi u lɑɑkɑri mɛɛribun sɑɑ sɔɔ tɛmɑnɑ. Domi win lɑɑkɑri mɛɛribun biru u koo wɑ̃ɑru wɑ tèn nɔɔ mwɛɛru Yinni bu kuɑ be bɑ nùn kĩ. 13 Bɑ̀ n kɑ goo kɔ̃sɑ kɔkurɑ u ku rɑɑ gere u nɛɛ, Gusunɔwɑ u nùn kɔkurɑ. Domi bɑ ku rɑ kɑ Gusunɔ kɔ̃sɑ kɔkiri, mɛyɑ win tii u ku rɑ mɑɑ kɑ goo kɔ̃sɑ kɔkiri. 14 Adɑmɑ sɑnɑm mɛ tɔnun kĩru kɑnkɑm tɑ nùn sokɑ tɑ gɑwɑ, yerɑ u kɔkirirɑ. 15 Yen biru kĩru kɑnkɑm rɑ gurɑ sue kpɑ tu torɑru mɑ, torɑru tɑ̀ n mɑɑ kpɛ̃ɑ tɑ kpɑ, kpɑ tu gɔɔ mɑ.
16 Nɛn kĩnɑsibu, i ku tii nɔni wɔ̃ke. 17 Kɛ̃ɛ geeru bɑɑtere kɑ kɛ̃ɛ burɑnu kpuro sɑɑ wɔllun diyɑ nu rɑ nɛ. Nu mɑɑ weewɑ Gusunɔn min di wi u sɔ̃ɔ kɑ suru tɑkɑ kuɑ. Wiyɑ wi u ku rɑ kɔsi, u ǹ mɑɑ tiro mɔ. 18 Win tii tiin kĩru sɔɔrɑ u kɑ sun kuɑ win bibu kɑ win gɑri gee su kɑ ko nge yɑ̃ku gbiikii te u mwɑ win tɑkɑ koorɑ kpuron di.
Nɔɔbu kɑ kobu
19 Nɛn kĩnɑsibu, i yeni yɛ̃ sɑ̃ɑ sɑ̃ɑ, ɑdɑmɑ i de bɑɑwure u n dɑ nɔ kpɑɑkɑ, kpɑ u n dɑ sɑku u sere gere, kpɑ u n dɑ tɛ u sere mɔru bɑrɑ. 20 Domi tɔnun mɔru ku rɑ kom gem ko Gusunɔn nɔniɔ. 21 Yen sɔ̃, i dɑɑ disinugiɑ kɑ kom kɔ̃sum kpuro derio kpɑ i gɑri yi mwɑ kɑ tii kɑwɑbu yi Gusunɔ u duurɑ bɛɛn gɔ̃ruɔ domi yiyɑ yi koo kpĩ yi bɛɛn hunde fɑɑbɑ ko.
22 Adɑmɑ i de i ko gɑri yin kowobu, n ǹ mɔ yin nɔwɔbu tɔnɑ be bɑ tii nɔni wɔ̃kumɔ. 23 Domi wi u gɑri nuɑ mɑ u ǹ kue, u sɑ̃ɑwɑ nge durɔ goo wi u win wuswɑɑ mɛɛrɑ diki sɔɔ. 24 Ye u mɛɛrɑ u kpɑ u doonɑ mɑ u duɑri mii mii nge mɛ u sɑ̃ɑ. 25 Adɑmɑ wi u woodɑ geɑ wɛ̃ɛrimɔ ye yɑ tɔnu yɑkiɑmɔ mɑ u ye mɛm nɔɔwɑmmɛ kɑ tɛmɑnɑbu, mɑ u ǹ sɑ̃ɑ nɔwɔ wi u koo duɑri, wiyɑ sɑ̃ɑ doo nɔɔrugii win sɔmburu sɔɔ.