3
Yesugii kɑ win yɑrɑ
1 Nɛgibu, i ku de i n dɑbi bɛɛ be i kĩ i ko Gusunɔn gɑrin keu koosiobu. Domi i yɛ̃ mɑ bɛsɛ be sɑ Gusunɔn gɑrin keu sɔ̃ɔsimɔ bɑ koo sun siri kɑ wɔnwɔndu sɑriru n kere gɑbu. 2 Gɑ̃ɑ dɑbinu sɔɔrɑ bɛsɛ kpuro sɑ rɑ tore. Goo ù kun tore gere sɔɔ u sɑ̃ɑwɑ tɔnun tii wi u koo kpĩ u win wɑsi kpuro yɑrukɑ doke. 3 Sɑ rɑ dumi yɑruki dokeye yi kɑ sun mɛm nɔɔwɑ. Nge mɛyɑ sɑ ko kpĩ su yin wɑsi kpuro gɔsikiɑ. 4 I kpɑm goo nimkusu mɛɛrio. Bɑɑ mɛ su kpɑ̃ mɑ woo dɑmgisu su bɔrikiɑmɔ, sɛsɛ piibuwɑ bɑ rɑ kɑ su gɔsikie, nge mɛ goo tɛmɔ u kĩ. 5 Nge mɛyɑ yɑrɑ yɑ sɑ̃ɑ gɑ̃ɑ piibu wɑsi sɔɔ. Adɑmɑ yɑ rɑ woo kɑnɛ gɑ̃ɑ bɑkɑnun sɔ̃.
I mɛɛrio nge mɛ dɔ̃ɔ yɛ̃ɛ piibu gɑ koo kpĩ gu dɑ̃ɑ sube bɑkɑru dɔ̃ɔ mɛni. 6 Yɑrɑ yɑ mɑɑ sɑ̃ɑwɑ nge dɔ̃ɔ. Yɑ sɑ̃ɑ nge kɔ̃sɑn wɑ̃ɑ yeru bɛsɛn wɑsin doo dookɑn suunu sɔɔ, mɑ yɑ wɑsi kpuro sɑnkumɔ, yɑ mɑɑ bɛsɛn hɑnduniɑn wɑ̃ɑru kpuro dɔ̃ɔ mɛnimɔ kɑ gɔrin dɔ̃ɔ. 7 Tɔnu u koo kpĩ u yɛɛ bwese bwesekɑ kɑmiɑ, yi yi nɑɑsu nnɛ mɔ kɑ yi yi kɑbirimɔ kɑ yi yi wɑ̃ɑ nim sɔɔ, kɑ sere gunɔsu. U mɑm yi kɑmiɑ kɔ. 8 Adɑmɑ goo sɑri wi u koo kpĩ u yɑrɑ kɑmiɑ. Yɑ sɑ̃ɑwɑ gɑ̃ɑ kɔ̃sunu ni goo kun kpɛ̃ u dwiiyɑsiɑ. Mɑ yɑ dɛ̃ɛ gɔɔgii yibɑ. 9 Yerɑ sɑ dendimɔ sɑ kɑ Yinni bɛsɛn Bɑɑbɑ siɑrɑmɔ, sɑ mɑɑ kpɑm kɑ ye tɔmbu bɔ̃rusimɔ be Gusunɔ u tɑkɑ kuɑ win weenɑsibu. 10 Siɑrɑbun gɑri kɑ bɔ̃rin gɑri yɑrimɔ nɔɔ teu gen min di. Nɛgibu, n ǹ weenɛ n sɑ̃ɑ nge mɛ. 11 Bwii tiɑn di nim durom kɑ nim tɑɑtɑm ko n swĩ sɑnnu? 12 Nɛgibu, mɑngo yɑ koo sɔ̃ɔbun binu mɑ? Nge bere tɔ̃kɑ yɑ koo mɑngo mɑ? Mɛyɑ mɑɑ bɑ ku rɑ nim durom sɔke nim mɛ mu bɔru mɔn di.
Bwisi yi yi wee wɔllun di
13 Bɛɛn wɑrɑ u bwisi kɑ yɛ̃ru mɔ. U bwisi yi sɔ̃ɔsio win dɑɑ geɑ sɔɔ kɑ kookoo si u mɔ̀ kɑ tii kɑwɑbu kɑ lɑɑkɑri. 14 Adɑmɑ ì n nisi kɔ̃sunu kɑ kinɛnu mɔ bɛɛn gɔ̃ruɔ, i ku woo kɑnɑ. I ku mɑɑ gem weesu kuɑ. 15 Bwisi yin bweserɑ kun wee wɔllun di. Yi sɑ̃ɑwɑ hɑnduniɑgii, kɑ wɑsigii, kɑ Setɑmgii. 16 Domi mi nisinu kɑ kinɛnu wɑ̃ɑ, miyɑ dɑɑ bɛrɛtɛkɛ kɑ kɔ̃sɑ kpuro rɑ n wɑ̃ɑ. 17 Adɑmɑ bwisi yi yi nɑ wɔllun di, gbiikɑɑ yi dɛɛre, yen biru yi nɔɔ tiɑ kɑsu, yi du, yi ǹ kɑ wesiɑnɔ sɛ̃, yi wɔnwɔndu mɔ mɑ yi rɑ sɔm geenu ko. Yi ǹ kĩru gem wɛ̃ɛmɔ, yi ǹ mɑɑ murɑfitiru mɔ. 18 Be bɑ nɔɔ tiɑ kɑsu bɑ duurumɔ kɑ ɑlɑfiɑ, mɑ bɑ gem gɛ̃ɛmɔ.